மார்க்கக் கல்விக்கு தேவை, மனிதவளம்!

கல்வியறிவு மனித இனத்திற்கே உரிய சிறப்பம்சமாகும். கல்வியறிவு மனிதனை சமுதாயத்தில் தலை நிமிர்ந்து நிற்கச் செய்யும். கல்வியறிவு பெற்ற மனிதனை சமூகமே போற்றும். எழுத்தறிவும் படிப்பறிவும் இல்லாதவனை இந்த உலகம் எள்ளி நகையாடும். 

எழுத்தும் படிப்பும்

இஸ்லாமியப் பார்வையில் எழுத்தும் படிப்பும் மிகவும் இன்றியமையாதது. எழுதுகோல் என்ற பெயரில் குர்ஆனில் ஓர் அத்தியாயமே இறக்கயருளப் பட்டிருக்கிறது. குர்ஆன் எழுதுகோலின் மீது சத்தியம் செய்து சத்தியத்தை நிலைநாட்டுகிறது. 

பத்ரு யுத்தத்ததில் கைதிகளாகப் பிடிக்கப்பட்ட எதிரிகளில் யாருக்கு பிணைத்தொகை கொடுத்து விடுதலை பெற முடியவில்லையோ அவர்களிடம் முஸ்லிம் சிறுவர்களுக்கு கல்வியறிவு போதிக்க வேண்டும், என்று பணிக்கப்பட்டது. 

மார்க்கரீதியாகவும் எழுத்தும் படிப்பும் மிகப்பெரும் லாபத்தைப் பெற்றுத் தரும். யாரிடமாவது கடன் வாங்கினால் அதை எழுதி வைத்துக் கொள்வது மரபு. இறைநம்பிக்கை கொண்டோரே! ஒரு குறிப்பிட்ட தவணையை நிர்ணயித்து நீங்கள் உங்களுக்கு மத்தியில் கடன் கொடுக்கல் வாங்கல் மேற்கொண்டால் அதை எழுதி வைத்துக் கொள்ளுங்கள். (அல்குர்ஆன் - 2: 282) 

இந்த வசனத்தில் நீங்கள் ஒருவருக்கொருவன் கடன் ஒப்பந்தம் செய்தால் கடனுடைய அளவையும் தவணையையும் எழுதி வைத்துக் கொள்ளுமாறு உத்தரவிடப் பட்டிருக்கிறது. அந்த வசனத்தின் தொடரில் எழுதப்படிக்கும் ஆற்றலை யாருக்கு அல்லாஹ் வழங்கியுள்ளானோ அவர் அதனை எழுத மறுக்கக் கூடாது, என்று கூறி எழுதத் தெரிந்தவரிடம் கடனைப் பற்றிய விபரத்தை எழுதிக் கொடுக்குமாறு கேட்கப்பட்டால் அவர் எழுதித்தர மாட்டேன், என்று மறுத்துவிட வேண்டாம். அந்த எழுத்துத் திறமை அல்லலாஹ் அவருக்கு வழங்கிய உயர்தரமான அருட்கொடை என்பதை உணர்த்துகிறது. 

இஸ்லாமிய சரித்திரத்தில், வஹியை எழுதுபவர்கள் என்ற தனி பட்டியல் உண்டு. எழுத்துத் திறமையைக் கொண்டு குர்ஆனையும் எழுதிப் பாதுகாகத்துக் கொள்ள முடியும். ஹதீஸையும் எழுதிப் பாதுகாத்துக் கொள்ள முடியும். நபித்தோழர்களும் பின்னர் வந்த நல்லோர்களும் ஹதீஸை எழுதிப் பாதுகாத்தனர். எழுத்து என்பது தட்டச்சு உட்பட அதன் எல்லா வடிவங்களையும் எடுத்துக் கொள்ளும். 

துறை சார்ந்த கல்வி

உலகின் படைப்புகளைப் பற்றி சிந்திப்பது மார்க்கத்தின் பார்வையில் உயர்ந்த வழிபாடு, என்ற அந்தஸ்தைப் பெறுகிறது. விண்ணியல், மண்ணியல், தாவரவியல், உயிரியல், இயற்பியல் போன்ற துறைகளில் தேர்ச்சி பெற்றவர்களின் மூலம் அல்லாஹ்வுடைய படைப்புகளை மிக ஆழமாக சிந்திக்க முடியும். வானம் பூமியைப் பற்றி அவர்கள் சிந்திக்க மாட்டார்களா? இரவு பகலைப் பற்றி சிந்திக்க மாட்டார்களா? என்று பல விதங்களில் படைப்புகளைப் பற்றிய சிந்தனையை குர்ஆன் வலியுறுத்தாமலில்லை.  

தொழில் கல்வி

மருத்துவம், பொறியியல், விவசாயம் போன்ற பல கலைகளைக் கற்று மக்களுக்கு அருமையான சேவைகளைச் செய்ய முடியும். மருத்துவமின்றி உலகம் இயங்க முடியாது. விவசாயமின்றி உலகம் இயங்க முடியாது. தங்குவதற்கான வீடுகள், உணவு வகைகள், ஆடை வகைகள் போன்றவை இல்லாமல் உலகம் இயங்குவது கடினம். ஆட்சியராக நீதிபதியாக இருந்து மக்களுக்கு சேவையாற்ற முடியும். இதையெல்லாம் இஸ்லாம் நிராகரிக்காது. மக்களுக்குப் பணி செய்வதற்காக இந்தக் கலைகளைக் கற்பதும் கூட்டுக் கடமை எனும் ஃபர்ளெ கிஃபாயா, என்று சொல்ல வேண்டும். 

சீரான சிந்தனை

ஆனால், இன்று இது போன்ற துறைகளும் கலைகளும் பெரும் வருமானத்தை ஈட்ட வேண்டுமென்ற நோக்கத்திலேயே கற்றுத்தரவும் படுகிறது. கற்கவும் படுகிறது. அந்தக் கல்வியைப் பயின்றால் எதிர்காலத்தில் பிரகாசமான வாய்ப்பு இருக்கிறது. இந்தத் துறையில் எதிர்காலத்தில் எடுபடாமல் போய்விடும், போன்ற யோசனைகள் காதுகளில் விழுந்து கொண்டே இருக்கும். 

ஓத வைத்தால் உருப்படியான வருமானம் கிடையாது, படிக்க வைத்தால் கை நிறைய சம்பாதிக்கலாம். என்கிற மனோநிலை மட்டுமே உருவாக்கப் பட்டிருக்கிறது. இது ஃபர்ளெ கிஃபாயா. இதில் சமூக சேவை செய்ய முடியும். உலகின் இயக்கத்திற்கு என்னனுடைய பங்களிப்பும் இருக்கிறது, என்ற சிந்தனையெல்லாம் வருவது மிகவும் அரிது. ஏன்? இந்தக் கல்வியைக் கற்றுக் கொடுக்கும் கல்வி நிலையங்களே தொழில் மயமாகி நீண்ட காலம் கடந்து விட்டது. 

சிறப்பு நிபுணர்

எல்லாத் துறையிலும் எல்லோராலும் தடம் பதிக்க முடியாது. எல்லாத் துறையிலும் ஒவ்வொரு நபரும் திறமையாக வளர முடியாது. அது சாத்தியமும் இல்லை. நடைமுறையும் அதை உறுதிப் படுத்துகிறது. அனைவரும் ஐஏஎஸ் படிக்க முடியாது. எல்லாரும் இன்ஜீனியராக இருக்க முடியாது. அனைவரும் மருத்துவராக இருக்க முடியாது. 

மருத்துவர்களிலும் கூட உடலின் ஒவ்வொரு பகுதிக்கும் தனித்தனி ஸ்பெஷலிஸ்ட் உண்டு. யாருக்கு எந்தத் துறை வருகிறதோ அந்தத் துறையில் தடம் பதிக்க முயல வேண்டும். இந்நிலையில் உலகக் கல்வியிலும் மார்க்கக் கல்வியிலும் சமமாக தடம் பதிக்க வேண்டுமென்று சொல்லப்படுவதை எப்படி ஏற்றுக் கொள்வதென்று தெரிய வில்லை. 

