உடலுறுப்பு தானம் - இஸ்லாமியப் பார்வையில்

அக்டோபர் மாதம் 14 ஆம் தேதியை உலக உடல் உறுப்பு தானம் தினமாக அனுஷ்டிக்கப்படுகிறது. உடல் உறுப்பு தானத்தை வலியுறுத்தி 2005 ஆம் ஆண்டிலிருந்து இந்த தினம் கொண்டாடப்படுகிறது.

உடல்உறுப்பு தானம் தான் உலகில் ஆகச்சிறந்த தானமாக வலியுறுத்தப்படும் அதே நேரத்தில் உடலுறுப்பு விற்பனையின் கோரமுகத்தையும் சிந்திக்க வேண்டியுள்ளது. ஸ்கார்ட் கார்னி என்ற அமெரிக்கப் பத்திரிக்கையாளர், தி ரெட் மார்க்கெட், என்றொரு நூலை எழுதியுள்ளார். உலகம் முழுவதும் மனித உறுப்புகளின் களவு, விற்பனை, மோசடி குறிப்பாக மூன்றாம் உலக நாடுகளில் வாழும் ஏழை மக்களை ஏமாற்றி அவர்களுடைய உடல் பாகங்களைத் திருடும் இதயம் இல்லா பன்னாட்டு நிறுவன வியாபாரிகளைப் பற்றி விரிவாகப் பேசுகின்றது, தி ரெட் மார்க்கட்.

எல்லாவற்றையும்விட இந்தப் புத்தகம் நமக்குத் தரும் முக்கியமான செய்தி, உடல் உறுப்பு மாற்று அறுவை சிகிச்சையே தேவையில்லை என்பதுதான். ஒருவர் உறுப்பு மாற்று அறுவைசிகிச்சை செய்துகொண்டால், கூடுதலாகச் சில காலம் மட்டுமே வாழ முடியும். ஆனால் அறுவைசிகிச்சைக்குப் பிறகும் அவருக்கு வேறு பிரச்சினைகள் வரலாம். மாறாக, அறுவைசிகிச்சை செய்துகொள்ளாமல் மருந்து, மாத்திரைகளையே தொடரலாம்.

சென்னையைச் சேர்ந்த ஒரு பெண்மணி தன்னுடைய கணவனை சுனாமியில் பறிகொடுத்து விட்டு தன்னுடைய மகளின் வரதட்சணைக்காக 1000 டாலர்கள் பெற்று கிட்னியை விற்றார். அவரால் இன்றுவரை சரிவர வேலை செய்யவியலாமல் தவிக்கிறார். கிட்னியின் சந்தை விலை சுமார் 15,000 டாலருககும் அதிகம். தி ரெட் மார்க்கட் என்ற நூல் உடலுறுப்பின் வியாபரச்சந்தை பற்றிய உண்மைகளை புள்ளிவிபரத்துடன் வெளியிட்டிருக்கும் நிலையில் தான் உடலுறுப்பு தான தினத்தை கொண்டாடிக் கொண்டிருக்கிறோம்.

உறுப்பு தானங்களின் வகைகள்:

மருத்துவ உலகில் மூன்று விதமாக உறுப்பு தானங்கள் நடைபெறுகின்றன. 1. ஆரோக்கியமாக இருக்கும் ஒருவர் பாதிக்கப்பட்டவருக்கு ஒரு சிறுநீரகம் அல்லது கல்லீரலின் ஒரு பகுதி போன்ற உறுப்புகளைத் தானம் செய்ய முடியும். இரத்த தானமும் செய்யலாம்.  2. இயற்கை மரணமடைந்த ஒருவரின் விழித்திரை, தோல், எலும்பு, இதய வால்வுகள் ஆகியவற்றை கொடையாக அளிக்கலாம்.  தானம் கொடுப்பவரின் ஆயுள் முடிந்து, ஆறு மணி நேரத்திற்குள் கண்கள் எடுக்கப்பட வேண்டும். 3. மூளைச்சாவு அடைந்த  ஒருவரின் சிறுநீரகங்கள் நுரையீரல், குடல், இதயம், கணையம், கல்லீரல்,  கண்கள் (கார்னியா எனப்படும் விழித்திரை உள்பட 37 உறுப்புக்களையும் திசுக்களையும் தானம் செய்ய முடியும்.  இதயம், கல்லீரல், நுரையீரல் போன்றவை மூளைச்சாவு ஏற்பட்டு உயிர் மட்டும் ஊசலாடிக் கொண்டிருக்கும் நோயாளிகளிடமிருந்து எடுத்தால் மட்டுமே பயன்படும்.

உலகில் உள்ள எல்லா படைப்புகளையும் விட மனிதனை கண்ணியமாகவும் சிறப்புக்குரியவனாகவும் அல்லாஹ் படைத்துள்ளான். மனிதனுக்கு வியாதி ஏற்பட்டால் உலகில் உள்ள அனைத்து படைப்புகளிலிருந்தும் மருந்தை எடுத்துக்கொள்ளலாம். நிர்பந்த நிலையில் இறந்தவற்றையும் இரத்தத்தையும் கூட பயன்படுத்திக் கொள்ளலாம். ஆனால், மற்ற உயிரினங்களுக்கு மனிதனுடைய எந்தப் பகுதியையும் அனுபவிக்க முடியாது.  இறைநம்பிக்கையாளர்கள்அனைவரும் சகோதரர்கள் என்று குர்ஆன் கூறுகிறது. முஃமின்கள் அனைவரும் ஒரே உடலைப் போல, என்று நபி (ஸல்) அவர்கள் கூறியுள்ளார்கள். ஒருவருக்கொருவர் உதவி செய்வது எல்லா தரப்பினரிடமும் பாராட்டத்தக்க செயல். எனினும் உதவி செய்வதற்குரிய வரையறை என்னவென்பதையும் கவனிக்க வேண்டும்.

மூளைச்சாவுக்குப்பின் தானம்?:

நவீன மருத்துவம் மரணத்தை இரண்டாகப் பிரிக்கிறது:

மூச்சு நிற்பது:

ஒருவரின் மூச்சு சுவாசம் நின்ற 15 நிமிடத்திற்குப் பிறகு ஒருவரை பிழைக்க வைக்க முடியாது.

மூளைச்சாவு:

மூளைச்சாவு என்ற நிலையை 1959 ஆண்டு இரண்டு ஃப்ரஞ்ச் மருத்துவர்கள் கண்டுபிடிக்கும் வரை பெரும்பாலும் இதயத்துடிப்பும் சுவாசமும் நின்று போவது மட்டுமே மரணமாக கருதப்பட்டன. ஒரு நோயாளி எவ்விதத் தூண்டலையும் ஏற்றுக்கொள்ளாத பதில் வினையாற்றாத கரேனியல் ரெஃப்லக்ஸஸ் இல்லாத செயற்கை சுவாசக் கருவியை நீக்கிய பின்னர் மூன்று நிமிடங்கள் தன்னியல்பாக சுவாசிக்க முயலாத முழுமையான கோமா நிலையில் இருப்பதே மூளைச்சாவு என்று 1968 ஆம் ஆண்டு வரையறுக்கப்பட்டது. இந்தியாவில் 1994 ஆம் ஆண்டு மூளைச்சாவு சட்டப்பூர்வ மரணமாக ஏற்றுக்கொள்ளப்பட்டது. 

மூளைச்சாவு முழுச்சாவா?

சட்டப்படி இதற்குப் பிறகு உயிர் பிழைக்க வாய்ப்பே இல்லை, என்பதால் தான் மக்கள் உறுப்பு தானத்துக்கு சம்மதிக்கின்றனர்.  ஆனால் மூளைச்சாவு நிலையை அடைந்தவருக்கு தொடர்ந்து சிகிச்சை அளித்தால் அவர் உயிர் பிழைக்கலாம் எனற மாற்றுக்கருத்துகளும் விவாதிக்கப்படாமல் இலலை.  எது மூளைச்சாவு? என்பதை நிர்ணயிப்பதில் அறிவியல் முன்னேற்றம் அடைந்த நாடுகளுக்கிடையிலேயே கருத்தொற்றுமை இல்லை. பெருமூளை, சிறுமூளை, மூளைத்தண்டு என மூளை முழுவதும் இறந்தால் தான் மூளைச்சாவு என்கிறது அமெரிக்கச் சட்டம். ஆனால், மூளைத்தண்டு இறந்தாலே மூளைச்சாவுதான், என்கிறது இங்கிலாந்தின் சட்டம். இந்தியாவும் இங்கிலாந்தையே பின்பற்றுகிறது. ஏன் இந்த குழப்பம்?

அமெரிக்காவிலும் இங்கிலாந்திலும் மூனைச்சாவு என்று முடிவு செய்யப்பட்டு உடல் உறுப்புக்களை அகற்ற மருத்துவர்கள் தயாராகும் போது உயிர்பிழைத்து வாழ்ந்தவர்களின் சம்பவங்களும் உண்டு. தானம் என்ற பெயரில் மருத்துவமனைகள் பணம் சம்பாதித்துக் கொண்டிருக்கின்றன. அரசு ஆஸ்பத்திரியில் பெறப்பட்ட இதயத்தை தனியார் மருத்துவமனைக்கு கொண்டு வரவேண்டிய அவசியமென்ன? அரசு மருத்துவமனையில் தேவையுள்ளவர்கள் யாருமே இல்லையா?

மூளைச்சாவு அடைந்தவர்களின் இரத்த ஓட்டம் சிறுமாற்றத்துடன் சீராக இருக்கும். மூளையைத் தவிர மற்ற உறுப்புக்கள் சீராக இயங்கிக் கொண்டிருக்கும். எனவே, மலஜலம் வெளியாவது நிற்பதில்லை. உறுப்புக்களை அகற்றும் போது மயக்க மருந்து கொடுக்கப்படுகிறது. இறந்துவிட்டால் எதற்காக மயக்க மருந்து கொடுக்க வேண்டும்?

