வெட்கித் தலைகுனியும் வெட்க உணர்வு

படைப்புகளில் சிறந்தவன் மனிதன், என்று பெருமையாகச் சொல்லிக் கொள்வதுண்டு. அச்சிறப்பு அவனுக்கு எதன் மூலம் கிடைத்தது? மற்ற உயிரினங்களுக்கு இல்லாத பகுத்தறிவு அவனிடம் இருக்கிறது. மற்ற விஷயங்களில் (குழந்தைப் பெற்றுக்கொள்வதிலோ வீடு கட்டுவதிலோ) மிருகங்களுக்கும் மனிதனுக்கும் மத்தியில் பெரிய வேறுபாட்டை பார்க்க முடியாது. சொல்லத்தக்க வேறுபாடு ஒன்று இருக்கிறதென்றால் அது பகுத்தறிவும் அதன் மூலம் ஏற்படும் வெட்க உணர்வும் தான். ஆரம்ப மனிதர் ஆதம் (அலை) அவர்கள் முதற்கொண்டு ஒவ்வொரு மனிதனிடமும் வெட்க உணர்வு பதிக்கப்பட்டிருந்தது. எனவே தான், சுவனத்தில் ஆதம் (அலை) அவர்களும் ஹவ்வா (அலை) அவர்களும் தங்களுடைய ஆடை விலகியதும் உடனே சுவனத்தின் இலைகளை எடுத்து உடலை மறைத்துக் கொண்டதாக குர்ஆன் கூறுகிறது. ஆனால் இன்றைய ஆபாசக் கலாச்சாரத்தினால் அந்த வெட்க உணர்வு மனிதனிடமிருந்து கொஞ்சம் கொஞ்சமாக மறைந்து வருகிறது. வெட்க உணர்வே வெட்கித் தலைகுனிந்து மாண்டுவிடும் போலிருக்கிறது. காதலர் தினம் போன்றவை இந்த வெட்கமின்மையை வெளிச்சமாக்குவதற்காவே பயன்பட்டு வருகிறன்றன. சொல்லப் போனால் வெட்க உணர்வு வேண்டாத ஒன்றாகவும் அதை ஒரு வியாதியாகவும் பார்க்கப் படுமளவுக்கு சிந்தனை அடிமைப்படுத்தப் பட்டிருக்கிறது.

அனைத்து நபிமார்களும் சொன்ன செய்தி:

மக்கள் பெற்றுக் கொண்ட முந்தைய நபித்துவத்தின் முக்கியச் செய்தி - அதாவது - முன்வந்த நபிமார்கள் அனைவரும் கூறி வந்த செய்தி, உனக்கு வெட்கமில்லையானால் நீ நாடியதைச் செய்து கொள்!, என்பது தான, என்று நபி (ஸல்) கூறியுள்ளார்க்ள.  (புகாரி- 3484) வெட்கமில்லையானால் மனிதன் எவ்வளவு அசிங்கமான காரியத்தையும் செய்யத் துணிந்துவிடுவான், என்பதையே இந்த நபி மொழி சுட்டிகாட்டுகிறது. அது தான் இன்று நடைபெற்றுக் கொண்டிருக்கிறது. சட்டங்களில் பல ஒவ்வொரு காலத்திலும் மாற்றப்பட்டிருக்கின்றன. ஆனால், இந்த வெட்கம் அனைத்து நபிமார்களின் மூலமும் போதிக்கப்பட்ட செய்தி. அவ்வளவு முக்கியத்துவம் வாய்ந்த ஒரு உணர்வு இன்று மழுங்கடிக்கப் பட்டுக் கொண்டிருக்கிறது. அபூஸுஃப்யான் (ரலி) அவர்களிடம் அவர் இஸ்லாத்தைத் தழுவுவதற்கு முன் ரோமப் பேரரசர், நபியவர்கள் எம்மாதிரியான போதனைகயைப் போதிக்கிறார்? என்று கேட்டபோது அவர், எங்களை தொழுகை, தர்மம், கற்பொழுக்கத்தில் சிறந்த தன்மை, உறவுகளுடன் சேர்ந்து வாழ்வது போன்ற விஷயங்களைப் போதிக்கிறார் (புகாரி) என்று கூறுமளவுக்கு வெட்கம், மற்றும் ஒழுக்கம் பற்றிய நபியவர்களின் போதனை முஸ்லிம்களையும் கடந்து அனைத்து மக்களிடமும் பரவலாகியிருந்தது. வெட்கமின்மையால் அரபுகளிடம் ஏற்பட்டுவிட்ட ஆபாச - அறியாமைக் கலாச்சாரத்தை கருவறுப்பதற்காக நபித்துவத்தின் ஆரம்பம் முதற்கொண்டே வெட்கம் மற்றும் ஒழுக்க மேன்மையின் முக்கியத்துவம் பற்றி அதிகம் பேசியிருக்கிறார்கள், என்பதை விளங்க முடிகிறது.  