ஒரு வக்கீலுக்கு மருத்துவம் பார்க்கத் தெரியுமா? ஒரு மருத்துவருக்கு நீதிமன்றத்தில் வாதாடத் தெரியுமா? ஒரு வியாபாரிக்கு வீடு கட்டத் தெரியுமா? ஒரு விண்ணியல் விஞ்ஞானிக்கு விவசாயம் செய்யத் தெரியுமா? ஒரு துறையில் ஸ்பெஷலிஸ்டாக இருப்பவர் மற்றொரு துறையிலும் அதே அளவுக்கு திறமையாக இருக்க முடியாது, என்பது நிதர்சனம். 

ஆலிம் அதிகாரி

ஓர் ஆலிம் ஐஏஎஸ் அதிகாரியாக இருக்க வேண்டும். நீதிபதியாக இருக்க வேண்டும். மருத்துவமும் படிக்க வேண்டும். ஓர் ஆலிம் டிகிரி பெற்றவராக இருக்க வேண்டும். இன்னபிற தொழிற்கல்வி பயின்றவராக இருக்க வேண்டும், என்ற வாதம் சரியாக இருக்குமேயானால் ஆலிம் என்பதற்கான இலக்கணத்தை வரையறுத்தாக வேண்டும். மார்க்கத்துறையில் நிபுணத்துவம் பெற்ற ஒருவர் மற்ற துறைகளில் தடம் பதிப்பது சாத்தியமற்றது, என்பது சிறுபிள்ளைக்கும் விளங்கும். அப்படியனால் உலகியில் துறையில் ஆலிம் தேர்ந்திருக்கிறாரென்றால் ஏதோ மார்க்கம் படித்தவராக இருக்க முடியுமே தவிர மார்க்க வல்லுணராக இருக்க முடியாது. 

கட்டாயக் கல்வி

மார்க்கத்தைப் படிப்பது ஒவ்வொரு முஸ்லிமுக்கும் கட்டாயக் கடமை. ஏழு வயது பையனுக்கு தொழுகைக் கல்வியைக் கற்றுக் கொடுப்பது பெற்றோரின் கடமை. வயதுக்கு வந்த ஒரு வாலிபர் தன்மீது அல்லாஹ்வின் கட்டளைகள் எவை எவை? என்பதை கண்டிப்பாக அறிந்திருக்க வேண்டும். குளிப்பு கடமையானால் என்னுடைய கடமையான குளிப்பை எப்படி குளிக்க வேண்டும், என்பதைத் தெரியாமல் அவர் ஒரு முழுமையான முஸ்லிமாக ஆக முடியாது. 

15 வயது வாலிபர் ரமளானை அடைந்தால் நோன்பின் சட்டங்களை அவர் படித்திருப்பது கட்டாயக் கடமை. அவருக்கு சிறு வயதிலேயே பொருளாதாரமும் நிறைவாக இருந்தால் ஜகாத் கொடுக்க வேண்டும். ஜகாத் தொடர்பான கல்வியும் கட்டயாக் கல்வியாகி விடும். திருமணம் செய்பவர் நிகாஹ் தொடர்பான கல்வியை கண்டிப்பாக படிக்க வேண்டும். வியாபாரம் செய்பவர் இஸ்லாம் தொடர்பான வியாபாரக் கல்வியை கற்றிருக்க வேண்டும். இவற்றைப் படிக்காவிட்டால் அவர் குற்றவாளியின் பட்டியலில் சேர்ந்து விடுவார். 

எனவே தான் நபி (ஸல்) அவர்கள் தலபுல் இல்மி ஃபரீளதுன் அலா குல்லி முஸ்லிம் - (இஸ்லாமியக்) கல்வியைத் தேடுவது ஒவ்வொரு முஸ்லிமின் மீதும் கட்டாயக் கடமை, என்று கூறினார்கள். 

இருகல்வியும் தேவை

பள்ளிக்கூடங்களில் பிள்ளைகளைப் படிக்க வைக்கும் பெற்றோர்கள் மேற்கூறப்பட்ட கல்வியையும் கற்றுக் கொடுக்க ஏற்பாடு செய்ய வேண்டும். தனியாக மக்தப் வழிக் கல்வி மூலம் கற்றுக் கொடுக்கலாம். அல்லது கிருத்தவர்கள் பள்ளிக்கூடங்கள் நடத்துவது போல் முஸ்லிம்களும் பள்ளிக்கூடங்கள் பரவலாகவும் தனித்தன்மையுடனும் நடத்த வேண்டும். 

அங்கு ஒரு முஸ்லிம் அறிந்திருக்க வேண்டிய மார்க்கச் சட்டங்களையும் முறையாகக் கற்றுக் கொடுக்க வேண்டும். மார்க்கக் கல்வியையும் இணைத்து போதிக்கக் கூடிய பள்ளிக்கூடங்கள், கல்லூரிகளை முஸ்லிம்கள் பரவலாக ஆரம்பித்து சிறப்பாக நடத்த வேண்டும். அதன் மூலம் பிள்ளைகள் உலகக் கல்வியையும் கற்றுக் கொள்வார்கள். அறிந்திருக்க வேண்டிய மார்க்கச் சட்டங்களையும் அறிந்து கொள்வார்கள்.

மார்க்கத்துறை

உலகியல் துறைகளுக்கு தனித்தனியாக விரும்பி படிப்பதற்கு மனித வளம் இருக்கும் போது மார்க்கவியலுக்கு மட்டும் ஏன் அப்படியொரு மனித வளம் இருக்கக் கூடாது. மருத்துவ நிபுணர்களுக்கு ஊரில் பஞ்சமில்லை. பொறியியல் வல்லுணர்களுக்கு பஞ்சமில்லை. இன்னும் எத்துணை துறைகள் இருக்கிறதோ அவற்றில் எந்தத் துறைக்கும் பஞ்சமில்லை. 

ஆனால், மார்க்கவியல் நிபுணர்கள் தேவையான அளவுக்கு இருக்கிறார்களா? என்பதை ஆழ்ந்து சிந்திக்க வேண்டும். பேச்சாற்றலையும் எழுத்தாற்றலையும் வளர்த்துக் கொள்வது மட்டுமே மார்க்கச் சட்ட வல்லுணர்களுக்கான இலக்கணமாக இருக்க முடியாது. மக்களுடைய பிரச்சினைகளுக்கான தீர்வுகளை உடனுக்குடன் சரியான முறையில் தீர்த்து வைப்பதற்கான சட்டவல்லுணர்கள் கொண்ட மனத வளம் இன்று முஸ்லிம் மக்கள் தொகைக்கு ஈடாக இருக்கிறதா? என்பதே கேள்வி. 

மனிதவளம் தேவை

மார்க்கக் கல்வியில் ஒரு வகை, மேலே கூறப்பட்டது போல் அனைத்து முஸ்லிம்களும் கற்றுக் கொள்ள வேண்டிய கட்டாயக் கல்வி. மற்றொரு வகை, மார்க்கவியல் தொடர்பான அனைத்துப் பகுதிகளையும் முழுமையாகக் கற்று சமுதாயத்தை இஸ்லாமிய வாழ்க்கையை விட்டும் சிறிதும் அடிபிறழாமல் இஸ்லாமியப் பாதையில் நடத்துவதற்கான கல்வி. மனித வாழ்க்கையின் எல்லா துறைகள் தொடர்பாகவும் இஸ்லாமிய வழிகாட்டல் என்ன? என்பதற்கான சட்டங்களையும் விளக்கங்களையும் கற்றுத் தேர்ந்து எப்பொழுதும் தயார் நிலையில் மக்களின் பிரச்சினைகளை தீர்ப்பதற்கு தயாராக இருக்க வேண்டும். இதற்கான மனித வளம் நம்மிடம் குறைவு என்றே சொல்ல வேண்டும். 