இப்படி இருக்கும் நிலையில் மூளைச்சாவு என்பதை மரணமாக ஏற்றுக்கொள்ளவே முடியாது.  மூளைச்சாவு மரணமாகாது என்றே ராபிததுல் ஆலமில் இஸ்லாமீ போன்ற சர்வதேச கூட்டமைப்புகள் உட்பட உலகின் பல ஆய்வுக்குழுக்களும் இந்திய இஸ்லாமிக் ஃபிக்ஹ் அகாடமியும் தீர்ப்பு கூறியுள்ளது. அப்படியானால் மூளைச்சாவுக்குப் பின் உறுப்பு தானத்திற்காக உறுப்புக்களை வெட்டி எடுப்பது கொலை செய்வதற்குச் சமமாகிவிடும். அநியாயமாக ஓர் உயிர் கொல்லப்படுவதை குர்ஆனும் நபிமொழியும் பகிரங்கமாக தடைசெய்திருக்கிறது.

எனவே மூளைச்சாவுக்குப் பின் உறுப்பு தானம் என்பது மார்க்கத்தில் அனுமதிக்கப் பட்டதாக ஆக முடியாது. யாரும் தன்னுடைய மூளைச்சாவுக்குப்பின் உறுப்புக்களை எடுத்துக கொள்ளலாம், என்று உயில் - வஸிய்யத்தும் செய்ய முடியாது. அந்த வஸிய்யத் மார்ககத்தின் பார்வையில் நிறைவேற்றப்பட வேண்டிய வஸிய்யத்தாக கருதப்படாது. (நூல்: அஹம் ஃபிக்ஹி ஃபைஸலே)

கண்ணியம் என்பது...:

அடுத்து உயிருடனிருக்கும் போதோ அல்லது இயற்கை மரணத்திற்குப் பிறகோ தானம் செய்வது பற்றி பார்ப்போம். இஸ்லாம் மனிதனை எல்லா வகையிலும் கண்ணியப்படுத்தியிருக்கிறது. அவனை கேவலப்படுத்தும் படியான எந்த காரியத்தையும் மார்க்கம் அனுமதிக்காது. அவனுடைய கண்ணியக் குறைவு என்பது இரண்டு விதத்தில் அமைந்திருக்கும். 1. அவனை உடல் ரீதியாகவோ மன ரீதியாகவோ துன்புறுத்தக்கூடாது. உயிருடன் இருக்கும் போது மட்டுமல்ல. இறந்த பிறகும் அவனை துன்புறுத்தக்கூடாது. மைய்யித்தின் எலும்பை உடைப்பது உயிருள்ளவனுடைய எலும்பை உடைப்பது போலத்தான், என்று நபி (ஸல்) அவர்கள் கூறியுள்ளார்கள். (அபூதாவூத் - 3209, இப்னுமாஜா - 1616) யுத்த களத்தில் கூட கொல்லப்பட்ட எதிரியின் உடலைஅங்ககீனம் செய்யக்கூடாது, என்று மார்க்கம் உத்தரவிட்டுள்ளது. 2. மனிதனுடைய எந்த பாகத்தையும் பயன்படுத்தக்கூடாது. ஒட்டுமுடி உபயோகிப்பவர்களை நபி (ஸல்) அவர்கள் சபித்துள்ளார்கள். (புகாரீ)

எனினும் ஒட்டுமுடி உபயோகிப்பது அழகுக்காகத் தானே தவிர அவசியத்திற்காக அல்ல. மேலும் மனிதனை கேவலப்படுத்தும் எண்ணத்தில் அவ்வாறு செய்யக்கூடாது, என்பதே மார்க்கத்தின் தேட்டம். எனவே தான் முஃப்தீ கிஃபாயதுல்லாஹ் (ரஹ்) அவர்கள் இழிவுபடுத்தும் எண்ணமின்றி நிர்பந்த நிலையில் மனித பாகங்களை பயன்படுத்துவது கூடும் என்று கூறியுள்ளார்கள். (கிஃபாயதுல் முஃப்தீ- 1/155) தாய்ப்பாலை மருந்துக்காக மற்றவர்கள் உபயோகிப்பதும் மூக்கில் ஊற்றுவதும் கூடும், என்று அல்ஃபதாவல் ஹிந்திய்யாவில் கூறப்பட்டுள்ளது.

இறந்த உடலை துன்புறுத்தக்கூடாது. எனினும், கர்ப்பமுற்ற நிலையில் ஒரு பெண் மரணித்து குழந்தை உயிருடன் இருப்பது தெரிந்தால் வயிற்றைப் பிளந்து குழந்தையை எடுத்துக் கொள்ளலாம். ஏனெனில் உயிருள்ள குழந்தையின் மகத்துவம் இறந்தவரை விட உயர்ந்தது, என்று அல்பஹ்ருர்ராயிக் உட்பட பல ஃபிக்ஹ் சட்ட நூற்களில் (நவீன முறையில் அறுவை சிகிச்சை இல்லாத காலத்திலேயே) கூறப்பட்டுள்ளது. உயிர் போகும் நிலையில் உள்ள ஒருவர் ஒரு இறந்த மனித உடலைத் தவிர வேறெதையும் பெற்றுக்கொள்ள வில்லையானால் அதைச் சாப்பிட்டாவது தன்னுடைய உயிரைப் பாதுகாத்துக் கொள்ள வேண்டும், என்று ஷாஃபியீ சட்ட நூற்களில் கூறப்பட்டுள்ளது. எனினும் தன்னுடைய உயிருக்கு ஆபத்து ஏற்படும் விதத்தில் மற்றொருவருக்கு உடலுறுப்பை தானம் செய்யக்கூடாது.  இந்த சட்டங்களின் அடிப்படையில் உடலுறுப்பு தானத்திற்கான தீர்வைப் பெற்றுக் கொள்ள முடியும்.

உயிருடனிருக்கும் போது  கிட்னி, கல்லீரல் தானம்:

ஒருவர் இறக்கும் நிலையிலுள்ள மற்றொருவருக்கு தன்னுடைய உடலிலிருந்து ஒரு பகுதியை வெட்டியெடுத்து அவருக்கு (சாப்பிட) கொடுப்பது கூடாது, என்று இமாம் நவவீ (ரஹ்) அவர்கள் கூறியுள்ளார்கள். (ரௌழா- 2/551) தனக்கு நஷ்டத்தை ஏற்படுத்தி ஆபத்தில் சிக்கிக் கொண்டு அடுத்தவருக்கு பசியாற்ற வேண்டிய அவசியமில்லை. எனினும் தனக்கு எந்தத் தீங்கும் நேரவில்லையானால் கூடும் என்றே சொல்ல வேண்டும்.

ஒருவருக்கு சிறுநீரகம் செயலிழந்து விட்டது. அவர் உயிருக்குப் போராடிக் கொண்டிருக்கிறார். யாராவது அவருக்கு கிட்னி கொடுத்தால் உயிர் பிழைத்து விடுவார், என்றும் அதைத் தவிர வேறு வழியில்லை, என்றும் மருத்துவர்கள் கூறுகின்றனர். மற்றொருவருக்கு இரண்டு கிட்னிகளும் சீராக செயல்படுகின்றன. அவற்றில் ஒன்றை பாதுகாப்பாக ஆப்ரேஷன் மூலம் அகற்றுவதால் இவருடைய உயிருக்கு ஆபத்தோ அல்லது பின்விளைவோ இல்லையானால் இந்த ஆரோக்கியமான நபர் தன்னுடைய ஒரு சிறுநீரகத்தை அந்த நோயாளிக்கு தானமாக கொடுக்கலாம். இந்த கிட்னி தானம் கூடும். விலைக்கு விற்கக் கூடாது, என்று அகில இந்திய இஸ்லாமிக் ஃபிக்ஹ் அகாடமி, தீர்ப்பு கூறியுள்ளது. இந்த நிர்பந்த சூழ்நிலையின்றி, யாருக்காவது கிட்னி தேவைப்படலாம், என்ற யூகத்தில் தானம் செய்யக் கூடாது. (கிதாபுல் ஃபதாவா 6/324- அஹம் ஃபிக்ஹி ஃபைஸலே)

உயிருடனிருப்பவர் கல்லீரலை தானம் செய்தால் அவருக்கு எந்த பாதிப்பும் ஏற்படாது. சிறிது காலத்தில் அது வளர்ந்து விடும். எனவே, கல்லீரல் தானம் செய்வது கூடும் என்று சமீத்தில் நடந்த இந்திய இஸ்லாமிக் ஃபிக்ஹ் அகாடமியின் செமினாரில் முடிவு செய்யப்பட்டது.

இரத்த தானம்:

இரத்தம் ஹராம் என்று குர்ஆனில் தெளிவாகவே கூறப்பட்டுள்ளது. அது நஜிஸ்- அசுதத்தமானது, என்பதில் மாற்றுக்கருத்து கிடையாது. எனவே, சாதாரண நிலையில் அதை அருந்துவதோ அதன்மூலம் சிகிச்சை செய்வதோ கூடாது, என்பதில் சந்தேகமில்லை. எனினும் இரத்தம் ஏற்றுவதைத் தவிர வேறு வழி இல்லை என்கிற பட்சத்தில் நிர்பந்த சூழலில் விலக்கப்பட்டதும் ஆகுமாகிவிடும், என்ற ஷரீஅத் சட்டப்படி இரத்தம் ஏற்றிக்கொள்ளலாம். இமாம் நவவீ (ரஹ்) அவர்கள் ரவ்ளதுத்தாலிபீன் என்ற நூலில் (1/381) நிர்பந்த நிலையில் தன்னுடைய உடலின் ஒரு இடத்தைப் பிளந்து அவ்விடத்தில் இரத்தத்தை வைக்கலாம், என்று கூறியுள்ளார்கள்.