வெட்கம் வியாதியல்ல:

நபி (ஸல்) அவர்களின் காலத்தில் ஒரு மனிதர் தம்முடைய சகோதரர் வெட்கப்படுவதைக் கண்டித்துக் கொண்டிருந்தார். அதற்கு நபி (ஸல்) அவரை விட்டு விடும். நிச்சயமாக வெட்கம் இறைவிசுவாசத்தோடு (ஈமானோடு) கலந்தது, என்று கூறினார்கள். (புகாரீ - 6118) புகரீ ஷரீஃபின் மற்றொரு அறிவிப்பில் கண்டிப்பாக வெட்கம் நல்லதைத் தவிர வேறெதையும் கொண்டுவராது, என்றும் கூறினார்கள். (6117) ஒருவர் வெட்கப்பட்டு தம்முடைய உரிமையைப் பெறுவதை விட்டுவிட்டால் அவருக்கு அது நற்பலனையே பெற்றுத் தரும். அதனால் அவர் ஒன்றும் நஷ்டப்பட்டுப் போய்விடமாட்டார். ஒரு உண்மை இறைவிசுவாசிக்கு மார்க்கத்தின் போதனைகளும் சட்டங்களுமே சரியாகவும் சிறந்ததாகவும் தெரிய வேண்டும்.

அழிவின் முதல்படி:

அல்லாஹ் ஓர் அடியானை நாசமாக்க நாடி விட்டால் அவனை முதலில் வெட்கமிழக்கச் செய்கிறான், ... கடைசியாக அவன் இஸ்லாத்தை விட்டும் வெளியேறி விடுகிறான், என்று நபி (ஸல்) அவர்கள் கூறினார்கள்..  (இப்னுமாஜா - 4054)   இன்று கோ எஜுகேஷன் மூலம் ஆரம்பம் முதற்கொண்டே வெட்க உணர்வு வெட்டி விடப்படுகிறது. அதற்கு முன், பிறந்ததிலிருந்து இசையின் விசையில் தான் பிள்ளைகள் வளர்கின்றன. தண்ணீர் விவசாயத்தை செழிப்படையச் செய்வது போல் இசை உள்ளத்தில் நயவஞ்சகத் தனத்தை தண்ணீர் ஊற்றி வளர்க்கும், என்று நபி (ஸல்) அவர்கள் கூறிய தகவல் ஸுனனுல் பைஹகீயில் அறிவிக்கப்பட்டுள்ளது. (அல்பைஹகீ - 21536) இன்று (உரடவரசந வாசடிரபா அநனயை) மீடியாவின் மூலம் தவறான கலாச்சாரத்தை மக்களுடைய சிந்தனையுடன் கலந்து விடுகின்றனர். இன்றைய இசை வெறும் இசை மட்டுமல்ல. அத்துடன் இஸ்லாத்திற்கு முரணான கருத்துக்களும் இசையுடன் நம்மை அறியாமலேயே நமக்குள் புகுத்தப்படுகின்றன. இசையில் ஆர்வம் கொண்ட வாலிபர்கள் இறைநிராகரிப்புக் கலாச்சாரத்திற்கு எதிராக எதையும் கேட்க விரும்ப மாட்டார்கள். உலமாக்களை நல்ல கண் கொண்டு பார்க்க மாட்டார்கள். அவர்கள் மஸ்ஜிதுக்கு வருவதை எதிர்பாக்க முடியாது. இது பற்றி நபி (ஸல்) அவர்கள் தெளிவாகவே எச்சரித்திருக்கிறார்கள்.

மொபைல் மூலம் இசை இன்று பரவலாக்கப் பட்டிருக்கிறது. சிறுவயதிலேயே அந்த இசையில் இனிமை பெற்று அதைத் தவிர வேறெதிலும் காதுக்கு இனிமை கிடைப்பதாக உணரமாட்டார்கள். இது உச்சகட்டத்தை அடையும் போது மார்க்கத்தின் போதனைகளின் மீது வெறுப்பு ஏற்படுகிறது. பெரியவர்களும் நல்லவர்களும் விபரமில்லாதவர்கள், என்ற உணர்வை ஏற்படுத்துகிறது. இஸ்லாத்தின் கட்டுப்படுகளும்  பெற்றோர்களின் கட்டுப்பாடுகளும் அவர்களுக்கு கொடுமைப்படுத்தும் மடமைச்சட்டங்களாகவே தெரிகிறது. இவையெல்லாம் அவர்களுடைய சுதந்திரத்தில் தலையிடுவாகக் கருதும் அளவுக்கு மூளைச்சலவை செய்யப்பட்டுவிடுகிறார்கள். அவர்களுடைய வாழ்க்கையை - ஒழுக்கத்தைச் சீரழிக்கும் சுதந்திரத்தில் மார்க்கமோ பெற்றோர்களோ தலையிடுவதை தண்டனையாக நினைக்க தலைப்பட்டு விடுகிறார்கள். இசை நயவஞ்சகத்தனத்தை தண்ணீர் ஊற்றி வளர்க்கிறது, என்ற நபிமொழியின் உண்மைத்துவம் மேலும் மேலும் உறுதியாகிறது. வெட்க உணர்வை நபி (ஸல்) அவர்கள் ஈமான் - இறைவிசுவாசத்தைச் சார்ந்தது, என்று கூறினார்கள். ஈமானுக்கு முரணாக இறைநிராகரிப்பை விட மோசமான நயவஞ்சகத்தனத்தை விதைக்கும் இசையின் மூலம் அந்த வெட்க உணர்வு வேரோடு பிடுங்கப்பட்டு விட்டுவிடுவதில் என்ன சந்தேகம் இருக்கப் போகிறது. 