இப்படிப்பட்ட நிலையை உண்டாக்குவதற்கு மத்ரஸா - அரபிக் கல்லூரிகள், சமுதாயம் ஆகிய இரு தரப்பும் தங்களைத் தயார் படுத்திக் கொள்ள வேண்டும். சமுதாயத்தில் ஒரு பிரிவினர் ஒவ்வொரு ஊரிலும் மார்க்கவியல் மட்டுமே படிக்கக்கூடிய நிலையை சமுதாயம் உருவாக்க வேண்டும். ஒவ்வொரு ஊரிலும் தேவையான அளவு மனித வளத்தை மார்க்கத்துறையில் மட்டுமே ஈடுபடுத்த வேண்டும். அவர்கள், நம்முடைய முன்னோர்களைப் போன்று மாபெரும் மார்க்கச் சட்ட வல்லுணர்களாக உருவெடுக்க வேண்டும். மார்க்கப்பணி செய்வதே அவர்களுடைய ஆயுள் பணியாக இருக்க வேண்டும். 

மத்ரஸாக்களின் பணி

மத்ரஸாக்களும் தங்களுடைய உள்கட்டமைப்பை முறைப்படுத்த வேண்டும். எண்ணிக்கை மட்டுமே குறிக்கோளாக இருக்கக் கூடாது. இதில் நாம் மத்ரஸாக்களை குறை கூறிட முடியாது. அதற்கான முழுக் காரணத்தை சமூகத்தின் அனைத்துப் பிரிவினர்களும் ஏற்றாக வேண்டும், என்பது இங்கு சொல்லித் தெரிய வேண்டிய ஒன்றல்ல. 

மாணவர்களுக்கு சட்டங்களை மட்டும் சொல்லிக் கொடுக்கக் கூடாது. திறமையை வளர்க்க வேண்டும். சட்டங்களை சொல்லிக் கொடுப்பதற்கு மட்டும் என்றால் அதற்கு இவ்வளவு பெரிய ஏற்பாட்டில் மத்ரஸாக்கள் தேவையில்லை. தமிழ் நூற்களை வாங்கிக் கொடுத்து அவரவர்களுடைய வீட்டிலேயே இருந்து படிக்கச் சொல்லிவிடலாம். அல்லது, அதற்கான பயிலரங்குகளின் மூலம் அறியச் செய்து விடலாம். 

மார்க்கவியல் மாணவர்களுக்கு சட்டங்களைப் படித்துக் கொடுப்பதுடன், தனித்திறமையை உருவாக்க வேண்டியது மத்ரஸாக்களின் பொறுப்பாகும். அரபி இலக்கணம், இலக்கியம், அரபி மொழியியல் குர்ஆன் விரிவுரை, ஹதீஸ் விளக்கவுரை உட்பட எல்லா பிரச்சினைகள் தொடர்பான சட்டங்களையும் ஏழாண்டு காலத்தில் கற்றுக் கொள்வதும் கற்றுக் கொடுப்பதும் நடைமுறை சாத்தியமற்றது. 

ஓர் ஆலிமுக்கு பிரச்சினைக்கான தீர்வு என்ன? என்று தெரியாமல் இருப்பதோ அல்லது நினைவில் இல்லாமல் இருப்பதோ தவறும் அல்ல. குறையும் அல்ல. அந்தப் பிரச்சினைக்கான தீர்வைத் தேடி முயற்சித்து தெரிந்து கொள்வதற்கான திறமை இல்லாமல் போவது தான் தவறும் குறையும். மக்கள் ஒரு சந்தேகத்தைக் கேட்கும் போது அதற்கான தீர்வு எங்கு கிடைக்கும்? எந்த வகையில் முயற்சித்தால் பெற்றுக் கொள்ள முடியும்? மார்க்க நூற்களில் எந்த நூலில் எந்த இடத்தில் தேடினால் அதற்கான தீர்வைப் பெற்றுக் கொள்ள முடியும்? என்பதை அறிந்திருக்க வேண்டும். 

அரபி அல்லது உர்தூ மொழிகளில் இருக்கக்கூடிய நூற்களை ஆய்வு செய்து முடிவு செய்வதற்கான மொழியறிவும் அடிப்படைச் சட்ட அறிவும் இருக்க வேண்டும். அப்படிப்பட்ட திறமையுயும் வலிமையையும் தான் மத்ரஸாக்கள் உருவாக்கிக் கொடுக்கின்றன. இதற்காகத்தான் மத்ரஸாக்கள் இயங்குகின்றனவே தவிர சில மார்க்கச் சட்டங்களைப் படித்துக் கொடுப்பதற்காக அல்ல. ஆனால், அப்படிப்பட்ட மார்க்க அறிஞர்கள் இன்று சமுதாயத்தில் தேவையான அளவுக்கு இருக்கிறார்களா? என்பதை யோசிக்க வேண்டும். பரீட்சையில் பாஸ் ஆகுவது பெரிய விஷயமல்ல. வளர வேண்டிய திறமை வளர்ந்திருக்கிறதா? என்பது தான் கேள்வி. யாராவது சொல்லக் கேட்டு மனதில் பதிய வைத்து பரீட்சை பேப்பரில் எழுதி விட முடியும். ஆனால், அவற்றை அவரே தேடிப்பெற்று விளங்கிக் கொள்ள முடியுமா? 

இதுபோன்ற முழுமையான திறமையை வளர்த்து விடுவதற்காகத் தான் மத்ரஸாக்கள் பாடுபடுகின்றன. அந்நிலையில் நூறு சதவீத வளர்ச்சியை அடைவதற்கு சமுதாயமும் மத்ரஸாக்களும் இணைந்து பல உள்கட்டமைப்புகளுடன் பாடுபட்டாக வேண்டும். இல்லையானால், மக்களின் மார்க்க வாழ்க்கைக்குத் தேவையான மார்க்க வல்லுணர்களின் மனித வளம் பற்றாக்குறை என்கிற குறை நீங்குவதற்கு வாய்ப்பில்லை. 

மார்க்கக் கல்வியை மட்டும் படித்து அதையே ஆயுள் பணியாகச் செய்தால் அவர்கள் பொருளாதார ரீதியாக சொந்தக் காலில் நிற்க முடியாதே! உலகியலையும் சேர்த்து படித்தால் தானே அவர் மார்க்கக் கல்வியின் மூலம் சம்பாதிக்க மாட்டார். தன்மானத்துடன் வாழ முடியும், என்று கேட்கலாம். சமுதாயத்தின் இஸ்லாமிய வாழ்க்கைக்கு தங்களுடைய ஆயுளை அர்பணிப்பவர்களுக்காக சமுதாயம் தங்களை அர்ப்பணிக்கத் தயாராக இல்லையானால், மக்களுக்கு தங்களுடைய சிறப்பான மறுமை வாழ்க்கையின் மீது அக்கரையில்லை, என்று தான் சொல்ல நேரிடும்.

ரமளானில் கடிகாரத்திலும் கவனம் தேவை

பள்ளிவாசல் என்றால் கண்டிப்பாக கடிகாரம் இல்லாமல் இருக்க முடியாது. ஒரு காரியத்தைக் குறித்த நேரத்தில் செய்து முடிக்க வேண்டுமென்ற பாடத்தை பள்ளிவாசல் போன்று எந்தத் தளமும் கற்றுத்தர முடியாது. உலகின் எந்த நிகழ்ச்சி நிரலாக இருந்தாலும் திட்டமிடப்பட்ட நேரத்தில் ஆரம்பிப்பது மிகவும் குறைவு அல்லது இல்லையென்றே சொல்ல வேண்டும்.

நிகழ்ச்சி துவங்கும், என்று அறிவிக்கப் பட்டிருக்கும் நேரத்தை விட அரை மணிநேரம் அல்லது ஒரு மணி நேரம் கூட சில சமயம் தாமதமாக ஆரம்பிக்கலாம். மிகவும் பேணுதலாக இருந்து குறித்த நேரத்தில் ஆரம்பிக்க வேண்டுமென்று பெருமுயற்சி எடுத்தாலும் ஒன்றிரண்டு நிமிடங்களாவது தாமதமாவது தவிர்க்க முடியாததாகி விடும்.