ஃபதாவா ஹிந்திய்யா (4/355) விலும் நோய் குணமாகும் என்று (நம்பத்தகுந்த திறமையான டாக்டர்) உறுதியாகக் கருதினால் இரத்தத்தைக் கொண்டு சிகிச்சை செய்யலாம், என்று கூறபப்பட்டுள்ளது. இரத்தம் கொடுப்பதால் தனக்கு எந்த ஆபத்தும் இல்லாத சூழலில் நோயாளிக்கு இரத்தம் தேவைப்படுகிற நிர்பந்த நிலையில் அதன் மூலம் நோயாளி குணமடைவார், என்பதில் பலமான நம்பிக்கை இருக்கும் போது (நிபந்தனைகளுக்குட்பட்டு) இரத்தம் கொடுத்து சிகிச்சை செய்து கொள்ளலாம். (ஜவாஹிருல் ஃபிக்ஹ் - 5/181 - முஃப்தீ ஷஃபீ ரஹ்)

தாய்ப்பாலை மற்றவர்கள் மருந்துக்காக பயன்படுத்திக் கொள்ளலாம். அவ்வாறே இரத்தத்தையும் பயன்படுத்திக் கொள்ளலாம்.இரத்தம் மற்ற உறுப்புக்களைப் போன்று அல்ல. இப்பொழுது இரத்தம் எடுக்கப்பட்டால் உடனே புதிய இரத்தம் உருவாகிவிடும். இப்படி இரத்தத்தை வெளியேற்றுவதால் பாதிப்பு இல்லை, என்பதை விட இரத்தம் கொடுப்பவருக்கு ஆரோக்கியமானது, என்றே கூறப்படுகிறது. எனவே, மற்ற உறுப்புக்கள் தானத்தைப் போல இதைக் கூடாது, என்று சொல்ல வேண்டிய அவசியமில்லை.

விந்தணு மற்றும் கருமுட்டை தானம்:

தன்னுடைய மகள் குழந்தை பெற்றெடுக்க முடியாது என்ற நிலையில் ஒரு தாய் தன்னுடைய கருமுட்டையை தானமாக வழங்குவதும் நடக்கிறது. 20 ஆண்டுகள் முதல் 25 ஆண்டுகள் வரை அந்த கருமுட்டையைப் பாதுகாக்க முடியும். இன்று விந்தணுக்களை சேமிக்கும் வங்கிகளும் உருவாகிவிட்டன. ஆனால் இது போன்ற தானங்களை மார்க்கம் அனுமதிக்காது. ஏனெனில் இதனால் குடும்ப அமைப்பே சீர்குலைந்து விடும். இரத்த உறவும் குழம்பிப் போய்விடும். 

இயற்கை மரணத்திற்குப் பிறகான தானம்:

மரணத்திற்குப் பின் தானம் செய்வதில் பல நிலைகளை ஆராய வேண்டும். முதலாவது: நாம் யாருக்கு தானமாகக் கொடுக்கிறோம்? கிட்னி தானம் செய்யும் போது நோயாளி கண்முன் இருக்கிறார். ஆனால், மரணத்திற்கு முன் எழுதப்படும் உயில் அப்படியில்லை. மரணத்திற்குப் பின் யாருக்காவது போய் சேரும் என்ற யூகத்தில் தான் தானம் நடைபெறுகிறது. இன்று மனித உறுப்புக்காக காத்துக் கொண்டிருப்பவர்கள் நிறைய பேர் இருக்கிறார்கள் என்று கூறுவது காதில் விழுகிறது.

எனினும் சட்டம் என்பது தெளிவாகவும் துல்லியமாகவும் இருக்க வேண்டுமென்பது சட்டவிதி. இரண்டாவது: உறுப்பு மாற்று அறுவை சிகிச்சை என்பது (செயற்கை உறுப்பு, மிருக உறுப்பு, தன்னுடைய சொந்த உறுப்பு போன்ற எதுவுமே பொருந்தி வராத) நிர்பந்த நிலையில் தான் கூடும். மிருக உறுப்பு மாற்று சிகிச்சை வெற்றி பெறவில்லை, என்றாலும் அதில் ஆராய்ச்சி தொடர்கிறது.

தவிர மனிதனுடைய திசுவை எடுத்து புத்துறுப்பாக்கம் என்ற முறையில் மனித உறுப்புக்களை உருவாக்கும் முயற்சியும் நடந்து கொண்டிருக்கிறது. காது, மூக்கு போன்ற வெளி உறுப்புக்களில் ஓரளவு வெற்றி கிடைத்துள்ளது. உள் உறுப்புக்கள் ஆராய்ச்சியில் உள்ளது. செயற்கை கணையம் செய்வதில் ஆய்வு நடைபெறுகிறது. சமீபத்தில் முதன்முதலாக சிட்னியில் நான்கு வயது சிறுவனுக்கு செயற்கை கணையம் பொருத்தப்பட்ட தகவல் பத்திரிக்கையில் வெளியானது. இப்படி தன்னுடைய உடலிலிருந்தே புத்துறுப்பாக்க முறையில் உறுப்புகள் தயாராகி விட்டால் மற்றவர்களுடைய உறுப்புக்களை பயன்படுத்துவது ஹராமாகிவிடும். தானம் செய்து பல ஆண்டுகளுக்குப் பிறகு உறுப்புக்களை அகற்றும்போது கூறப்பட்ட நிர்பந்த நிலை இருக்குமா? இருக்காதா? என்பது யூகமே!

மூன்றாவது: மரணத்திற்குப் பின் அகற்றப்படும் மனித உறுப்புக்கள் தேவைப்படுபவருக்கு (வெற்றிகரமாகவும் பின்விளைவின்றியும்) முழுமையாக ஒத்துப் போகுமா? என்பதும் கேள்விக்குறி. எல்லோரும் நினைப்பது போல் உறுப்பு மாற்று சிகிச்சை என்பது அவ்வளவு சாதாரண காரியமல்ல. மாற்று இதயம் பொருத்தப் பட்டவர்களில் 80 சதவீதம் பேர் ஒரு வருடம் தான் வாழ்கின்றனர் என்றும், ஏதோ ஓரிருவர் மடடுமே 15 வருடத்திற்கும் அதிகமாக வாழ்வதாகவும் ஆய்வுகள் கூறுகின்றன. சிலருக்கு மாற்று இதயம் ஒத்துவரவே செய்யாது. அல்லது, இரத்தக்குழாய் நோய்கள் போன்ற பயங்கர பின்விளைவுகள் ஏற்படும். உறுப்புக்களை கொடுப்பவருக்கும், பெறுபவருக்கும் இரத்தத்தில் உள்ள ழடுஹ அன்டிஜீன்கள் ஒத்துப்போக வேண்டும்.அப்போது தான் நீண்ட நாட்கள் தானம் தரப்பட்ட உறுப்பு சிறப்பாக செயல்படும். நிர்பந்த நிலையில் பயன்படுத்தப்பட வேண்டிய மனித உறுப்புகள் இது போன்ற பல யூகங்கள் இருக்கும் போது எந்த நிபந்தனையுமின்றி பொதுவாக அனைவரும் ஜீவிய காலத்தில் உறுப்பு தானம் செய்யலாம், என்று எப்படிச் சொல்ல முடியும்? மாற்று உறுப்பு ஏதாவது ஒரு வழியில் கிடைத்தால் மருந்தைப் போல் பயன்படுத்திக் கொள்ளலாம். அதற்காக தானம் செய்ய முடியாது.

கண்தானம்:

இஸ்லாமிய நாடுகளில் கண்தானம் கூடும், என்று ஃபத்வா கொடுக்கப்பட்டிருந்தாலும் இந்தியாவின் சூழ்நிலை குறித்து மார்க்க அறிஞர்களுக்கிடையே கருத்து வேறுபாடு ஏற்பட்டதால் கண் தானம் விஷயத்தில் ஃபிக்ஹ் அகாடமி எந்த முடிவும் செய்யாமல் தன்னுடைய முடிவை ஒத்திவைத்திருக்கிறது. இன்று உறுப்பு தானத்தில் தான் முழு மனிதாபிமானமும் புதைந்து கிடப்பது போல் பேசப்படுகிறது.

வாழும் வரை மனிதாபிமானம் செத்துக் கொண்டிருக்கிறது. மனிதன் சாகும் போது மட்டும் மனிதாபிமானம் பற்றிப் பேசுகிறார்கள். தனக்கு தண்ணீர் தேவையிருந்தும் மற்றவருக்கு தண்ணீர் தந்து உதவி தன் உயிரை தியாகம் செய்து வரலாறு படைத்த சமுதாயம் முஸ்லிம் சமுதாயம். அவர்களுக்கு மனிதாபிமானம் பற்றி யாரும் பாடம் நடத்தத் தேவையில்லை.

பொதுசிவில் சட்டம் - podu civil sattam

பொதுசிவில் சட்டம் - podu civil sattam

இந்நூல் பற்றி...

இஸ்லாமிய சட்டங்கள் அனைத்துமே முஸ்லிம்களால் ஏற்று அமல் செய்யப்பட வேண்டியவையே! எனினும் இஸ்லாமிய கிலாஃபத் (ஆட்சி) இல்லாததால் குற்றவியல் சட்டங்களில் இஸ்லாமிய சட்டங்களைப் பின்பற்ற முடியவில்லை. 

பொருளாதாரம் தொடர்பான எல்லா சட்டங்களிலும் முஸ்லிம்கள் இஸ்லாமிய சட்டங்களையே பின்பற்ற வேண்டும். எனினும் அதில் ஏற்படும் பிரச்சினையைத் தீர்ப்பதற்கு இந்திய நீதிமன்றத்திற்கு வழக்கை எடுத்துச் சென்றால் இஸ்லாமிய சட்டங்களின் அடிப்படையிலேயே அவற்றுக்கு தீர்ப்பு வழங்க வேண்டுமென்று நீதிமன்றங்களை நிர்பந்திக்க முடியாது. 