அசத்தியம் பெட்ரூம் வரை:

தப்லீக் ஜமாஅத்தினர்கள் கூட தீனைப்பற்றி பேசுவதற்கு வாசலில் நின்று கொண்டு அழைக்க வேண்டியிருக்கிறது. அவர் வெளியே வரவும் செய்யலாம். வராமலும் இருக்கலாம். அல்லாஹ்வின் பக்கம் அழைப்பவர்கள் வாசலோடு அனுப்பி விடப்படுகிறார்கள். ஆனால், குஃப்ர், இறைநிராகரிப்பாளர்கள் எந்த ஊடகத்தின் மூலம் நம்முடைய பிள்ளைகளின் சிந்தனையில் அசிங்கத்தை நிரப்பிக் கொண்டிருக்கிறார்களளோ அதை டீ. வி. யின் உருவத்தில் வீட்டிற்குள்ளே வைத்திருக்கிறார்கள். சத்தியம் வீட்டுவாசலைத் தட்டுகிறது. அசத்தியம் பெட்ரூம் வரை வந்து வெற்றியும் பெறுகிறது. (ஃபகீர் கா பயாம் நயீ நஸ்ல் கே நாம்) இன்று டீ வி, வீடியோ போன்றவை மக்களிடம் ஏற்படுத்தியிருக்கிற ஒழுக்கச் சீர்கேடு சாதாரணமானதல்ல. விபச்சாரம் பெருகியிருக்கிறது, என்பது மட்டுமல்ல; ஒருவர் தன்னுடைய மகள், சகோதரி போன்ற இரத்த உறவுப் பெண்களைக் கூட இச்சையோடு பார்க்க ஆரம்பித்து விடுகிறார். சிலர் அவர்களுடன் விபச்சாரமும் செய்து விடுகின்றனர். (ஹயா அவ்ர் பாக்தாமனீ)  மஹ்ரமான (இரத்த உறவுப்) பெண்ணுடன் விபச்சாரம் செய்தவனைக் கொன்று விடுங்கள், என்று நபி (ஸல்) அவர்கள் கூறினார்கள். (திர்மிதீ - 1462)

இரத்த உறவுப் பெண்களைத் தவறான பார்வையாக பார்க்கக் கூடாது, என்பதும் அவர்களுடன் உறவு கொள்ளக்கூடாது, என்பதும் மனிதனுடைய இயற்கை சுபாவத்துடன் கலந்து விட்ட ஒரு தன்மை. மனிதனையும் மிருகத்தையும் வேறுபடுத்திக் காட்டுவதே இந்த தன்மை தான். ஆடு, மாடு, நாய் போன்ற பிராணிகளுக்கும் மனிதனுக்கும் மத்தியில் பிரித்துக் காட்டக்கூடிய தன்மையே மாறிவிட்டதென்றால் இது வெட்க உணர்வு  மட்டும் இழந்து போகவில்லை. மனித உணர்வும் மாண்டுவிட்டதாகவே தோன்றுகிறது. வெட்கத்தின் அளவுகோல்:

ஒரு தடவை நபி (ஸல்) அவர்கள் தோழர்களிடம், அல்லாஹ்விடமிருந்து வெட்கப்பட வேண்டிய முறைப்படி வெட்கப்படுங்கள், என்று கூறினார்கள். நபித் தோழர்களும் அல்லாஹ்வின் தூதர் அவர்களே நாங்கள் வெட்கப்படுகிறோம். அல்ஹம்துலில்லாஹ்! - எல்லாப்புகழும் அல்லாஹ்வுக்கே! என்று கூறினார்கள். அதற்கு நபியவர்கள் அவ்வாறல்ல. (சாதாரண வெட்கத்தைப் பற்றி நான் கூறவில்லை) அல்லாஹ்விடமிருந்து வெட்கப்படும் முறைப்படி வெட்கப்பட வேண்டுமென்றால் (அதற்கென ஒரு முறை இருக்கிறது. அதாவது)  தலையையும் தலை ஒன்று சேர்த்து வைத்திருப்பதைப் பாதுகாக்க வேண்டும. வயிற்றையும் அதைச் சுற்றியுள்ளவற்யும் பாதுகாக்க வேண்டும். மரணத்தையும் அதற்குப்பிறகு உடல் உக்கிப்போவதைப் பற்றியும் நினைக்க வேண்டும். மறுமை வாழ்க்கையில் நாட்டம் கொண்டவர் உலக வாழ்க்கையின் அலங்காரத்தை விட்டுவிடுவார். யார் அப்படிச் செய்தாரோ அவரே அல்லாஹ்விடம் வெட்கப்பட வேண்டிய அளவுக்கு முறைப்படியாக வெட்கம் கொண்டாவராவார், என்று கூறினார்கள். (திர்மிதீ - 2458)   தலையைப் பாதுகாப்பதென்றால் அல்லாஹ்வுக்காகவே தவிர சிரம் பணியக்கூடாது. மற்றவர்களுக்குக் காட்டுவதற்காக (தொழக்கூடாது) ஸஜ்தா செய்யக்கூடாது. தலை ஒன்று சேர்த்து வைத்திருப்பவை என்றால் கண், காது, மூக்கு, நாவு போன்றவற்றை எடுத்துக்கொள்ளும். பார்க்கக் கூடாதவற்றையோ அந்நியப் பெண்களையோ பார்க்கக் கூடாது. கேட்கக்கூடாதவற்றை கேட்கக்கூடாது. பேசக்கூடாதவற்றை பேசக்கூடாது. வயிற்றைப் பாதுகாப்பதென்றால் ஹராமானவற்றைச் சாப்பிடக்கூடாது.  அதைச் சுற்றியிருக்க்கூடிய மறைவிடங்கள், கால்கள் போன்றவற்றை மனோ இச்சைக்கு அடிபணிய வைக்கக்கூடாது. அல்லாஹ்விடம் வெட்கப்படுவதற்கென ஒரு இலக்கணம் இருக்கிறது. ஆனால் இன்று பல சமயங்களில் நன்மையை ஏவுவதிலும் தீமையைத் தடுப்பதிலும் வெட்கம் குறுக்கிடுகிறது. மார்க்க விஷயங்களைக் கற்றுக்கொள்வதற்கு வெட்கம் தடையாக இருக்கிறது. மார்க்கத்தில் இந்த வெட்கம் விரும்பத்தக்கதல்ல. நபி (ஸல்) அவர்கள் மதீனா வந்த பின் அன்ஸாரிப் பெண்கள், பெண்களுக்கான மார்க்கச் சட்டங்கள் பற்றி நபியவர்களிடம் தெளிவாகக் கேட்டறிந்து கொண்டனர். எனவே, அவர்களைப் பற்றி ஆயிஷா (ரலி) அவர்கள், பெண்களில் சிறந்தவர்கள் அன்ஸாரிப் பெண்கள். வெட்கம் அவர்களுக்கு மார்க்க விஷயத்தில் விளக்கம் பெற்றுக்கொள்வதற்குத் தடையாக இருக்கவில்லை என்று புகழ்ந்து கூறினார்கள். (புகாரி, முஸ்லிம்)