பள்ளிவாசலின் நிகழ்ச்சி நிரல்
இவற்றுக்கெல்லாம் வித்தியாசமாக வினாடி கூட தாமதமில்லாமல் துல்லியமாக குறித்த நேரத்தில் நிகழ்வை ஆரம்பிக்கப் படும் ஒரே இடம் பள்ளிவாசல் என்று சொன்னால் அது மிகையாகாது. தொழுகைக்கான இகாமத் சொல்வதற்கு குறிக்கப்பட்ட நேரத்திற்கு ஒரு நிமிடத்திற்கு முன்பாகவே முஅத்தின் டிஜிட்டல் கடிகாரத்தை கண் இமைக்காமல் பார்த்துக் கொண்டே இருப்பார். அந்த ஒரு நிமிடம்  முடிந்தவுடன் உடனடியாக இகாமத் சொல்ல ஆரம்பித்து விடுவார்.

இதன்மூலம் பெருமிதம் கொள்வதில் தவறேதும் இருக்க முடியாது. அதே சமயம், கடிகாரம் காட்டக் கூடிய நேரம் மிகச் சரியானதா? என்பதில எப்பொழுதும் கவனம் இருக்க வேண்டும். இல்லையானால், தொழுகைக்காக சொல்லப்படும் அதான் சிலசமயம் முன்பின் ஆகிவிடும். அதன்மூலம் மக்களின் நோன்பும் கூட கேள்விக்குறியாகிவிடும்.

கடிகாரத்தின் மீது நம்பிக்கை
கடிகாரம் காட்டும் நேரத்தை வணக்க வழிபாடுகள் விஷயத்தில் அப்படியே நம்பி விடமுடியாது. என்ன தான் உயர்ரக கடிகாரமாக இருந்தாலும் தவறாகக் காட்டுவதற்கு சாத்தியம் உண்டு. எனவே தான் முஃப்தீ ஷஃபீஃ (ரஹ்) அவர்கள், கடிகாரங்களின் மீது இவ்வளவு உறுதியான நம்பிக்கை வைப்பது உயர்தரமான இறைக்கடமையை ஆபத்துக்குள்ளாக்குவதற்கு அசட்டுத் துணிச்சல் கொண்டதாகவே கருதப்படும், என்று கூறுகிறார்கள். (ஜவாஹிருல் ஃபிக்ஹ்)

அதனால் தான் தொழுகை நேரத்திற்காக கணக்கிடப்படும் கணக்குகளில் வரும் விடையை விட அதான் சொல்வதற்கு சில நிமிடங்கள் கூட்டியோ ஸஹரை முடிப்பதற்கு சில நிமிடங்கள் குறைத்தோ தான் தொழுகை நேர அட்டவணைகள் பரவலாக அச்சிடப்படும். ஏதாவது தொழுகை நேர அட்டவணை அந்த முறைப்படி அச்சடிக்கப்பட வில்லையானால் அதைத் திருத்தி அமைத்துக் கொள்வதும் அவசியமாகி விடுகிறது. பிள்ளைகளை பள்ளிக்கூடத்திற்கு அனுப்புவதற்காகவோ நாம் அலுவலகத்திற்கு செல்வதற்காகவோ வீட்டுக் கடிகாரத்தையோ சில நிமிடங்கள் அதிகப்படுத்தி வைத்துக் கொள்வதில்லையா?

முன் பின்னாக நேரம் காட்டும் கடிகாரம்
ஒரே ஊரில் உள்ள அனைத்து பள்ளிவாசல்களின் கடிகாரங்களும் ஒரே நேரத்தைக் காட்டுவதில்லை. சில நிமிடங்கள் முன் பின்னாகவே காட்டுகின்றன. டிஜிட்டல் கடிகாரங்கள், நாம் சரியான நேரத்தை கணக்கிட்டு வைத்தாலும் நாட்கள் செல்லச்செல்ல சில நிமிடங்கள் முன்பின்னாக காட்டிவிடுவதை நாம் பல தடவை அனுபவப் பூர்வமாக பார்த்திருக்க முடியும்.

இரண்டு மூன்று நிமிடங்கள் தானே! அதனால் என்ன ஆகிவிடப் போகிறது.? என்று சர்வ சாதாரணமாக எடுத்துக் கொள்ள முடியாது. இது ஒன்றும் நம் வீட்டுக் கடிகாரம் கிடையாது. நம்முடைய தொழுகை மற்றும் நோன்பு போன்ற முக்கியமான கடமையை நிறைவேற்றுவதற்கான பள்ளிவாசல் கடிகாரம்.

தாமதமாக ஓடினால்....?
கடிகாரம் இரண்டு மூன்று நிமிடங்கள் தாமதமாக ஓடினால் கூட தொழுகையின் நேரம் வந்த பின் தாமதமாக பாங்கு சொல்வதும் தாமதமாக நோன்பு திறப்பதும் ஏற்படும். இது கூட பரவாயில்லை. ஆனால், கடிகாரம் தாமதமாக ஓடுவதால், ஸஹர் முடிந்து இரண்டு மூன்று நிமிடங்களுக்குப் பிறகும் மக்கள் சாப்பிட்டுக் கொண்டிருப்பார்கள். அதிலும் குறிப்பாக சிலர் அல்ல, பலர் விடாப்பிடியாக பாங்கு சொல்லும் வரை சாப்பிட்டுக் கொண்டிருப்ர்கள்.

அவர்களுக்கு குர்ஆன், ஹதீஸுடைய ஆதாரங்களெல்லாம் கூட கிடைத்து விடும். ஆனால், நபி (ஸல்) அவர்களுடைய காலத்தில் இந்த கடிகாரத்தைப் பார்த்து பாங்கு சொல்லப்படவில்ல, என்பதை அவர்கள் கவனத்தில் கொள்ள வேண்டும்.  இப்படிப்பட்ட சூழலில் அந்த கடிகாரத்தின் படி பாங்கு சொல்லும் வரை சாப்பிடுவாதால் கடமையான நோன்பு பாழாகிவிடும் என்பதில் என்ன சந்தேகம்?



கூடுதலாக ஓடினால்....?
இதற்கு மாற்றமாக கடிகாரம் இரண்டு மூன்று நிமிடங்கள் கூடுதலாக ஓடினால் தொழுகையின் நேரம் வருவதற்கு முன்பே பள்ளிகளில் பாங்கு சொல்லப்பட்டு விடும். நோன்பு திறப்பதற்கான அறிவிப்பும் இரண்டு மூன்று  நிமிடங்களுக்கு முன்பாக செய்யப்பட்டு விடும். அந்த சமயத்தில் நோன்பு திறந்தவர்களுக்கு அவர்களுடைய நோன்பு நிறைவேறிவிட்டது, என்பதற்கு யார் உத்தரவாதம் கொடுக்க முடியும்?


இதை நாம் வெறும் கற்பனையாகச் சொல்ல வில்லை. பல பகுதிகளில் இந்நிலையைக் கண்கூடாகவே கண்டிருக்கிறோம். ரமளான் மாதத்திலும் இதுபோன்ற கடமையான நோன்புக்கு ஆபத்து ஏற்படும் நிலை ஏற்பட்டிருக்கிறது. ஒரே ஊரில் தொழுகை நேரம் ஒரே மாதிரியாக இருந்தும் ஒன்றிரண்டு நிமிடங்கள் முன்பின்னாக பாங்கு சொல்லப்படுகிறதே, அது ஏன் என்பதை நாம் சிந்திக்க வேண்டாமா?

கடிகாரத்தை எப்படி சரி செய்வது?
இதற்கான தீர்வு தான் என்ன? கடிகாரத்தை குறைந்தது வாரத்திற்கு ஒரு முறையாவது சரி செய்ய வேண்டும். கடிகாரத்தைச் சரி செய்ய குறிப்பிட்ட மொபைல் நெட்வொர்க்கைப் பயன்படுத்துவது உண்டு. வேறு வழிகளிலும் சரி செய்யலாம். ஒரு கடிகாரத்தைப் பார்த்து இன்னொரு கடிகாரத்தைச் சரி செய்யும் நடைமுறையும் நம்மில் இருக்கிறது. ஆனால்,  இது சரியான வழி அல்ல. என்னுடைய கைக்கடிகாரத்தின் நேரம் துல்லியமானது, என்று கூறி இதன் படியே சரி செய்ய வேண்டுமென்று பலர் வாதம் செய்யலாம்.