ஏனெனில், பொருளாதார ஒப்பந்தங்கள் முஸ்லிம்களுக்கிடையில் மட்டுமே நிகழாது. முஸ்லிம் அல்லாதவர்களுடனும் கொடுக்கல் வாங்கல் ஒப்பந்தம் நடைபெறலாம். 

ஆனால், திருமணம், விவாகரத்து, குலா, வாரிசுரிமை,போன்றவை முஸ்லிம்களுக்கு மத்தியில் மட்டுமே நடைபெறும் ஒப்பந்தங்களாகும். எனவே, இந்த விவகாரங்களை முடிந்தவரை முஸ்லிம்கள் தங்களுடைய ஜமாஅத்திற்கு கட்டுப்பட்டு தீர்த்துக்கொள்ள வேண்டும். எக்காரணம் கொண்டும் நீதிமன்றங்களுக்கு செல்லக்கூடாது. அப்படியே சென்றாலும் நீதிமன்றங்கள் இந்த பிரச்சினைகளுக்கு இஸ்லாமிய சட்டங்களின் படியே தீர்ப்பு வழங்க வேண்டும். இது தான் இன்று வரை உள்ள இந்திய வராலற்றின் நிலைபாடு. 

ஆனால், இஸ்லாத்தின் எதிரிகள் இந்த நிலையை மாற்றவேண்டுமென்று துடிக்கின்றனர். குறிப்பாக, தற்போது ஆட்சியமைத்துள்ள கட்சி பொதுசிவில் சட்டம் கொண்டு வரவேண்டுமென்பதை தன்னுடைய தேர்தல் அறிக்கையிலேயே பகிரங்கப்படுத் தியுள்ளது. மக்கள் இதற்காக ஆட்சியை இவர்களுடைய கையில் வழங்கவில்லை, என்பதை ஞாபகத்தில் வைக்க வேண்டும்.

ஆனால், முஸ்லிம்கள் எக்காரணம் கொண்டும் தங்களுடைய தனியார் சட்டத்தை விட்டுவிட்டு பொது சிவில் சட்டத்தை ஏற்றுக் கொள்ளமாட்டார்கள். ஏற்றுக்கொள்ளவும் கூடாது. அது ஏன் என்பதைத் தான் இந்த சிறிய நூல் விளக்குகிறது. 

பொது சிவில் சட்டத்தின் ஆபத்தான விளைவுகள் என்ன?என்பதையும் பொதுசிவில் சட்டத்தை முஸ்லிம்கள் ஏற்றுக்கொண்டால் அது எவ்வாறு முஸ்லிம்களை படிப்படியாக இஸ்லாத்தை விட்டும் வெளியேற்றிவிடும் என்பதைப் பற்றியும் இந்நூல் விளக்குகிறது. 2003 ஆம் ஆண்டிலேயே இந்நூல் தொகுக்கப்பட்டு பெருபாலும் நிறைவுற்றிருந்தது. எனினும், அது அச்சாக முடியவில்லை. இப்பொழுது அல்லாஹ்வின் கிருபையால் தேவையான திருத்தங்களுடனும் அதிகப்படியான தகவல்களுடனும் வெளியாகிறது. அல்லாஹ் இந்நூலின் மூலம் தொகுத்தவனுக்கும் படிப்பவர்களுக்கும் நிறைவான இறைநம்பிக்கையுயம் நிரந்தரமான இக்லாஸ் எனும் மனத்தூய்மையையும் தந்தருள்வானாக!

முஸ்லிம்களுக்கு தனியார் சட்டம் ஏன்?

முஸ்லிம்கள் ஒரே இறைவனைக் கொண்டு விசுவாசம் கொண்டவர்கள். அவன் நாடியது மட்டுமே நடக்கும். அவனுடைய வல்லமைக்கு உட்பட்டே நடக்கும், என்பதன் மீதும் அழுத்தமான ஆழமான நம்பிக்கை கொண்டவர்கள்.

ஒரு புறம் அநியாயக்கார ஆட்சியாளர்களை விட்டும் அல்லாஹ்விடம் பாதுகாப்பு தேடிக்கொண்டிருக்க வேண்டும். மறுபுறம், நம்முடைய மார்க்கப்பற்றை மழுங்காமல் பார்த்துக்கொள்ள வேண்டும். பல சோதனைகளைக் கடந்து எழுந்து நிற்கக்கூடிய மார்க்கம் இஸ்லாம். எதிரிகள் தொடுக்கும் எந்தத் தாக்குதலையும் சத்துணவாக எடுத்துக் கொண்டு சத்தியத்தை பறைசாற்றிக் கொண்டிருக்கும் மார்க்கம் இஸ்லாம். 

இஸ்லாமியர்கள் என்ற காரணத்திற்காகவே கோடிக்கணக்கான முஸ்லிம்கள் கொல்லப்பட்ட சரித்திரங்கள் உண்டு. ஆனாலும் இஸ்லாம் மடியவில்லை. முஸ்லிம்கள் ஈமான் எனும் இறைநம்பிக்கையையும் இழக்கவில்லை. இஸ்லாத்தின் மீது தொடுக்கப்பட்ட தாக்குதலைப் போன்று வேறு கொள்கையின் மீது தொடுக்கப்படிருந்தால் அவை வேரோடும் வேரடி மண்ணோடும் பிடுங்ப்பட்டு எங்கோ தூக்கி எறியப்பட்டிருக்கும். 

முஸ்லிம்களுக்கு முன்னால் முக்கியமாக எழுந்து நிற்கும் பிரச்சினை பொதுசிவில் சட்டப் பிரச்சினை தான். இந்திய முஸ்லிம்கள் தங்களின் உயிர் போனாலும் தங்களுடைய சட்டத்தை விட்டுக்கொடுக்கத் தயாரில்லை, என்பதை நிரூபித்த நிகழ்வுகளை சரித்திரம் நெடுகக் காணமுடியும். முஸ்லிம்கள் தங்களுடைய தனியார் சட்டத்தை விட்டுக்கொடுப்பது தங்களுயை ஈமானை - இஸ்லாத்தை விடுவதற்குச் சமம்.

பொதுசிவில் சட்டத்தினால் தேசிய ஒருமைப்பாட்டை ஏற்படுத்துவதே நோக்கம், என்று சொல்வதெல்லாம் முழுப்பொய். முஸ்லிம்கள் 800 ஆண்டு காலமாக ஆட்சி செய்த ஸ்பெயினில் முஸ்லிம்களின் தனித்தன்மையை அழிக்க அவர்கள் முதன் முதலில் கை வைத்தது முஸ்லிம்களின் திருமண முறையில் தான். முதலில் இஸ்லாமிய முறைப்படி பதிவு செய்யப்பட்ட திருமணங்கள் மீண்டும் அரசாங்கத்தில் பதிவு செய்யப்பட்டால் தான் அவை அங்கீகரிக்கப்படும், என்றார்கள். பின்னர், இஸ்லாமிய முறைப்படி பதிவு செய்யப்பட்ட திருமணங்கள் செல்லாது. அரசாங்க முறைப்படி அரசாங்கத்தின் முன் பதிவு செய்யப்பட்ட திருமணங்கள் தான் செல்லும், எனச் சட்டம் கொண்டுவந்தனர்.

பொதுசிவில் சட்த்தின் படி நம்முடைய குடும்ப உறவை அமைத்துக் கொண்டால் நம்முடைய குடும்ப உறவு சின்னாபின்னமாகி விடும். நம்முடைய பொருளாதாரம் பொருளற்றதாகிவிடும். அரசு ரிஜிஸ்டரில் பதிவு செய்தால் மட்டுமே நிகாஹ் செல்லுபடியாகும், என்று சொல்லலாம். இதனால் மார்க்க முறைப்படி சாட்சிகளுடன் செய்த திருமண ஒப்பந்தம் செல்லாததாகிவிடும். நம்முடைய திருமண ஒப்பந்தத்தை உறுதியான உடன்படிக்கை என்று குர்ஆன் வருணிக்கிறது. அந்த உடன்படிக்கையை முறிப்பதற்கு யாருக்கும் அதிகாரமில்லை. ஆனால் நாட்டுச்சட்டம் அதை திருமணமாகவே ஏற்றுக்கொள்ளாவிட்டால் சட்டத்தைப் பயன்படுத்திக் கொண்டு அந்த பெண் வேறு ஆணை திருமணம் செய்து கொள்வார். ஏற்கனவே திருமணம் செய்யப்பட்ட பெண் மற்றொரு திருமணம் செய்வது குர்ஆனில் பகிரங்கமாக தடை செய்யப்பட்டுள்ளது. பதிவேட்டில் பதிவு செய்யப்பட்டால் மட்டும் போதுமானது, என்று சட்டமாக்கபபட்டால் காதல் திருமணம் அதிகமாகிவிடும். அதுமட்டுமல்ல, மார்க்க முறைப்படி இரண்டு சாட்சிகள், ஈஜாப் கபூல் எனும் ஒப்பந்த நடைமுகைள் எதுவுமே இல்லாமலேயே கணவன் மனைவியாகி விடுவார்கள். ஆனால் இப்படி நடந்தால் மார்ககச்சட்டப்படி நிகாஹ் நடந்ததாகவே கருதப்படாது.