இன்று பாவம் செய்! நாளை திருந்தலாம்!:

இன்று பொதுவாக வாலிபர்களிடம் வெட்க உணர்வையெல்லாம் ஒதுக்கி வைத்து விட்டு, இப்பொழுது மனம் போனபடி செய்து கொள்ளலாம். விளைவுகளை பிறகு பார்த்துக் கொள்ளலாம், என்ற சிந்தனை தான் மிகைத்திருக்கிறது. மன்னிப்பு கேட்பது நல்ல தன்மை தான் என்பதற்காக யாரிடமும், பிறகு மன்னிப்பு கேட்கும் படியான வார்த்தையைப் பேசிவிடக்கூடாது. அவ்வாறே பின்னர் அல்லாஹ்விடம் மன்னிப்பு கேட்டுக் கொள்ளலாம் என்ற அசட்டுத் துணிச்சல் வந்து விடக்கூடாது. இதற்கு யஃகூப் (அலை) அவர்களுடைய வாலிபப் பிள்ளைகளை உதாரணமாகச் சொல்லலாம். யூஸுஃப் (அலை) அவர்களின் மீது அவர்களுடைய சகோதரர்களுக்கு பொறாமை இருந்தது. எனவே, இப்பொழது யூஸுபை கொலை செய்து விடலாம். அதற்குப் பிறகு தௌபா செய்து திருந்திவிடலாம், என்று நினைத்தனர். (யூஸுஃபைக் கொன்று விடுங்கள். அல்லது அவரை பூமியில் எங்கேனும் எறிந்து விடுங்கள். (அப்படிச் செய்தால்) உங்கள் தந்தையின் முகம் (கவனம்) முற்றிலும் உங்கள் பக்கமே இருக்கும். அதற்குப் பின்னர் நீங்கள் (அல்லாஹ்விடம் மன்னிப்பு தேடிக்கொண்டு ) நல்லவர்களான கூட்டத்தினராகிவிடுவீர்கள், என்று கூறினார்கள். (அல்குர்ஆன் - 12:9) ஆனால் யூஸுப் (அலை) அவர்களை ஒரு பெண் தவறான செயலுக்கு அழைக்கும் போது இப்பொழுது தவறு செய்து விட்டு பிறகு திருந்திக் கொள்ளலாம், என்று நினைக்கவில்லை. அல்லாஹ்விடம் பாதுகாப்பு தேடி அந்தத் தவற்றை விட்டும் ஒதுங்கிக் கொண்டார்கள்; வெருண்டோடினார்கள்.  யூஸுப் (அலை) அவர்களுக்கு தவறு செய்வதற்கான எல்லா சூழ்நிலைகளும் சாதகமாக அமைந்திருந்தன. தவறு செய்யாவிட்டால் சிறைத்தண்டனை கிடைக்கும் என்ற நிலையிலும் பாவத்தை விட்டும் வெருண்டோடினார்கள். ஆனால் அவர்களுடைய சகோதரர்களுக்கு தவறு செய்வதற்கு சாதகமான சூழ்நநிலையோ நிர்பந்தமோ இருக்கவில்லை. மாற்றமாக தவறு செய்வதற்கான சூழ்நிலையை உண்டாக்குவதற்காக வேண்டுமென்றே திட்டம் தீட்டினார்கள். அதற்காக பொய்யும் சொன்னார்கள். யூஸுஃப் (அலை) அவர்கனை கிணற்றில் வீசினார்கள். பிறகு தௌபா செய்து திருந்திக் கொள்ளலாம், என்ற தைரியம் தான் இந்த எல்லா காரியத்தையும் செய்ய வைத்தது. இன்றைய வாலிபர்களுக்கும் இதே துணிச்சலில் தான் தவறுகளைச் செய்ய ஆரம்பிக்கிறார்கள். இப்பொழுது செய்து விட்டு நடப்பதை பின்னர் பார்த்துக் கொள்ளலாம், என்று நினைக்கிறார்கள். நபியின் பிள்ளைகளுக்குக் கிடைத்த நல்ல சந்தர்ப்பம் அனைவருக்கும் கிடைக்கும் என்று எதிர்பார்க்க முடியாது. அல்லாஹ்வைப் பயந்து தவறு செய்யாமல் ஒதுங்கிக் கொண்ட யூஸுப் (அலை) அவர்கள் பிற்காலத்தில் அரசில் அங்கம் வகிக்கும் அளவுக்கு சிறப்பைப் பெற்றார்கள். ஆனால், அவர்களுடைய சகோதரர்கள் யூஸுப் (அலை) அவர்களிடமே உதவி கேட்டு கைகட்டி நிற்க வேண்டிய நிலையைத் தான் அல்லாஹ் உருவாக்கினான், என்ற குர்ஆனுடைய சரித்திரத்தை வாலிபர்கள் நினைவில் கொள்ள வேண்டும்.