எனினும், நம்முடைய நாட்டின் நேரத்தைத் துல்லியமாகக் கணக்கிடும் ஒரு முறை உள்ளது. அதன்படி சரி செய்து கொண்டால் கடிகாரத்தின் நேரம் சரியானதாக ஆகிவிடும். www.timeanddate.com/worldclock/india (Current local time in india ) என்ற தளத்திற்குச் சென்று நம்முடைய கடிகாரத்தை சரி செய்து கொண்டால் துல்லியமான நேரத்தை அறிந்து கொள்ள முடியும். இந்தத் தளத்திற்குச் சென்றால் இந்தியாவின் அன்றைய தேதி மற்றும் இந்தியாவின் திட்ட நேரத்தை டிஜிட்டல் முறையிலும் துல்லியமாகக் கொடுக்கப் பட்டிருக்கும்.

ரமளானில் மட்டுமல்ல, வருடம் முழூவதும் குறைந்தது, வாரத்திற்கு ஒரு முறையாவது எல்லா பள்ளிவாசல்களிலும் இம்முறையில் நேரத்தை சரி செய்து கொள்ள வேண்டும். அப்படி தொடர்ந்து செய்து வந்தால் கடிகாரத் தவற்றை திருத்திக் கொள்ள முடியும். நீண்ட இடைவெளிக்குப் பின் கடிகாரத்தை நம்முடைய கைக்கடிகாரத்தின் மூலம் சரி செய்யும் போது கூட தவறான ஓட்டத்தைப் புரிந்து கொள்ள முடியும்.

தவிர்க்கப் படவேண்டிய சந்தேகம்
கடிகாரத்தை வினாடி தவறாமல் சரி செய்து கொண்டால் தான் நம்முடைய தொழுகையையும் நோன்பையும் பாதுகாக்க முடியும். இதில் ஏற்படக்கூடிய சந்தேகத்தைச் சரி செய்வதை நபி (ஸல்) அவர்களின் கூற்றின் மூலமும் நடைமுறைகளின் மூலமும் அறிந்து கொள்ள முடியும்.  உனக்கு சந்தேகமூட்டக் கூடிய விஷயங்களை விட்டுவிட்டு சந்தேகத்தை உண்டாக்காதவற்றை எடுத்துக்கொள் என்று நபி (ஸல்) அவர்கள் கூறியதாக ஹஸன் பின் அலி (ரலி) அவர்கள் அறிவிக்கிறார்கள். (நூல்: திர்மிதீ- 2442)

நபி (ஸல்) காலத்தில்....
நபி (ஸல்) அவர்கள் காலத்திலும் தொழுகை நேரத்தில் எவ்வித சந்தேகமும் ஏற்படாமல் இருப்பதற்காக பேணுதலுக்கான எல்லா ஏற்பாடுகளையும் நபியவர்கள் செய்தார்கள். ஒரு தடவை பிலால் (ரலி) அவர்கள் சுபுஹ் நேரம் வருவதற்கு முன்னால் பாங்கு சொல்லிவிட்டார். உடனடியாக நபி (ஸல்) அவர்கள், (அல்லாஹ்வின்) அடியார் தூங்கி விட்டார். (பாங்கு தவறாக சொல்லிவிட்டார்) என்று மக்களுக்கு அறிவிப்பு செய்ய வைத்தார்கள்.(திர்மிதீ)

அதன் பிறகு பாங்கு சொல்பவர்கள் விஷயத்தில் சிறிய மாற்றம் செய்தார்கள். அதாவது அதுவரை தஹஜ்ஜுத் (ஸஹர்) நேரத்தில் அப்துல்லாஹிப்னு உம்மி மக்தூம் (ரலி) அவர்களும் சுபுஹுக்கு பிலால் (ரலி) அவர்களும் பாங்கு சொல்லிக் கொண்டிருந்தார்கள். மேற்கூறப்பட்ட தவறு நடந்த பின் பணி நேரமாற்றம் செய்து இப்னு உம்மி மக்தூம் (ரலி) அவர்களை சுபுஹுக்கு பாங்கு சொல்ல உத்தரவிட்டார்கள்.

இந்த நபித்தோழருக்கு கண் பார்வை கிடையாதே!. ஃபஜ்ர் அதிகாலை வெளிச்சத்தை இவர் எப்படி பார்த்து பாங்கு சொல்வார்?, என்ற கேள்வி எழலாம். ஆனால், பார்வையில்லாத நபரை நியமித்தால் தான் இந்த தவற்றை முழுமையாக திருத்த முடியும். ஏனெனில். மக்கள் இவருக்கு சுபுஹ் நேரமாகி விட்டது. சுபுஹ் நேரமாகி விட்டது, என்று சொல்லும் வரை பாங்கு சொல்லமாட்டார். (நூல்: புகாரி- 582, பைஹகீ)

 தொழுகை நேரத்தில் எந்தத் தவறும் நிகழ்ந்து விடக்கூடாது என்பதற்கு நபி (ஸல்) அவர்கள் அதிக முக்கியத்துவம் கொடுத்திருக்கிறார்கள். தனி நபருடைய பார்வையில் தவறு நிகழ்வதால் உடனடியாக ஆளை மாற்றினார்கள். இப்னு உம்மி மக்தூம் (ரலி) அவர்களுக்கு பார்வை இல்லாததால் தனிநபருக்கு ஏற்படும் தவறு நிகழாது. மக்களில் பலர் அதிகாலை வெளிச்சத்தை பார்த்து சொன்ன பின்னரே அவர் பாங்கு சொல்வார்.

நேரடியாக வானத்தைப் பார்த்து பாங்கு சொல்வதிலேயே நபி (ஸல்) அவர்கள் இவ்வளவு கவனம் செலுத்தியிருக்கிறார்களென்றால் இன்று நாம் வானத்தைப் பார்ப்பதில்லை. கணக்கு போடுகிறோம். கடிகாரத்தைப் பார்க்கிறோம். முஅத்தின் என்ற ஒரு நபரின் மீது நம்பிக்கை வைக்கிறோம். இப்படிப்பட்ட சூழலில், நம்முடைய கடிகாரம் துல்லியமாக சரியான நேரத்தைக் காட்டுகிறதா? என்பதில் எவ்வளவும் கவனம் செலுத்த வேண்டியிருக்கும்? என்பதைப் புரிந்து கொள்ள முடியும்.

தலைப்பிறை பார்ப்பது எளிது!

ஷரீஅத்துடைய பல சட்டங்கள் காலத்தோடு சம்மந்தப்படுகின்றன, அவற்றில் சந்திரனின் கணக்குப்படியே கணக்கிட வேண்டும். அப்படியானால் ஒவ்வொரு மாதமும் தலைப்பிறை பார்ப்பதில் அதிக முக்கித்துவம் காட்ட வேண்டுமென்பதை புரிந்து கொள்ள முடிகிறது. ரமளான், இரு பெருநாட்கள் ஆகிய சமயத்தில் மட்டுமே தலைப்பிறை பற்றி பரவலாகப் பேசப்படுகிறது. மற்ற மாதங்களில் அதுபற்றி யாரும் கண்டு கொள்வதில்லை.

பல தடவை இலங்கையில் நமக்கு ஒரு நாள் முன்பாக பிறை பார்க்கப்பட்டு பெருநாளும் நோன்பும் அனுஷ்டிக்கப் பட்டிருகிறது. தகவல் தொழில் நுட்பம் வளர்ந்த இக்காலத்தில் பெரும்பாலும் மக்ரிப் தொழுகை முடிந்தவுடன் அங்கிருந்து பிறை பார்க்கப்பட்ட தகவல் வந்து விடுகிறது.  இலங்கை நமக்கு கிழக்கே இருக்கும் நாடாகும். கிழக்குப் பகுதியில் பிறை தென்பட்டால் மேற்குப் பகுதியில் இருப்பவர்கள் ஏற்று அமல் செய்ய வேண்டுமென்று நம்முடைய (ஷாஃபியீ) ஃபிக்ஹ் (சட்ட) நூற்களில் கூறப்பட்டுள்ளது.