இப்படிப்பட்ட  தம்பதிகள் அதிகமாகிவிட்டால் சமூகத்தில் விபச்சாரம் தான் பெருகும். திருமணமின்றி குடும்பம் நடத்துவது விபச்சாரமில்லாம் வேறென்னவாக இருக்க முடியும்? அவ்வாறே தலாக் கொடுக்கும் உரிமையை நீதிமன்றம் எடுத்துக்கொள்ளும். இஸ்லாம் அந்த அதிகாரத்தை நீதிமன்றத்துக்குக் கொடுக்கவில்லை. கணவனுக்குத் தான் கொடுத்திருக்கிறது. கணவன் தலாக் கொடுக்காமலேயே இருவரையும் பிரித்து வைத்தால் மணமுறிவு ஏற்படவே செய்யாது. இந்நிலையில் கணவன் மார்க்க முறைப்படி தலாக் கொடுத்துவிட்டால் அந்த தலாக் செல்லுபடியாகிவிடும். இருவரும் பிரிந்துவிட வேண்டும். ஆனால், நீதிமன்றம் அந்த தலாக்கை செல்லாது என்று கூறலாம். அப்படிப்பட்ட சூழ்நிலையில் கணவன், மனைவியாக இல்லாத நிலையிலேயே சேர்ந்து வாழ வேண்டியதேற்படும். இதுவும் விபச்சாரம்.

பொது சிவில் சட்டம் இப்படி விபச்சாரத்திற்கு வழிவகுத்தால் நஸப் எனும் குடும்ப உறவே சீர்கெட்டுவிடும். யாருக்கு யார் மகன்? என்று தெரியாது. தந்தை இல்லாத பிள்ளைகள் அதிகரிப்பார்கள். தவறான உறவில் பிறந்தவன் தனக்கு தந்தையில்லாதவனை தந்தை என்று சொல்ல வேண்டியதேற்படும். இப்படி உறவுமுறையை வீணடிப்பது மார்க்கத்தில் கடுமையாக எச்சரிக்கப்பட்டுள்ளது. யார் தெரிந்து கொண்டே தந்தையில்லாத ஒரு நபரை தன்னுடைய தந்தை என்று வாதிடுகிறாரோ அவருக்கு சுவர்க்கம் ஹராம் - தடை செய்யப்பட்டுள்ளது, என்று நபி (ஸல்) அவர்கள் கூறினார்கள். (புகாரி) முஸ்லிம் ஷரீஃபுடைய மற்றொரு அறிவிப்பில் அவன் காஃபிராகி இறைநிராகரிப்பாளனாகி விட்டான், என்றும் கூறினார்கள்.

ஏனெனில், சொந்த உறவில் தான் ஜகாத், ஹஜ், திருமணம், வாரிசுரிமை உட்பட எல்லா சட்டமும் சம்மந்தப்படுகிறது. சொந்த உறவு பேணப்படவில்லையானால் மார்க்கத்தின் பெரும்பாலான சட்டங்களின்படி செயல்பட முடியாமல் போய்விடும். பொதுசிவில் சட்டத்தின் மூலம் நம்முடைய வாரிசுரிமை சட்டமும் பாதிக்கப்படலாம். இஸ்லாமிய வாரிசுரிமை சட்டத்தின் படி செயல்படுவது குடும்பத்தினர்களுடைய விருப்பத்திற்குட்பட்டதல்ல. மற்ற சட்டங்களைப் போல் கட்டாயம் அமுல்படுத்தப்பட வேண்டியவை. அவரவர் விருப்பப்படி சொத்துக்களை எடுத்துக் கொள்ளமுடியாது.

பாகப்பிரிவினையின் மூலம் கிடைக்கும் சொத்து மார்க்கம் குறிப்பிட்ட அளவுப்படி முறையான பங்கீடாக இருந்தால் மட்டுமே அது ஹலால் (அனுமதிக்கப்பட்டது) ஆகும். அதே சமயம் முறைகேடாகப் பங்கிட்டு அடுத்தவருக்குப் போக வேண்டிய பங்கு நமக்கு வந்தால் அது பத்துப் பைசாவாக இருந்தாலும் ஹராம் (தடை செய்யப்பட்டது) தான். இதை நாம் விளையாட்டாக எடுத்துக் கொள்ளக்கூடாது. நம்முடன் முடிவடையக் கூடிய பிரச்சினையல்ல இது. நம் மரணத்திற்குப் பின்பும் அந்த அந்த ஹராமான பணம் அல்லது நிலம், வீடு போன்றவை தலைமுறை தலைமுறையாக வாரிசுதாரர்களைச் சுற்றிக் கொண்டிருக்கும் அபாயத்திற்கு ஆளாக நேரிடும். அடுத்தவருடைய பூமியில் ஒரு சாண் அளவை அநியாயமாக எடுத்தாலும் மறுமை நாளில் அவனுக்கு ஏழு பூமியால் மாலை போடப்படும், என்று நபி (ஸல்) அவர்கள் எச்சரித்துள்ளார்கள். (புகாரி)

(எல்லாருடைய) வாரிசு சொத்துக்களையும் முழுமையாக நீங்களே விழுங்கி விடுகிறீர்கள். மேலும் செல்வத்தின் மீது அளவு கடந்த ஆசை கொண்டுள்ளீர்கள், என்று முறைகேடாகச் சொத்துக்களை அபகரித்துக் கொண்டவர்களை இழித்துப் பேசுகிறது இறைமறை. (89-19,29)

இதற்கு முன்னர் பல தடவை பொதுசிவில் சட்டத்தைக் கொண்டுவர அரசு முயன்றது. 1963 ஆம் ஆண்டு முஸ்லிம் தனியார் சட்டத்தை மாற்றுவதைப் பற்றி ஆராய்வதற்கும் அதைச் செயல்படுத்தும் வழிமுறைகளைக் கண்டறிவதற்கும் ஓர் ஆய்வுக்குழுவை நியமிக்க அரசு நாடியது. ஆனால், முஸ்லிம்களின் ஏகோபித்த எதிர்ப்பினால் இவ்வாய்வுக்குழு நியமிக்கப்படவில்லை. 1972 ஆம் ஆண்டில் வளர்ப்பு மகனுக்கு சொத்தில் பங்கு உண்டு, என்ற மசோதாவை நிறைவேற்றி அப்போதைய சட்ட அமைச்சர் மிஸ்டர் கோக்லே பொது சிவில் சட்டத்தை அமுல்படுத்த இது முதற்படி என்று கூறினார். அச்சமயம், மும்பையில் ஏறத்தாழ ஒரு லட்சம் முஸ்லிம்கள் கூடிய மாநாடு நடைபெற்றது. அப்து முஸ்லிம் தனியார் சட்ட வாரியம் நிறுவப்பட்டது. அந்த மசோதா அரசால் வாபஸ் பெறப்பட்டது. முஸ்லிம்களின் ஒற்றுமை எனும் பேராயுதம் முஸ்லிம் பெர்ஸனல் லாவைக் காப்பாற்றியது.

தேடப்பட வேண்டிய தலைப்பிறை

நோன்பு, பெருநாள், ஜகாத், ஹஜ், இத்தா போன்ற காலம் தொடர்பான அனைத்து மார்க்கச் சட்டங்களுக்கும் சந்திர மாதம் மற்றும் வருடம் தான் அடிப்படையாகக் கொள்ளப்பட  வேண்டும். தலைப்பிறை மூலம் தான் சந்திர மாதத்தின் துவக்கம் உறுதி செய்யப்பட வேண்டும்.

ஆண்டுக்கு ஒருமுறை ஜகாத் என்பது ஆங்கில மாதத்தின் அடிப்படையிலல்ல. சந்திர மாதத்தின் அடிப்படையில் தான் நிறைவேற்ற வேண்டும். அப்படி யாராவது தொடர்ந்து ஆங்கில மாதத்தின் அடிப்படையில் கொடுத்து வந்தால் 32 வருடங்களுக்குப் பிறகு ஒரு வருடம் ஜகாத் கொடுக்காத குற்றத்திற்கு ஆளாக நேரிடும். ஏனெனில் 32 சூரிய ஆண்டுகள் முடிந்தால் 33 சந்திர ஆண்டுகள் முடிந்திருக்கும்.

மார்க்கத்தின் பார்வையில் பதினைந்து வயதாகி விட்டால் அவரின் மீது மார்க்கத்தின் கடமைகள் கட்டாயமாகிவிடும். அவர் வயது வந்தவராகக் கருதப்படுவார். அந்த பதினைந்து வயது என்பதும் சூரிய ஆண்டின் கணக்கில் அல்ல, சந்திர ஆண்டின் படிதான் கணக்கிட வேண்டும். இதன்படி ஆங்கில வருடத்தின் பதினைந்து ஆண்டுகள் முடிவதற்கு 165 நாட்களுக்கு (ஐந்தரை மாதங்களுக்கு) முன்பாக சந்திர ஆண்டின் படி பதினைந்து வயதாகிவிடும். பிறந்தநாள் கொண்டாட்டம் என்பதே மார்க்கத்தில் சொல்லப்படாத ஒன்று. அதையும் கூட 11 நாட்கள் தாமதமாக முடியும், சூரியஆண்டின் கணக்கின் படி தான் கொண்டாடுகின்றனர்.

சந்திர ஆண்டு சூரிய ஆண்டை விட 11 நாட்களுக்கு முன்பாகவே முடிந்துவிடும். தங்களுடைய குழந்தைக்கு ஒர் ஆண்டு  பூர்த்தியாகி 11 நாட்களுக்குப் பிறகு தான் ஒரு வயது நிறைவடைந்ததாக பெற்றோர்கள் கருதிக் கொண்டிருக்கின்றனர். இன்று (மார்க்கத்தில் இல்லாத) பிறந்த நாளைக் கொண்டாடும் எத்தனை பேருக்கு தங்களுடைய பிறந்த நாளை சந்திர ஆண்டின் கணக்கின்படி சரியாகச் சொல்லத் தெரியும்?!

இந்நிலையில் ஒவ்வொரு மாதமும் தலைப்பிறையைச் சரியாக அறிந்து கொள்வது எவ்வளவு முக்கியத்துவம் வாய்ந்தது? என்பதை அறிந்து கொள்ள முடிகிறதா? ரமளான், இரு பெருநாட்கள் ஆகிய சமயத்தில் மட்டுமே தலைப்பிறை பற்றி பரவலாகப் பேசப்படுகிறது. மற்ற மாதங்களில் அதுபற்றி யாரும் கண்டு கொள்வதில்லை.