நிகழ்கால சூதாட்டம்!

 வட்டியைப்போன்று சூதாட்டமும் முதலாளித்துவத்தின் ஒரு முக்கிய அம்சம். முற்காலத்தில் மக்கள் தனிப்பட்ட முறையில் தான் சூதாட்டத்தில் ஈடுபடுவர். ஆனால் இன்று அதற்கென கம்பெனிகள் உருவாகிவிட்டன. சில நபர்களின் வட்டத்திற்குள் இருந்த சூதாட்டம் இன்று சர்வதேச ஆட்டமாகிவிட்டது. லாட்டரியோடு சூதாட்டம் முடிந்திடாமல் இன்ஷுரன்ஸ், ஷேர்மார்க்கட் என அதனுடைய நெட்வொர்க் விசாலமாகிக் கொண்டிருக்கிறது. விளையாட்டு வீரர்கள் தங்களுக்கு மத்தியில் சூதாடுவது ஒரு புறமிருக்க இரசிகர்களும் பந்தயத்தில் குதிக்கின்றனர். இதனால் சிறுவர்களின் உள்ளத்திலிருந்து அதன்மீதிருக்க வேண்டிய வெறுப்பு வேரறுக்கப்பட்டுவிட்டது. குர்ஆன், ஹதீஸில் மதுவைப்போல சூதுவும் கடுமையான முறையில் எச்சரிக்கப்பட்டிருக்கிறது. ஈமான் கொண்ட இறைவிசுவாசிகளே திட்டமாக மது, சூதாட்டம், பலிப்பீடங்கள், குறிபார்க்கும் அம்புகள் ஆகியவை அருவருக்கத்தக்க ஷைத்தானின் செயல்களாகும். எனவே, அவற்றைத் தவிர்த்துக்கொள்ளுங்கள். இதன் மூலம் நீங்கள் வெற்றி பெறலாம். (அல்குர்ஆன் 5:90) அல்லாஹ் சூதாட்டத்தை இணைவைப்புடன் இணைத்து கூறுகிறான், என்றால் அது எவ்வளவு பெரிய கொடிய குற்றமாக இருக்கும்?! ஆனால் இன்று அது ஒரு குற்றமாகவே கருதப்படாமல் பொழுதுபோக்கு அம்சமாக ஆக்கப்பட்டிருப்பது தான் கைசேதம். 

நினைத்தாலே குற்றம்:

தன்னுடைய நண்பனிடம் வா! சூதாடலாம் என்று கூறினால் அவன் தர்மம் செய்யட்டும் என்று நபி (ஸல்) அவர்கள் கூறினார்கள். (புகாரி, முஸ்லிம்) சூதாடவில்லை. அதன் பக்கம் அழைத்த குற்றத்திற்கே தர்மத்தின் மூலம் பரிகாரம் தேடவேண்டுமென்று நபியவர்கள் கூறுகிறார்கள். ஆடுபுலியாட்டம் ஆடுபவன் அல்லாஹ் மற்றும் இறைத்தூதருக்கு மாறுசெய்துவிட்டான், என்று நபி (ஸல்) அவர்கள் எச்சரித்தார்கள். (அபூதாவூத் -4940) ஒரு தடவை உஸ்மான் (ரலி)அவர்கள் மிம்பரின் மீது நின்றுகொண்டு மக்களே! ஆடுபுலியாட்டம் (சூது) ஆடுவதை விட்டுவிடுங்கள். ஏனெனில் உங்களில் சிலருடைய வீடுகளில் ஆடுபுலியாட்டப் பலகை இருப்பதாக எனக்கு தகவல் வந்துள்ளது. எனவே, யார்யாரிடத்தில் அந்தப் பலகை இருக்கிறதோ அவர் அதை எரித்துவிடட்டும். அல்லது உடைத்துவிடட்டும், என்று கூறினார்கள். மற்றொருமுறை மிம்பரிலிருந்தவாறே கூறினார்கள். மக்களே! ஆடுபுலியாட்டம் விஷயத்தில் ஏற்கனவே நான் எச்சரித்துவிட்டேன். பிறகும் அதை நீங்கள் எறியவில்லை. எனவே, நான், விறகுகளை சேகரித்து யார்யாருடைய வீட்டில் அந்தப்பலகை இருக்கிறதோ அந்த வீடுகளை நெருப்பு வைக்க திட்டமிட்டுள்ளேன், என்று கூறினார்கள். (கன்ஜுல் உம்மால்) இன்று பிள்ளைகளுக்கு பள்ளிக்கூட விடுமுறை காலங்களில் விளையாடுவதற்காக கேரம் போர்ட் வாங்கிக்கொடுக்கிறார்கள். அதனால் மார்க்கத்திற்கோ உடலுக்கோ எந்த லாபமும் இருப்பதில்லை. தொழுகை நேரமும் ஞாபகத்தில் வருவதில்லை. வீடியோ கேம் பற்றிச் சொல்லத் தேவையில்லை.  மௌட்டீக காலத்தில் பணத்தை வைத்து மட்டும் சூதாடமாட்டார்கள். மனைவி மக்களையும் வைத்து சூதாடுவார்கள். வெற்றிபெறுபவர் தோற்றவருடைய பணத்தையும் குடும்பத்தையும் எடுத்துக்கொள்வார், என்று இப்னு அப்பாஸ் (ரலி) அவர்கள் கூறுகிறார்கள். (தஃப்ஸீருத் தப்ரீ)