ஏனெனில், கிழக்கில் பிறை பார்க்கப்பட்டால் மேற்கில் கண்டிப்பாக பிறை தென்பட்டிருக்க வேண்டுமென்பதே இயல்பு. இலங்கையில் ஒவ்வொரு மாதமும் கரையோரப் பகுதிகள் உட்பட நாட்டின் பல பாகங்களில்  பிறை பார்ப்பதற்கான பொறுப்பாளர்கள் நியமிக்கப் படுகிறார்கள். அதற்கான ஏற்பாடுகளும் நினைவூட்டல்களும் அறிவிப்புகளும் ஒவ்வொரு மாதமும் நடைபெற்றுக் கொண்டிருக்கிறது. பிறை பார்க்கப்பட வேண்டிய நாளில் அதற்கான விசேஷ அறிவிப்புகள் சமூக வலைதளங்கள் மூலம் செய்யப்படுகின்றன.

பிறை தென்படாமல் போவதற்கு மேகமூட்டம் ஒன்று மட்டுமே காரணமாக இருந்தால் அதை நாம் ஒன்றும் செய்ய முடியாது. அதே சமயம், நம்முடைய பகுதிகளில் பிறை பார்ப்பதில் மக்கள் எந்த அளவுக்கு கவனம் செலுத்துகிறார்கள்? என்பதையும் யோசிக்க வேண்டும். அவ்வாறே ஒவ்வொரு மாதத்திலும் பிறை பார்ப்பதில் முக்கியத்துவம் காட்டப்படுகிறதா? என்பதையும் கவனத்தில் கொள்ள வேண்டும்.    

பொதுவாக (ரமளான், ஷவ்வால், துல்ஹஜ் ஆகிய மாதங்களில் மட்டும்) தலைப்பிறை பற்றி முடிவு செய்யும் போது நமக்கு அறிமுகமானவர்களிடம் போன் செய்து பிறைத் தகவல் பற்றி கேட்கிறோம். மற்றவர்களும் நம்மிடம் கேட்கிறார்கள். இதில் கேட்கப்படுபவர்கள் யாரும் பிறை பார்ப்தற்கான பொறுப்பாளர்களாக நியமிக்கப் பட்டவர்கள் அல்ல. ஏதாவது தகவல் வந்தால் அதன்படி முடிவு செய்து விடுகிறோம். ஒவ்வொரு ஊரிலும் குறிப்பாக கிராமங்களில் பிறை பார்ப்பதற்கான குழு அமைக்கப்பட்டிருக்க வேண்டும். நகரத்தை விட கிராமங்களில் புகை, தூசி குறைவு என்பதால் பிறை தென்படுவதற்கான வாய்ப்பு அங்கு அதிகமாக இருக்கும். எனவே கிராமப் பகுதிகளில் அதிக முக்கியத்துவம் கொடுக்க வேண்டும்.

கட்டிடம், மரம் போன்ற எந்தத் தடையும் இல்லாத இடத்திலிருந்து பார்க்க வேண்டும். சந்திரன் எந்த நேரத்தில் மறையும், என்பது வினாடி உட்பட துல்லியமாக கணிதத்தின் மூலம் இன்று அறிந்து கொள்ள முடியும். நவீன வசதி கொண்ட மொபைல் போன்களில் (sunmooncal போன்ற) அதற்குரிய மென்பொருளை இன்ஸ்டால் செய்து அதன் மூலமே இதை அறிந்து கொள்ளலாம். அந்தந்த மாதத்தில் (வடமேற்கு, தென்மேற்கு, நேர்மேற்கு போன்ற) பிறை (மறையும் இடத்தையும்) தெரியும் இடத்தையும் முன்னரே அறிந்து கொள்ள வேண்டும். சந்திரன் மறையும் நேரம் வரை (குறிப்பாக பிறை தெரியும் இடத்தை) தொடர்ந்து பார்க்க வேண்டும். ஏனெனில் விண்ணில் இடையிடையேயுள்ள மேகம், தூசி போன்ற தடைகளால் வானம் தெளிவாக இருக்கும் ஒரு சிறிய இடத்தில் எந்த வினாடியும் பிறை தெரிந்து பிறகு மீண்டும் அடுத்திருக்கும் மேகத்திற்குள் சென்றுவிடலாம்.

இதற்கு முன்பு, குறிப்பிட்ட குறுகிய நேரத்தில் பிறை தெரிந்து விட்டு, பிறகு மேகத்தில் மறைந்த காட்சிகளை நாம் நேரடியாகவே கண்டிருக்கிறோம். ஆனால், இன்று நாம் பாங்கு சொல்லி மக்ரிப் தொழுது முடித்துவிட்டு அதற்குப் பிறகு சுன்னத்தும் தொழுது முடித்த பிறகு தான் பிறை பார்க்க முற்படுகிறோம். பிறை தெரியும் நேரத்தை இடத்தை அறிந்து பார்ப்பதை விடுத்த நாம் பார்கக வேண்டிய நேரத்திலும் நாம் பார்க்கும் திசையிலும் பிறை தெரிய வேண்டுமென்று நினைக்கிறோம். ஒவ்வொரு மாதமும் பெருநகரங்களில் மட்டுமல்ல, ஒவ்வொரு கிராமத்திலும் குறிப்பாக மேற்குக் கரையோரங்களில் - கடற்கரைப் பகுதிகளில் குறிப்பிட்ட நேரத்தில் குறிப்பிட்ட இடத்தில் பிறை பார்ப்பதற்கு நியமிக்கப்பட்ட பொறுப்பாளர்கள் முன்னரே சென்று அதிமுக்கியத்துவம் கொடுத்து பிறை தென்படும் இடத்தைக் கூர்ந்து கவனிக்க வேண்டும்.

இப்படி தமிழகம் முழுவதும் ஒவ்வொரு மாதமும் பிறைபார்த்து அதற்கான தகவல்களை உடனுக்குடன் பகிர்ந்து கொள்ளும் போது (தகவல் தொழில் நுட்பம் வளர்ந்த இந்த காலத்தில்) பரவலாக ஏற்படும் பிறைக் குழப்பத்தை ஓரளவு தவிர்த்துக் கொள்ள முடியும். ஆனால், நடைமுறையில் கடற்கரைப் பகுதிகளில் சென்று ஒவ்வொரு மாதமும் பிறை பார்ப்பதில் அதிக கவனம் செலுத்தப் படுவதில்லை. ஏன்? இருந்த இடத்தில் இருந்து கொண்டு கூட அதில் கவனம் செலுத்துவது மிகவும் குறைவு, என்றே சொல்ல வேண்டும். வானத்தில் பார்க்கப்பட வேண்டிய பிறையை நாம் வாட்ஸப்பில் தேடிக்கொண்டிருக்கிறோம், என்பதே நடப்பு உண்மை.

கடந்த (1438) துல்கஃதா மாதம் தமிழகத்தில் பரவலாக பிறை தென்படவில்லை, என்ற தகவலே வந்தது. என்று சொல்வதை விட பிறை தெரிந்தது, என்றோ தெரியவில்லை என்றோ அது தொடர்பான எந்தத் தகவலும் வரவில்லை. ஒவ்வொரு ஊரிலும் எவ்வளவு பேர் தலைப்பிறை பார்ப்பதற்கு முயற்சி செய்தார்கள், என்பது தெரியவில்லை. ஆனால், துல்கஃதா மாதத்தின் தலைப்பிறை பார்க்கப்பட வேண்டிய நாளான ஜூலை மாதம் 24 ஆம் தேதி திண்டுக்கல்லில் சூரியன் மறைவு 6 மணி 43 நிமிடங்களாகும். அன்று சந்திரன் மறைவு 7 மணி 40 நிமிடங்களாகும். சூரியன் மறைவுக்கும் சந்திரன் மறைவுக்கும் மத்தியில் ஏறத்தாழ ஒரு மணி நேரம் வித்தியாசம் இருந்துள்ளது. தமிழகத்தின் மற்ற ஊர்களில் ஒரு சில நிமிடங்கள் வித்தியாசமிருக்கும்.