அடுத்த வருடம் பிரச்சினை வரும்போது அதுபற்றி பரபரப்பாகப் பேசப்படுகிறது. கடந்த வருடம் நோன்புப் பெருநாள் அண்டை நாடுகளான இலங்கை மற்றும் பாக்கிஸ்தானில் நம்மை விட ஒரு நாள் முன்பாகவே பிறைபார்த்து கொண்டாடப் பட்டுவிட்டது.

அவ்வாறே கடந்த ஹஜ்ஜுப் பெருநாளும் இலங்கையில் பிறை பார்க்கப் பட்டு நம்மைவிட ஒரு நாள் முன்பே கொண்டாடப் பட்டுவிட்டது. இலங்கை நமக்கு கிழக்கே இருக்கும் நாடாகும். கிழக்குப் பகுதியில் பிறை தென்பட்டால் மேற்குப் பகுதியில் இருப்பவர்கள் ஏற்று அமல் செய்ய வேண்டுமென்று நம்முடைய ஃபிக்ஹ் (சட்ட) நூற்களில் கூறப்பட்டுள்ளது. ஏனெனில், கிழக்கில் பிறை பார்க்கப்பட்டால் மேற்கில் கண்டிப்பாக பிறை தென்பட்டிருக்க வேண்டுமென்பதே இயல்பு. இலங்கையில் ஒவ்வொரு மாதமும் கரையோரப் பகுதிகள் உட்பட நாட்டின் பல பாகங்களில்  பிறை பார்ப்பதற்கான பொறுப்பாளர்கள் நியமிக்கப் படுகிறார்கள். அதற்கான ஏற்பாடுகளும் நினைவூட்டல்களும் அறிவிப்புகளும் ஒவ்வொரு மாதமும் நடைபெற்றுக் கொண்டிருக்கிறது.

கடந்த ஷவ்வால் மாதத்தில் நியூமூனுக்கும் மறுநாள் சூரியன் மறைவுக்கும் மத்தியில் 26 மணி நேரம் வித்தியாசம் இருந்தது. அன்று சூரியன் மறைவுக்கும் சந்திரன் மறைவுக்கும் மத்தியில் ஏறத்தாழ 50 நிமிடங்கள் வித்தியாசம் இருந்தது. விண்ணியல் ரீதியாக பிறை வெற்றுக்கண்ணுக்குத் தெரிவதற்கான சாத்தியம் பிரகாசமாக இருப்பதாகவே அறிவிக்கப்பட்டிருந்தது. ஆனாலும்,  இலங்கையில் பிறை பார்க்கப் பட்டிருக்கிறது. தமிழகத்தில் தென்படவில்லை.

அவ்வாறே கடந்த துல்ஹஜ் மாதத்தில், நியூமூனுக்கும் மறுநாள் சூரியன் மறைவுக்கும் மத்தியில் ஏறத்தாழ 28 மணி நேரம் வித்தியாசம் இருந்துள்ளது. அன்று சூரியன் மறைவுக்கும் சந்திரன் மறைவுக்கும் மத்தியில் ஏறத்தாழ 45 நிமிடங்கள் வித்தியாசம் இருந்துள்ளது. விண்ணியல் ரீதியாகவும் பிறை வெற்றுக்கண்ணுக்குத் தெரிவதற்கான சாத்தியம் பிரகாசமாக இருப்பதாகவே அறிவிக்கப்பட்டிருந்தது. ஆனாலும்,  இலங்கையில் பிறை பார்க்கப் பட்டிருக்கிறது. தமிழகத்தில் தென்படவில்லை.

பிறை தென்படாமல் போவதற்கு மேகமூட்டம் ஒன்று மட்டுமே காரணமாக இருந்தால் அதை நாம் ஒன்றும் செய்ய முடியாது. அதே சமயம், நம்முடைய பகுதிகளில் பிறை பார்ப்பதில் மக்கள் எந்த அளவுக்கு கவனம் செலுத்துகிறார்கள்? என்பதை யோசிக்க வேண்டும். அவ்வாறே ஒவ்வொரு மாதத்தலும் பிறை பார்ப்பதில் முக்கியத்துவம் காட்டப்படுகிறதா? என்பதையும் கவனத்தில் கொள்ள வேண்டும்.    

பொதுவாக (ரமளான், ஷவ்வால், துல்ஹஜ் ஆகிய மாதங்களில் மட்டும்) தலைப்பிறை பற்றி முடிவு செய்யும் போது நமக்கு அறிமுகமானவர்களிடம் போன் செய்து பிறைத் தகவல் பற்றி கேட்கிறோம். மற்றவர்களும் நம்மிடம் கேட்கிறார்கள். இதில் கேட்கப்படுபவர்கள் யாரும் பிறை பார்ப்தற்கான பொறுப்பாளர்களாக நியமிக்கப் பட்டவர்கள் அல்ல. ஏதாவது தகவல் வந்தால் அதன்படி முடிவு செய்து விடுகிறோம்.

ஒவ்வொரு மாதமும் பெருநகரங்களில் மட்டுமல்ல, ஒவ்வொரு கிராமத்திலும் குறிப்பாக மேற்குக் கரையோரங்களில் - கடற்கரைப் பகுதிகளில் குறிப்பிட்ட நேரத்தில் குறிப்பிட்ட இடத்தில் பிறை பார்ப்பதற்கு நியமிக்கப்பட்ட பொறுப்பாளர்கள் முன்னரே சென்று அதிமுக்கியத்துவம் கொடுத்து பிறை தென்படும் இடத்தைக் கூர்ந்து கவனிக்க வேண்டும். இப்படி தமிழகம் முழுவதும் பொறுப்பாளர்கள் ஒவ்வொரு மாதமும் பிறைபார்த்து அதற்கான தகவல்களை உடனுக்குடன் பகிர்ந்து கொள்ளும் போது (தகவல் தொழில் நுட்பம் வளர்ந்த இந்த காலத்தில்) பரவலாக ஏற்படும் பிறைக் குழப்பத்தை ஓரளவு தவிர்த்துக் கொள்ள முடியும்.

ஆனால், நடைமுறையில் கடற்கரைப் பகுதிகளில் சென்று ஒவ்வொரு மாதமும் பிறை பார்ப்பதில் அதிக கவனம் செலுத்தப் படுவதில்லை. ஏன்? இருந்த இடத்தில் இருந்து கொண்டு கூட அதில் கவனம் செலுத்துவது மிகவும் குறைவு என்றே சொல்ல வேண்டும். இப்படி தலைப்பிறை பார்ப்பதில் முக்கியத்துவம் கொடுக்க வேண்டுமென்று வலியுறுத்துபவர்களைக் கூட வேடிக்கையாகப் பார்ப்பது தான் காலசூழ்நிலை.

நாம் இருந்த இடத்திலேயே உயரமான கட்டிடங்களின் மேல் நின்று பிறை பார்ப்பதாக இருந்தால் கூட அதற்குரிய நேரத்தில் உடனடியாக அங்கு சென்றாக வேண்டும். சொல்லப்போனால் இரு குழுவாகப் பிரிந்து ஒரு குழுவினர் மக்ரிப் பாங்கு சொல்லப்படும் நேரத்திலிருந்து வானத்தைக் கவனிக்க வேண்டும். மற்றொரு குழு தொழுதுவிட்டு வந்தபின் அவர்கள் பிறை பார்க்கும் பொறுப்பை எடுத்துக் கொள்ள வேண்டும். ஏனெனில், மேற்கு நோக்கி மறையச் சென்று கொண்டிருக்கும் சந்திரன் (தலைப்பிறை) ஏதோ ஒரு நேரத்தில் தென்பட்டுவிட்டு பிறகு அடியில் இருக்கும் மேகத்திற்குள் மறைந்து விடலாம். அது தென்பட்டுக் கொண்டிருக்கும் அந்த நேரத்தில் நாம் பார்க்காவிட்டால் பிறகு வானத்தில் பிறை இருந்தும் மேகத்திற்குள் போய்விட்டதால் நாம் பார்க்க முடியாமல் போய்விடும்.

ஆனால், இன்று நாம் பாங்கு சொல்லி மக்ரிப் தொழுது முடித்துவிட்டு அதற்குப் பிறகு சுன்னத்தும் தொழூது முடித்த பிறகு தான் பிறை பார்க்க முற்படுகிறோம். உதாரணமாக, திண்டுக்கல்லில் செப்டம்பர் இரண்டாம் தேதி (துல்ஹஜ் மாதத்திற்கான பிறை பார்க்கப் படும் நாளன்று) சூரியன் மறைவு நேரம், மாலை 6 மணி 27 நிமிடங்களாகும். ஆனால், 6:35 மணிக்குத்தான் மக்ரிப் பாங்கு சொல்லப்படும். இந்நிலையில் பாங்கு முடிந்து ஃபர்ளு சுன்னத் தொழுகை முடிய ஏறத்தாழ 6:50 லிருந்து 6:55 வரை ஆகிவிடும். 6 மணி 27 நிமிடத்திலிருந்து பார்க்க வேண்டிய பிறையை ஏறத்தாழ 25 நிமிடங்களுக்குப் பிறகு தான் நாம் பார்க்க முற்படுகிறோம். அன்றைய தினம் சந்திரன் (தலைப்பிறை) மறையும் நேரம் இரவு 7 மணி 12 நிமிடங்களாகும்.  7:12 மணிக்கு மறையப்போகும் பிறையை 6:55 க்குப் பிறகு அதுவும் கடற்கரையில் அல்ல, மொட்டை மாடியில் நின்று கொண்டு வானத்தைப் பார்த்துக் கொண்டிருந்தால் எப்படி பிறை கண்ணுக்குத் தெரியும்?! அந்தப் பிறையோ நம் கண்ணுக்குப் புலப்படாத விதத்தில் அடிவானத்தில் இறங்கியிருக்கும்.