சூது என்பது.... :

ஒரு காரியம் நடக்கவும் செய்யலாம், நடக்காமலும் போகலாம். இப்படிப்பட்ட காரியம் நடந்தால் உனக்கு இவ்வளவு பணம் நான் தருவேன். நடக்கவில்லையானால் நீ தரவேண்டும், என்று கூறுவதற்குப் பெயர் சூதாட்டம். விளையாட்டில் ஒரு குறிப்பிட்ட அணி வெற்றி பெற்றால் பணம் என்று பந்தயம் கட்டுவது போல் . அல்லது ஒரு தரப்பில் உறுதியாக பணம் கொடுப்பது. மறு தரப்பிலிருந்து அந்தப் பணம் நமக்கு கிடைக்காமலும் போகலாம் அல்லது அதைவிட அதிப்படியான பணத்தை கிடைக்கச் செய்யலாம். ஜெனரல் இன்ஷுரன்ஸ், லாட்டரியைப் போல. வெற்றி, தோல்வியின் போது ஒரு தரப்பு மட்டும் பணம் தருவதாகக் கூறினால் அது சூதாட்டமாக ஆகாது.

விளம்பரப் பரிசுகள்:

நாம் கொடுத்த பணத்திற்குச் சமமான பகரம் கிடைத்துவிட்டாலும் சூதாட்டமாக ஆகாது. இன்று அதிகமான வியாபாரிகள் தங்களுடைய தயாரிப்புகளை விளம்பரப்படுத்துவதற்காக அந்தப் பொருளுடன் ஏதாவது குறிப்பிட்ட எண்கள் கொண்ட ஒரு கூப்பனையும்  கொடுப்பார்கள். பிறகு குலுக்கல் முறையில் ஒரு நம்பர் தெரிவு செய்யப்பட்டு அந்த கூப்பன் வைத்திருப்பவருக்கு அன்பளிப்புகளை வழங்குவர். இம்முறையில் விற்கப்பட்ட அந்தப் பொருள் மார்க்கட் விலைக்கே விற்கப்பட்டிருந்தால் நம்முடைய பணத்திற்கான முழுப் பகரமும் கிடைத்துவிட்டது. அதற்குப்பிறகு குலுக்கலில் கிடைப்பது வியாபாரியின் புறத்திலிருந்து அன்பளிப்பாகிவிடும். (இஸ்லாம் அவ்ர் ஜதீத் மஆஷீ மஸாயில் - 3/359)

சுற்றுலாத்தளங்களில் சூதாடடம்:

சுற்றுலாத் தளங்களிலும் பொருட்காட்சிகளிலும் பெற்றோர்கள் தங்களுடைய பிள்ளைகளை சூதாட்டத்தில் ஈடுபடுத்துகிறார்கள். அதை ஒரு விளையாட்டாகவும் யோகத்தை சோதிப்பதாகவும் நினைத்துக் கொள்கிறார்கள். குறிப்பிட்ட கட்டணத்தை செலுத்திவிட்டு சிறுவர்கள் அந்த விளையாட்டில் ஈடுபடுவார்கள். உதாரணமாக ஒரு பந்தை உருட்டி விடவேண்டும். அது குறிப்பிட்ட இடத்தில் விழுந்தால் அதற்குரிய பரிசுப்பொருட்கள் கிடைக்கும். அப்படி விழவில்லையானால் எதுவுமே கிடைக்காது. நாம் கட்டிய கட்டணம் எந்த லாபமுமின்றி போய்விடும். இது போன்ற ஏராளமான சூதாட்ட விளையாட்டுக்களை சுற்றுலாத் தளங்களில் பார்க்கலாம். இணைவைப்புக் குற்றத்துடன் இணைத்த கூறப்பட்டிருக்கும் சூதாட்டத்தை முஸ்லிம் பெற்றோர்கள் தங்களுடைய பிள்ளைகளில் உள்ளத்தில் பதிய வைத்தால் அந்தப் பிள்ளைகள் எந்தமாதிரியான சிந்தனையுடன் வளருவார்கள்?  மௌட்டீக காலத்தில் அநியாயமான முறையில் நடைபெறக்கூடிய நிறைய வியாபார நடைமுறைகள் இருந்தன. அவற்றையெல்லாம் நபியவர்கள் தடை செய்து விட்டார்கள். உதாரணமாக, வியாபாரி ஒரு கல்லைக் கொடுத்து இதை எறியுங்கள்! அது எந்த ஆடையில் விழுகிறதோ அந்த ஆடை பத்து திர்ஹத்திற்குப் பகரமாக உங்களுக்கு சொந்தமாகிவிடும், என்று கூறுவார். நபி (ஸல்) அவர்கள் இந்தக் கல்எறிந்து நடக்கும் விற்பனையைத் தடை செய்தார்கள். ஒரு ஆடையைத் தொட்டுவிட்டாலே அந்த ஆடையை வாங்கிவிட்டதாக கருதப்படும். இந்த முறையையும் நபி (ஸல்) அவர்கள் தடை செய்தார்கள். (முஸ்லிம்) யாருடைய பணமும் அவருடைய மனதிருப்தியின்றி நியாயமான முறையில் கொடுக்கல் வாங்கல் நடந்தாலே தவிர ஹலால் ஆகாது. கூட்டு வியாபாரத்தில் லாப நஷ்டம் மார்க்கத்தின் வழிகாட்டலுக்கு முரணாக குலுக்கல் முறையில் அதாவது குலுக்கலில் யார் பெயர் வருகிறதோ அவர் தான் அந்த மாதத்தின் லாப நஷ்டத்திற்கு முழு பொறுப்பு என்று முடிவு செய்தால் இதுவும் சூதாட்டமே!