 பிறை தெரிவதற்கான வாய்ப்பு மிகத் தெளிவாக இருந்தும் பரவலாக தமிழகத்தில் பிறை பார்க்கப்பட வில்லை. ளரஅடிடிஉயட  என்ற மென்பொருளிலும் பிறை புறக்கண்ணுக்கு எளிதாக தென்படும் என்ற தகவலே கொடுக்கப் பட்டிருந்தது. இந்நிலையில் அன்று திண்டுக்கல்லில் மக்ரிப் தொழுகை முடிந்த பின் வானம் தெளிவாக இருந்தது. பிறையும் மிகத் தெளிவாகத் தெரிந்தது. பிறை பார்த்தவர் திண்டுக்கல்லில் மற்றொருவருக்கும் அதே நேரத்தில் போன் மூலம் தகவல் கொடுத்து குறிப்பிட்ட இடத்தில் பிறை பார்க்குமாறு கூறியதை அடுத்தும் அவரும் அவ்விடத்தில் இருந்த வேறு சிலரும் துல்கஃத் தலைப்பிறையைத் தெளிவாக பார்த்துள்ளனர். அதன் பிறகு காரைக்காலிலும் (பாண்டிச்சேரி) பிறை பார்த்ததாக தகவல் கிடைத்தது. அதன் படி 25 ஆம் தேதி செவ்வாய் கிழமை துல்கஃதா பிறை ஒன்று என தமிழ்நாட்டில் மட்டுமல்ல. வடநாட்டிலும் அறிவிக்கப்பட்டது.

இந்தியா முழுவதற்கும் திண்டுக்கல்லில் பார்க்கப்பட்ட பிறை மூலமே முடிவு செய்யப்பட்டது, என்பதும் ஓர் அரிய செய்தி. ஏனில், தாருல் உலூம் தேவ்பந்த் - தாருல் இஃப்தாவிலிருந்து பிறை பார்த்தவரை போனில் அழைத்து பிறைத் தகவலை உறுதிப் படுத்திக் கொண்டார்கள்.  திண்டுக்கல்லிலும் கூட சிறிது நேரம் மறதியாக இருந்துவிட்டால் அந்தப் பிறை பார்க்கப் படாமல் போயிருக்கலாம். அந்த அளவுக்கு மிக மெல்லியதாகவும் அதுவும் அடிவானத்தில் தெரிந்தது. பரவலாக தமிழகத்தின் கிராமங்கள் உட்பட பல ஊர்களில் அன்று பிறை பார்ப்பதற்கு ஏற்பாடு செய்யப்பட்டிருந்தால் கண்டிப்பாக தமிழகத்தின் ஏராளாமான இடங்களில் பிறை தெரிந்திருக்கும், இன்ஷாஅல்லாஹ். ஒரு மாதத்தில் நிகழும் அலட்சியம் அடுத்தடுத்த மாதங்களிலும் பிரதிபலிப்பை ஏற்படுத்திவிடும், என்பதை யார் தான் மறுக்க முடியும்?!

Night sky tools
நைட் ஸ்கை டூல்ஸ் என்ற மென்பொருளை உங்களுடைய மொபைலில் இன்ஸ்டால் செய்து கொண்டால் அதன் மூலம் பிறையை எந்தத் திசையில் பார்க்க வேண்டும், என்பதை துல்லியமாகத் தெரிந்து கொள்ள முடியும்.  நீங்கள் மொத்த வானிலும் பிறையை சிரமப்பட்டுத் தேட வேண்டியதில்லை. பிறை இந்த இடத்தில் இருக்கிறது, என்பதை மிகத் துல்லியமாக இந்த மென்பொருள் காட்டும்.
இந்த மென்பொருளில் உள்ளே சென்று ஜெனரல் - ஜ செலக்ட் செய்து ஸ்கை மேப் என்பதை அழுத்தினால் நான்கு சுவர்களுக்குள்ளே இருட்டறையில் உட்கார்ந்து கொண்டு மொத்த வானத்தையும் மொபைல் திரையில் பார்க்கலாம். சூரியன் உச்சத்தில் இருக்கும் போது உங்களுடைய அறைக்குள்ளே  இருந்தவாறு மொபைலை தலைக்கு மேல் வானத்தை நோக்கிக் காட்டினால் மொபைல் ஸ்கிரீனில் வானில் இருக்கும் சூரியன் தெளிவாகத் தெரியும். சூரியன் மட்டுமல்ல. நீங்கள் மொபைலை எந்தத் திசையில் வானத்தை நோக்கி காட்டுகிறீர்களோ அந்தத் திசையில் வானத்தில் இருக்கும் நட்சத்திரங்கள், சூரியன், சந்திரன் எதுவெல்லாம் இருக்கிறதோ அனைத்தையும் காட்டிவிடும்.

போனை உங்கள் மூடிய அறைக்குள் இருந்து கொண்டே வானை நோக்கிக் கட்டினால் போதும். நீங்கள் காமெராவில் போட்டோ எடுப்பது போன்று வானில் இருக்கும் ஒவ்வொரு நட்சத்திரங்களும், கோள்களும், ராசிகளும் அவற்றின் பெயர்களுடன் உங்கள் போனின் திரையில் தெரியும்.  தலைப்பிறை பார்க்கும் நாளில் சூரியன் மறைந்த பிறகு உங்கள் போனில் உள்ள நைட்ஸ்கை டூல்ஸ்  - ஜெனரல் - ஸ்கை மேப்பை ஓப்பன் செய்து மேற்கு வானத்தை நோக்கிக் காட்டினால் அடிவானத்திற்குக் கீழே மறைந்த சூரியனையும் காட்டும். அதற்கு மேல்பகுதியில் தலைப்பிறை எந்த இடத்தில் இருக்கிறது, என்பதையும் காட்டும்.

போனை விலக்கி விட்டு வானத்தில் அந்த இடத்தில் பிறையைத் தேடிக் கொள்ளலாம். வானம் முழுவதும் அலச வேண்டிய தேவையில்லை. பிறை நேர் மேற்கில் தெரியுமா? அல்லது மேற்கிலிருந்து தெற்காக சாய்ந்து தென்மேற்கில் தெரியுமா? அல்லது மேற்கிலிருந்து தெற்காக சாய்ந்து தென்மேற்கில் தெரியுமா? அல்லது மேற்கிலிருந்து வடக்காகச் சாய்ந்து வடமேற்கில் தெரியுமா? என்பதையும் இந்த மென்பொருள் தெளிவாகக் காட்டிவிடும்.

குறிப்பு: இந்த மென்பொருள் உங்கள் மொபைலில் இயங்குவதற்கு accelerometer வசதி மட்டும் இருந்தால் போதாது. உங்களுடையடைய மொபைலில் காம்பஸ் சென்ஸார் வசதி இருக்க வேண்டும். அந்த வசதி இல்லையானால் இந்த மென்பொருளைப் பயன்படுத்த முடியாது. கிப்லா காட்டி தொடர்பான எந்த மென்பொருளும் இயங்காது. உங்கள் மொபைலில் கிப்லா காம்பஸ் செயல்பட்டால் இந்த மென்பொருளும் இயங்கும்.

காதல் கொலைகள்

இன்று நாட்டில் கொலைகள் அதிகமாகி வருகின்றன. ஓர் உயிரின் மதிப்பைக்கூட விளங்கத் தெரியாதவன் எப்படி அவன் மனிதனாக இருக்க முடியும்? சட்டத்தின் ஆட்சி நடக்கும் நாட்டில் தைரியமாக கொலைக்காரர்கள் தங்களுடைய திட்டங்களை செயல்படுத்திக் கொண்டிருக்கிறார்கள், என்றால் பயம் கலந்த ஆச்சரியத்தையே உணர முடிகிறது. அதுவும் பெண்களின் மோகத்தால் நடக்கும் காதல் கொலைகன் தான் கொடூரமானவை.