ஓசோன் படலம் பற்றி இஸ்லாம்

ஒவ்வோர் ஆண்டும் செப்டம்பர் 16 ஆம் தேதி உலக ஓசோன் தினமாகக் கொண்டாடப் பட்டு வருகிறது. எனினும், இதன் மூலம் எவ்வளவு லாபம் கிடைத்திருக்கிறது? என்பது கேள்விக்குறியே! இன்று ஓசோன் படலத்துக்கு எவற்றின் மூலமெல்லாம் ஆபத்து ஏற்படுகிறதோ அவற்றில் அதிகமான காரணிகள் நபி (ஸல்) அவர்களின் காலத்தில் இருக்கவில்லை.

அப்படிப்பட்ட நவீன சாதனங்கள் கண்டுபிடிக்கப் படவில்லை. எனினும், ஓசோனைப் பாதுகாப்பதற்கான அடிப்படையான வழிகாட்டல்கள் இஸ்லாத்தில் இல்லாமலில்லை. ஓசோன் ஓட்டையின் மூலம் உலகமே துன்பத்திற்குள்ளாகிறது. ஆனால், ஒரு பாதையில் கிடக்கும் தொல்லை தரும் பொருளை அகற்றுவதைக் கூட நபி (ஸல்) அவர்கள் ஈமான் எனும் இறைநம்பிக்கையின் கடைநிலை அந்தஸ்தாக அறிவித்திருக்கிறார்கள், என்றால் ஒட்டுமொத்த உலகின் பாதுகாப்புக்கு சவால் விடும் செயல்களை எப்படி இஸ்லாம் அங்கீகரிக்கும்?!

ஓசோன் படலம் என்பது...

1930-ம் ஆண்டு சிட்னிசாப்மேன் என்பவர் ஓசோனை கண்டறிந்தார். ஓசோன் என்பது மூன்று ஆக்ஸிஜன் அணுக்கள் சேர்ந்ததே ஒரு ஓசோன் துகள் ஆகும். ஓசோன் வாயுவானது படலமாக பூமியிலிருந்து 60 கிலோ மீட்டர் உயரம் வரை பரவி உள்ளது. 20 லிருந்து 25 கி. மீட்டர் வரையிலான உயரம் வரை மிக அடர்த்தியாக உள்ளது. இந்த ஓசோன் படலத்தின் முக்கிய பணி என்ன வென்றால் சூரிய ஒளி கதிர்களில் நம் கண்ணுக்குத் தெரியாத ஒளிக்கதிர்கள் உள்ளது. இத்தகைய ஒளிக் கதிர்களை அகச்சிவப்பு கதிர்கள், புற ஊதாக் கதிர்கள் என பிரிக்கலாம். அகச்சிவப்பு கதிர்கள் சூரியனிடமிருந்து வெப்பத்தை சுமந்து வந்து பூமியை வெப்பம் அடையச் செய்கிறது. புற ஊதாக்கதிர்கள் பூமியில் மனிதர்களுக்கு மட்டுமல்லாது, விலங்கினங்களும் தாவரங்களும் மிகுந்த பாதிப்புகளை ஏற்படுத்துக் கின்றன. இத்தகைய தீமை விளைவிக்கும் புற ஊதா கதிர்களை பூமியை வந்து அடையா வண் ணம் பாதுகாப்பதுதான் ஓசோன் படலத்தின் பணி ஆகும்.

குர்ஆனில் ஓசோன்

சந்திரனில் இதுபோன்ற ஓசோன் படலம் அல்லது வளிமண்டலம், என்று எதுவும் கிடையாது. எனவே, அங்கே சூரியக்கதிர்கள் நேரடியாகத் தாக்கும். நம்மைச்சுற்றி இருக்கும் வளிமண்டலம் தான் விண்ணிலிருந்து ஏற்படும் ஏராளமான ஆபத்துகளிலிருந்து நம்மைப் பாதுகாக்கிறது. நாம் வானத்தை (வளிமண்டலத்தை) பாதுகாக்கப் பட்ட முகடாக ஏற்படுத்தியிருக்கிறோம், என்று குர்ஆன் சொல்லும் (அல்குர்ஆன் -22::32) ஓசோன் படலம் எவ்வாறு பாதிப்புக்குள்ளாகிறது?

உன்னத பணி செய்துக் கொண்டிருக்கும் ஓசோன் படலத்தை நாம் சேதப்படுத்திக் கொண்டிருக்கிறோம். குளிர்சாதனப் பெட்டிகள், குளிரூட்டிகள், புகையிலை தொழிற்சாலைகள, தீயணைப்புக் கருவிகள், வர்ணம் அடிக்கும் தூவிகள், போன்றவற்றில் குளோரோ புளோரா கார்பன் என்னும் வாயு பயன்படுத்தப்படுகிறது. இந்த வாயு வளிமண்டலத்தில் உள்ள ஓசோன் துகள்களை தாக்குகிறது. இதனால் ஓசோன் படலத்தில் துளைகள் ஏற்படுகிறது.

புகை நரக வேதனை

நரகவாசிகள் கருபுகைகளின் நிழலில் கிடப்பார்கள், என்று குர்ஆன் கூறும். (அல்குர்ஆன் - 56:43) கரும்புகை கடுமையான நரக வேதனையாக இருக்கும் போது ஓசோனை ஓட்டை போடுவதில் ஆச்சரியம் ஒன்றுமில்லை. நபி (ஸல்) அவர்களின் காலத்தில் இது போன்ற நவீன சாதனங்கள் இல்லாவிட்டாலும் ஆகாயத்தில் தேவையில்லாமல்  புகை பரப்பும் காரியங்களை நபி (ஸல்) அவர்கள் தடைசெய்திருக்கிறார்கள். தூங்கச் செல்லும் போது விளக்கை அணைக்குமாறு அறிவுறுத்தியிருக்கிறார்கள். பகல் நேரத்தில் விளக்கு எறிப்பதை நபி (ஸல்) அவர்கள் வெறுத்திருக்கிறார்கள். (அல்முஃஜமுல் அவ்ஸத் - 4523)

பட்டாசு வெடிப்பதால் பொருளாதாரம் வீண்விரயம் என்ற விதத்தில அதை மார்க்கம் தடை செய்கிறது, என்றால் அதனால் மறுபுறம் சுற்றுச்சூழல் கெடுகிறது, என்கிற ரீதியிலும் மார்க்கத்தின் பார்வையில் அது தடை செய்யப்பட்டதாகவே கருதப்படுகிறது. எனவே, முஸ்லிம்கள் எக்காரணம் கொண்டும் இது போன்ற கொண்டாட்டங்களில் ஈடுபடக் கூடாது. இறந்து விட்ட சடலத்தின் மூலம் பூமியின் மேல் உள்ளவர்களுக்கு எந்தத் தீங்கும் நேரிடக்கூடாது, என்பதற்காகத் தான் உலகின் முதல் சடலத்தை மண்ணில் புதைப்பதற்கு ஒரு காகத்தை அனுப்பி மனிதனுக்குக் கற்றுக் கொடுத்தான், என்பது குர்ஆன் கூறும் வரலாறு.

தீமைகள்

ஓசோன் படலம் ஒரு விழுக்காடு குறைந்தால் தோல் புற்றுநோய் இரண்டு விழுக்காடு அதிகரிக்கும். உலக சுகாதாரக் கழகத்தின் கண்டுபிடிப்புகளின் படி ஒவ்வொரு ஆண்டும் 20 முதல் 30 லட்சம் பேர் தோல் புற்று நோய்க்கு ஆளாவதாகவும், இதில் 20 விழுக்காடு புற ஊதாககதிர்களின் பாதிப்புகளால் விளைந்தவையே என்றும் தெரிவித்துள்ளது. மேலும் தாவரங்களின் உற்பத்தி திறனும் குறையும். விலங்கினங்கள் அதிக அளவு பாதிக்கப்படும். புற ஊதாக்கதிர்கள் கடலில் பல மைல் தூரம் ஊடுருவிச்சென்று கடல்வாழ் உயிரினங்களில் ஒரு செல் உயிர்களை கொன்று குவிக்கிறது. மண்ணில் நுண்ணுயிர்கள் பாதிப்புக்கு உள்ளாகின்றது.

ஓசோன் தினம்

1987ம் ஆண்டு செப்டம்பர் மாதம் 16ம் தேதி கனடா நாட்டின் தலைநகரில் ஓசோன் படையை அழிக்கும் ரசாயனங்களுக்கு எதிரான 'மொன்றியல்" உடன்படிக்கை கையெழுத்திடப்பட்டதையடுத்து அந்தத் தினமே 1995ம் ஆண்டு முதல் சர்வதேச ஓசோன் தினமாக அனுசரிக்கப்பட்டு வருகிறது. 1994ம் ஆண்டு டிசம்பர் மாதம் 19ம் தேதி ஐக்கிய நாடுகள் பொது சபையில் இதற்கான தீர்மானம் நிறைவேற்றப்பட்டது. சுற்றுச் சூழல் வேகமாக அழிந்து வருகிறது. மலைகள் எல்லாம் கிரானைட் கற்களாக விலை போகின்றன. காடுகள் அழிக்கப்படுகிறது, மரங்கள் மொட்டை அடிக்கப்படுகின்றன. காடுகளில் உள்ள மரங்கள் விறகுகளாகவும் வீட்டு உபயோகப் பொருட்களாகவும் மாறுகின்றன. பெரும்பாலான காடுகள் குடியிருப்புப் பகுதிகளாகவே மாறிவிட்டன.