ஒட்டக இறைச்சி சூதாட்டம்:

மௌட்டீக காலத்தில் சூதாட்டத்தில் பலமுறைகள் நடைமுறையில் இருந்தன. அவற்றில் ஒன்று ஒட்டக இறைச்சி சூதாட்டம். ஒரு ஒட்டகத்தை அறுப்பார்கள். அவற்றை சமமாகப் பங்கிடாமல் ஏற்றத்தாழ்வாக பல பிரிவுகாளகப் பிரிப்பார்கள். அதாவது பல அம்புகளில் குறிப்பிட்ட எண்களை எழுதி பிறகு ஒவ்வொருவருடைய பெயரில் ஒரு அம்பை எடுப்பார்கள். அதில் எந்த அளவு குறிக்கப்பட்டிருக்கிறதோ அந்த அளவு அந்தந்த நபர்களுக்குக் கிடைக்கும். இதில் சமத்துவம் இருக்காது, என்பது மட்டுமல்ல; சில அம்புகளில் எதுவுமே எழுதப்பட்டிருக்காது. யாருடைய பெயரில் அந்த அம்பு வந்ததோ அவருக்கு ஒட்டகத்தில் பங்கு கிடையாது, என்பது மட்டுமல்ல; அந்த ஒட்டகத்துக்குரிய விலையையும் அவர் தான் கொடுக்க வேண்டும். தொழுகை நோன்பு போன்ற வணக்க வழிபாடுகள் மட்டுமே மார்க்கமல்ல. ஜாஹிலிய்யாவின் எல்லா சடங்குகளையும் முற்றாக தவிர்க்க வேண்டும். ஜாஹிலிய்யாவின் எல்லா சடங்குகளையும் என் கால்களுக்கடியில் புதைக்கப்பட்டுவிட்டன, என்று நபி (ஸல்) அவர்க்ள ஹஜ்ஜத்துல் விதாவின் போது கூறி இந்த இறைமார்க்கத்தை நிறைவாக்கித் தந்துவிட்டார்கள். ஆனால் இன்று  நபியவர்கள் காலடியில் தங்களுடைய காலடியில் புதைத்தவற்றை தோண்டித்தோண்டி எடுத்து ருசி பார்த்துக் கொண்டிருப்பது எவ்வகையில் நியாயம்?  இன்று நண்பர்கள் நான்கைந்து பேர் ஒன்று சேர்ந்து ஹோட்டலுக்குச் சென்று சாப்பிட்ட பின் குலுக்கல் முறையில் பெயரைத் தெரிவு செய்வார்கள். யாருடைய பெயர் வருகிறதோ அவர் தான் பில் கட்ட வேண்டும். ஒவ்வொரு முறை ஹோட்டலுக்குச் செல்லும் போதும் இதே முறை தான். இதனால் ஒருவரே திரும்பத் திரும்ப பணம் செலவு செய்ய நேரிடலாம். இது போன்ற சூதாட்டங்களில் வாலிபர்கள் விளையாட்டாக ஈடுபடுகிறார்கள். இதை அவர்களாக விரும்பி செய்தாலும் ஹராம் தான். சோம்பேறித்தனமாக அடுத்தவனுடைய பணத்தில் சாப்பிடுவதை இஸ்லாம் விரும்பவில்லை. இதனால் பல நேரங்களில் தங்களுக்கு மத்தியில் விரோதத்தையும் குரோதத்தையும் ஏற்படுத்தி விடுகிறது. மது மற்றும் சூதாட்டத்தின் மூலம் உங்களுக்கிடையில் பகைமையையும் வெறுப்பையும் ஏற்படுத்தி அல்லாஹ்வை நினைவுகூர்வதிலிருந்தும் தொழுகையிலிருந்தும் உங்களைத் தடுத்துவிடவே ஷைத்தான் விரும்புகிறான். இப்பொழுதாவது (இவற்றிலிருந்து) விலகிக்கொள்வீர்களா? என்று குர்ஆன் கேட்கிறது.

குலுக்கல் சீட்டு:

சுமார் ஜம்பது பேர் சேர்ந்து மாதத்திற்கு நூறு ரூபாய் கட்டுகின்றனர். ஒவ்வொரு மாதமும் குலுக்கல் நடைபெறும். அதில் யாருடைய பேர் வருகிறதோ அவருக்கு அனைத்து பணத்தையும் வழங்கப்படும். அவரும் தொடந்து பணம் கட்டவேண்டும். அனைவருக்கும் அவரவர் கட்டிய பணம் கூடுதல் குறைவின்றி கிடைத்துவிடும். இது மார்க்கத்தில் அனுமதிக்கப்பட்டது தான். இதில் மற்றவர்களுக்கு கடன் கொடுத்து உதவக்கூடிய நல்ல பண்பும் இருக்கிறது. குலுக்கலில் பெயர் வந்து பணத்தைப் பெற்றுக்கொண்ட பின் அவர் பணம் கட்டத்தேவையில்லை, என்றிருந்தால் அது கூடாது. (ஜுவா அவ்ர் ஜுயே கீ முரவ்வஜா ஷக்லே)

ரியல் எஸ்டேட்:

நிலம், வீடு வாங்கி விற்பது தவறில்லை. ஆனால் இன்று ரியல் எஸ்டேட்டிலும் சூதாட்டம் ஊடுருவியுள்ளது. உதாரணமாக ஒரு நில விற்பனையாளர் கவர்ச்சிகரமான திட்டமொன்றை அறிமுகப்படுத்துகிறார். அதாவது ஒரு நிலத்தின் விலை இரண்டு லட்சம் ரூபாய். ஆனால் இதன் விலையை ஒரே நேரத்தில கொடுக்கத் தேவையில்லை. ஒவ்வொரு மாதமும் ஐநூறு ரூபாய் வீதம் கொடுக்க வேண்டும். இந்தத் திட்டத்தில் சேர்ந்தவர்களுடைய பெயர்களுக்கு குலுக்கல் நடத்தப்படும். குலுக்கலில் யார் பெயர் வருகிறதோ அவருக்கு அந்த மாதமே நிலம் கொடுக்கப்பட்டுவிடும். பிறகு அவர் பணம் கட்ட வேண்டிய தேவையுமில்லை. இந்நிலையில் முதல் மாதத்தில் யார் பெயர் வருகிறதோ அவருக்கு இரண்டு லட்சம் விலை கொண்ட நிலம் வெறும் ஐநூறு ரூபாயில் கிடைத்து விடுகிறது. இரண்டாவது மாதத்தில் ஆயிரம் ரூபாயில் கிடைத்துவிடுகிறது. இது மார்க்கத்தில அனுமதிக்கப்பட்டதல்ல. ஏனெனில் இங்கு நிலத்தின் விலை எவ்வளவு? என்பது தெளிவாக்கப்படவில்லை. விற்பனை ஒப்பந்தத்தில் வாங்கப்படும் பொருளின் விலை தெளிவாக அறிவிக்கப் பட்டிருக்க வேண்டும். இங்கு விலை தெளிவாக குறிப்பிடப்படவில்லை. இது போன்ற ஒரு பிரச்சினைக்கு ஃபதாவா மஹ்மூதிய்யாவில் இதே காரணத்தைக் கொண்டு கூடாது என்று தீர்வு கூறப்பட்டுள்ளது. மேலும், இதை சூதாட்டம் என்றும் வட்டி என்றும் சொல்லமுடியும், என்றும் கூறப்பட்டுள்ளது. (16/435)

இன்ஷுரன்ஸ்:

ஜெனரல் இன்சூரன்ஸில் நாம் மாதந்தோறும் பிரீமியம் செலுத்திக் கொண்டிருக்க வேண்டும். அந்தப் பொருளுக்கு விபத்து ஏதும் நடந்தால் அதற்குரிய இழப்பீட்டை காப்பீட்டு நிறுவனம் கொடுத்துவிடும். அப்படி விபத்து ஏதும் நடக்க வில்லையானால் நாம் கட்டிய பிரிமியத் தொகை எதுவும் நமக்குக் கிடைக்காது. இந்த ஒப்பந்தத்தில் ஒரு தரப்பினர் பிரிமியம் செலுத்துவது உறுதி செய்யப்படுகிறது. ஆனால் மற்றொரு புறத்தில் பகரம் கிடைப்பது உறுதி செய்யப்பட வில்லை. விபத்து நடந்தால் என்ற நிபந்தனை விதிக்கப்படுகிறது. அது நடக்குமா? நடக்காதா? என்பது தெரியாது. மார்க்கத்தின் பார்வையில் எந்த ஒரு ஒப்பந்தமும் தெளிவாக இருக்க வேண்டும். இல்லையானால் அது ஏமாற்று வேலையாகவே கருதப்படும். விபத்து நடக்கவில்லையானால் நம்முடைய பணமும் சேர்ந்து மூழ்கி விடும். இப்படிப்பட்ட சூதாட்ட ஒப்பந்தத்தை மார்க்கம் ஒருபோதும் அனுமதிக்காது. இன்று வாகனங்கள் வாங்கினால் மோட்டார் வாகனச் சட்டப்படி இன்ஷுர் செய்யாமல் சாலையில் ஓட்டவே முடியாது. இது போன்று சட்டரீதியான நிர்பந்தம் இருக்கும் பட்சத்தில் இன்ஷுர் செய்து கொள்ளலாம். இது போன்ற சமயத்தில் பாதிப்பு ஏற்படும் போது நாம் செலுத்திய பிரீமியத் தொகையை விட நிறுவனம் கொடுக்கும் அதிகப்படியான தொகையை, அனுபவித்துக் கொள்ள அனுமதி கிடையாது.                                                                   (நூல்:இஸ்லாம் அவ்ர் ஜதீத் மஆஷீ மஸாயில்- 3/317)