உலக நிலப்பரப்பில் 6 சதவிகித மட்டுமே வனப்பரப்பு எஞ்சியுள்ளது. நிமிடத்திற்கு 140 ஏக்கர் பரப்பளவில் காடுகள் அழிக்கப்படுவதாகவும்  இந்தியாவில் முதலில் இருந்த காட்டின் அளவு 33 சதவிகிதம். தற்போது, 22 சதவிகிதம் மட்டுமே உள்ளது. இதனை ஈடுசெய்ய 54 கோடி மரங்கள் நட்டால்தான் முடியும். இந்தியாவில் காணப்படும் 17,672 பூக்கும் தாவரங்களில் 5,640 தமிழ் நாட்டில் உள்ளன. கடந்த 50 ஆண்டுகளில் உலக நிலப்பரப்பில் இருந்த 14 சதவிகித காடுகளில் தற்போது 6 சதவிகிதம் மட்டுமே உள்ளது, என்றும் தகவல்கள் தெரிவிக்கின்றன.  ஓசோனை பாதுகாக்க வழிமுறைகள்

ஓசோன் படலம் பாதிக்கப்படுவதை தடுப்பதற்கான வழி முறைகள் பார்ப்போம்.

1995-ம் ஆண்டு ஓசோன் ஆய்விற்காக குரூட்சன் மற்றும் நிகோலஸ் ஆகிய இருவருக்கும் நோபல் பரிசு வழங்கப்பட்டது. இந்த அறிஞர்களின் விருப்பமெல்லாம் இந்த பூவுலகை காக்கும் ஓசோன் படலத்தை காக்க உலகத்திலுள்ள அனைவரும் ஒன்றாக கைகோர்க்கவேண்டும் என்பதுதான்.

கடந்த 50 ஆண்டுகளில் உலக நிலப்பரப்பில் இருந்த 14 சதவிகித காடுகளில் தற்போது 6 சதவிகிதம் மட்டுமே உள்ளது. பூமியில் மூன்றில் ஒரு பங்கு காடுகள் இருக்க வேண்டும் என்பது இயற்கையின் விதி. இவ்வாறு இருந்தால் நமக்கு கிடைக்கும் பயன் அதிகம். இந்தியாவில் 33 சதவிகித அளவுக்கு இருந்த காடுகள் குறைந்து தற்போது 22 சதவிகித காடுகள் மட்டுமே உள்ளன. இந்த 11 சதவிகிதத்தை அடைய வேண்டும் என்றால் 54 கோடி மரங்களை நடவேண்டும். வனத்துறை மட்டுமே இந்தப் பணியை செய்ய முடியாது. எனவே நாமும் ஆளுக்கொரு மரம் நடவேண்டும். 

மரம் நடுவதின் சிறப்பு

மரம் நடுவதற்கான சிறப்புகளை நபி (ஸல்) அவர்கள் நிறைவாகவே போதித்திருக்கிறார்கள். ஒரு முஸ்லிம் மரம் நட்டாலோ அல்லது ஏதாவது விவசாயம் செய்தாலோ அதன் மூலம் யாரவது ஒரு மனிதர் அல்லது ஒரு பறவை அல்லது ஒரு பிராணி சாப்பிடுமேயானால் அவை ஒவ்வொன்றும் மரம் நட்டவருக்கு ஸதகா செய்த நன்மையாக எழுதப்படும், என்று நபி (ஸல்) அவர்கள் கூறினார்கள். (புகாரி - 2320)

மரக்கன்று நட்ட நபித்தோழர்

மதீனாவில் விவசாயம் செழிப்பாக இருந்தததை யாரும் அறியாமால் இருக்க முடியாது. திராட்சை தோட்டங்களும் பேரீச்சை தோட்டங்களும் மதீனாவில் நிறைந்திருந்ததை சரித்திரம் நெடுக காணமுடியும்.  அவ்வாறே நபித்தோழர்கள் மரக்கன்று நட்ட நிகழ்வுகளையும் நபிமொழிக் கிரந்தங்களில் காணமுடியும். அபூஹுரைரா (ரலி) அவர்கள் ஒரு மரக்ன்று நட்டிக் கொண்டிருந்தார்கள். அப்பொழுது நபி (ஸல்) அவர்கள் அபூஹுரைரா (ரலி) வைக் கடந்து சென்றார்கள். என்ன செய்கிறீர்கள்? என்று கேட்டார்கள். அதற்கு அபூஹுரைரா (ரலி) மரக்ன்று நட்டிக் கொண்டிருக்கிறேன், என்று கூறினார்கள். அதனைக் கேட்ட நபியவர்கள் இதனைவிடச் சிறந்த நன்மை நடலைச் சொல்லித் தரட்டுமா? என்று கேட்டுவிட்டு சுபுஹானல்லாஹ் வல்லஹம்துலில்லாஹி வலாயிலாஹ இல்லல்லாஹு வல்லாஹு அக்பர் என்று கூறுங்கள். ஒவ்வொன்றுக்கும் பகரமாக சுவனத்தில் ஒரு மரம் நடப்படும், என்று கூறினார்கள்.  (இப்னுமாஜா - 3807)

மரத்தை வெட்டாதே!

மக்களுக்கு நிழலும் பழமும் தரும் மரத்தை வெட்டுவதை யாராலும் சகித்துக் கொள்ள முடியாது. அதே மரம் முழு உலகிற்குமான ஓசோன் படலத்தைப் பாதுகாப்பதில் பெரும் பங்கு வகிக்கும் போது அதை வெட்டியழிப்பது கொடுங்குற்றம் தவிர வேறென்ன? இது பற்றி எச்சரித்த நபிமொழிகளையும் பார்க்க முடியும். இலந்தை மரத்தை வெட்டுபவர்கள் தலைகுப்புற நரகில் வீசப்படுவார்கள், என்று நபி (ஸல்) அவர்கள் கடுமையான வார்த்தைகளால் எச்சரித்திருக்கிறார்கள். (பைஹகீ -12105) கடல் நீர் மட்டம் நினைத்ததை விட வேகமாக உயர்ந்து வருகிறதாம். இதனால் 2100ம் ஆண்டு வாக்கில் அமெரிக்காவில் மட்டும் கிட்டத்தட்ட 20 லட்சம் வீடுகள் கடலில் மூழ்கிப் போய் விடும் என்று சமீபத்தில் விஞ்ஞானிகள் எச்சரித்துள்ளனர்.

இதில் மேரிலான்ட் மற்றும் விர்ஜீனியாவில் மட்டும் 1 லட்சத்திற்கும் மேற்பட்ட வீடுகள் மூழ்கும் நிலை ஏற்படுமாம். அமெரிக்கா முழுவதும் மொத்தமாக கிட்டத்தட்ட 20 லட்சம் வீடுகள் அடியோடு கடலில் மூழ்கும் அபாயம் ஏற்படுமாம்.

ஊர்களையும், நகரங்களையும், வீடுகளையும் கடல் கபளீகரம் செய்யும் காரணத்தால் பல லட்சம் பேர் இடம் பெயர்ந்து செல்லக் கூடிய நிலையும் ஏற்படுமாம். மேலும் பல கோடி அளவுக்கு பொருட் சேதமும் அமெரிக்காவை ஆட்டிப்படைக்குமாம். கரோலினா, புளோரிடா ஆகியவையும் கடும் பாதிப்பைச் சந்திக்கும் நிலை ஏற்படுமாம். இதில் புளோரிடாவுக்குத்தான் மிகப் பெரிய பாதிப்பு ஏற்படும் என்கிறார்கள். இங்கு கணக்கிடவே முடியாத அளவுக்கு சேதம் இருக்கும் என்கிறார்கள்.

எந்த அளவுக்கு கடல் நீர் மட்டம் உயரும் என்பதை விட அதனால் ஏற்படும் அபாயங்களைத் தவிர்த்து கரை சேருவது எப்படி என்பதுதான் விஞ்ஞானிகளின் பெரும் கவலையாக உள்ளது. மேலும் முன்பு கணித்ததை விட கடல் நீர் மட்ட உயர்வு அதிகமாகவே இருக்கிறதாம். இதற்குக் காரணம், பூமியில் கரியமில வாயுவின் உமிழ்வு தொடர்ந்து அதிகரித்து வருவதே.

இதுகுறித்து கொலம்பியா பல்கலைக்கழகத்தின் மைக்கேல் ஜெரார்ட் கூறுகையில், இது அமெரிக்காவுக்கு மட்டுமான பிரச்சினை இல்லை. உலகம் முழுமைக்குமான பிரச்சினை. சர்வதேச பிரச்சினை. உலகம் முழுவதும் பல கோடி வீடுகள் கடலில் மூழ்கப் போகின்றன. பல கோடிப் பேர் பாதிக்கப்படவுள்ளனர். மிகப் பெரிய குழப்பத்தையும் பூமி சந்திக்கப் போகிறது.

எந்த வேகத்தில் கடல் நீர் மட்டம் உயரும் என்பதை சரியாக கணிக்க முடியாது என்றாலும் கூட அது வேகமாக இருக்கிறது என்பதே உண்மை. நிச்சயம் இதைத் தவிர்க்கவும் முடியாது. முன்னெச்சரிக்கை நடவடிக்கைகளை இப்போதே திட்டமிடுவதே புத்திசாலித்தனம் என்றார் அவர்.

விஞ்ஞானிகளின் கணிப்புப் படி கடல் நீர் மட்டம் 6 அடி அளவுக்கு உயரும் என்று வைத்துக் கொண்டால் அமெரிக்காவில் 2 சதவீத பகுதி கடலில் மூழ்கிப் போய் விடும். பல லட்சம் கோடி அளவுக்கு பெரும் சேதத்தை சந்திக்கும் அமெரிக்கா. விஞ்ஞானிகள் சொல்வதைப் பார்த்தால் 2100ல் அமெரிக்கா மட்டுமல்லாமல் ஒட்டுமொத்த பூமியும் மிகப் பெரிய ஸ்தம்பிப்பை சந்திக்கப் போகிறது என்பது மட்டும் உறுதியாக நம்பலாம். எது எப்படி இருந்தாலும் அல்லாஹ் நாடியது மட்டுமே நடக்கும், என்பது மட்டுமே மகா உண்மை.