காதல் கலாச்சாரம்
காதல் என்பது கட்டாயக் கலாச்சாரம் போல் ஆக்கப்பட்டு விட்ட இந்த காலத்தில் பல கொலைகளுக்கு அந்தக் காதலே பிரதான காரணம் என்றாகிவிட்டால் காதல் கலாச்சாரத்தை இதற்குப் பிறகும் புனிதமாகக் கருதிக் கொண்டிருந்தால் அதற்கு சிந்தனைக் கோளாறு என்று சொல்வதை விட வேறென்ன சொல்ல முடியும்? படுகேவலமான பல கலாச்சாரத்தை நாம் புனிதமாகக் கருதிக் கொண்டிருக்கிறோம்

ஆனால, அவற்றின் மூலம் ஒவ்வொரு நாளும் மனித சமுதாயம் அனுபவிக்கும் நஷ்டங்கள் சாதாரணமானவையல்ல. கெட்ட சிந்தனையால் மூளைச்சலவை செய்யப்படுவதையே சீரிய சிந்தனை என்று மார்தட்டிக் கொள்பவர்கள் இருக்கும் வரை அந்த நஷ்டங்களுக்கு முடிவு கிடைக்கப் போவதில்லை.

விசித்திரமான காதல் கொலைகள்
உத்திர பிரதேசத்தில் விஷ்ணு என்பவருக்கு ஒரு மகள். ஒரு நாள் அவர் தனது வீட்டில் தூங்கிக் கொண்டிருக்கும்போது அதிகாலை நான்கு மணிக்கு அவரது மகளின் அறையில் சத்தம் கேட்டுள்ளது.  இதனையடுத்து,  அவர் தனது மகளின் அறைக்குச் சென்றுள்ளார். அங்கே அவரது மகள் தனது காதலனுடன் சிரித்துப் பேசிக் கொண்டிருப்பதைப் பார்த்து அவர் கடுமையான கோபமடைந்தார். பின்பு தனது மகளின் காதலனை எச்சரித்தார்.  இதனால் அவருக்கும் மகளின் காதலனுக்கும் வாய்த் தகராறு ஏற்பட்டது.

ஒரு கட்டத்தில் வாய்த்தகராறு சண்டையாக மாறியது. அப்போது மகளும் அவரது காதலனும் சேர்ந்து அவரை மொட்டைமாடியிலிருந்து தள்ளிவிட்டதாக கூறப்படுகிறது. இதனால் அவர் பரிதாபமாக உயிரிழந்தார்.  தூத்துக்குடி மாவட்டத்தில் ஒரு 14 வயது சிறுவன் ஆறு வயது சிறுமியை பலாத்காரம் செய்ய முற்பட்ட போது அச்சிறுமியை நெருப்பு வைத்து எரித்துவிட்டான்.

ஒருதலைக் காதலால் ஏற்படும் கொலைகளும் ஊடகங்கள் வாயிலாக பரவலாகவே வந்து கொண்டிருக்கின்றன. ஒரு பெண்ணுடன், தான் கொண்டிருந்த கள்ளத் தொடர்புக்கு அவளுடைய மகனே தடையாக இருந்தான், என்பதற்காக ஒன்பதே வயதான அச்சிறுவனை கள்ளக் காதல் கொண்டவன் கொன்று விட்டான், என்ற செய்தியையும் நாளிதழ்களில் படித்திருக்கிறோம்.

ஓர் உயிர் ஓர் உலகம்
சமீபத்தில் சென்னை கே. கே. நகரில் கல்லூரியின் வாசலில் காதலனால் கொல்லப்பட்ட ஓர் இளம்பெண்ணுடைய செய்தி தமிழகம் முழுவதும் பரபரப்பை ஏற்படுத்தியது. பட்டப்பகலில் தைரியமாக கொலை செய்யும் அளவுக்கு துணிச்சலை காதல் மனோநிலை கொடுக்கிறது, என்றால் காதல் - காமம் கண்ணைக் குருடாக்கும்; காதைச் செவிடாக்கும், என்று சொல்வது நிதர்சனமாக்கப் பட்டிருப்பதையே காட்டுகிறது. இது போன்று ஏகப்பட்ட கொலைகள் உலகம் முழுவதும நடந்து கொண்டிருக்கின்றன. கொலையாளிகளுக்கு அக்காரியம் சாதாரணமாகத் தெரியலாம்.

ஆனால், கொல்லப் பட்டவர்களைப் பொறுத்தவரை ஒர் உயிர் என்பது சாதரணமானதல்ல. அந்த உயிர் தான் அந்தக் குடும்பத்தின் தூணாக இருக்கும். ஒட்டுமொத்த குடும்பத்தார்களின் வாழ்க்கையும் அந்த ஓர் உயிரில் முடங்கிக் கிடக்கும். ஓர் உயிரைக் கொன்றவன் முழு மனித சமுதாயத்தையும் கொன்றதைப் போல என்று குர்ஆன் சொல்வதை இங்கு நினைவு கூர்வது பொருத்தமானது.

காதல் கண்ணைக் குருடாக்கும்
நபி (ஸல்) அவர்கள் நீ ஒன்றைப் பிரியப்படுவது கண்ணைக் குருடாக்கிவிடும்; காதைச் செவிடாக்கி விடும், என்று கூறியுள்ளார்கள், என்பதும் இங்கு நினைவு கூரத்தக்கது. ஒரு பெண்ணை அடைய வேண்டுமென்பதற்காக மனிதன் எதையும் செய்வான், என்பதற்கான சான்றுகளை  வரலாற்றின் பல பக்கங்களில் பார்க்க முடியும்.

இஸ்லாத்தில் ஹிஜ்ரத் - நாடு துறத்தல் என்பது மிக முக்கியமான மிகுந்த நன்மைக்குரிய காரியமாகும். நபி (ஸல்) அவர்களின் காலத்தில் மக்காவிலிருந்து மதீனாவுக்கு ஹிஜ்ரா செய்து செல்வதென்பது கட்டாயமாக்கப் பட்டிருந்தது. நபித் தோழர்கள் ஹிஜ்ரத் செய்து மதீனாவுக்கு செல்வதை யாவற்றையும் விட முக்கியத்துவம் கொடுத்தார்கள். அதற்காக தங்களுடைய சொத்துக்களை இழந்தார்கள். மனைவியையும் பிள்ளைகளையும் பிரிந்தார்கள். தாய் தந்தை உறவுகளையும் பிரிய வேண்டிய நிர்பந்தத்திற்கு ஆளானார்கள். எல்லாவற்றையும் தியாகம் செய்து மதீனாவுக்கு செல்வதையே முழுமுதற்கடமையாக நினைத்தார்கள். முயாஜிர் உம்மு கைஸ இந்நிலையில், ஒரு மனிதர் உம்முகைஸ் என்ற பெண்மணியைத் திருமணம் செய்யும் நோக்கில் ஹிஜ்ரத் செய்தார். அம்மனிதரின் பெயரும் அறியப்படவில்லை. ஒரு மனிதர் உம்முகைஸ் என்ற பெண்ணை திருமணம் செய்வதற்கு பெண் பேசினார். அப்பெண்மணி, ஹிஜ்ரத் செய்தால் தான் திருமணம் செய்ய முடியும். இல்லையானால் உங்களை கணவராக ஏற்றுக் கொள்ள மாட்டேன், என்று கூறிவிட்டார். எனவே, அம்மனிதர் ஹிஜ்ரத் செய்தார். அப்பெண்ணை திருமணம் செய்து கொண்டார். அவருக்கு முஹாஜிர் உம்முகைஸ் - உம்முகைஸ் என்ற பெண்ணுக்காக ஹிஜ்ரத் செய்தவர், என்று பெயரிட்டோம், என்று இப்னு மஸ்வூத் (ரலி) அவர்கள் கூறுகிறார்கள். (மஃரிஃபதுஸ் ஸஹாபா)

அம்மனிதருடைய இயற்பெயர் என்ன என்பதைக் கூட அறியமுடியவில்லை. முஹாஜிர் உம்மு கைஸ் என்றே சரித்திரத்தில் பிரபல்யமாகிவிட்டது. ஹிஜ்ரத் என்ற உயர்தரமான வணக்க வழிபாட்டை ஒரு பெண்ணுக்காக செய்தமையால் அவருக்கு ஹிஜ்ரத்தின் மூலம் அந்தப் பெண் வேண்டுமேனால் கிடைக்கலாம். ஹிஜ்ரத்துடைய நன்மை கிடைக்குமா? என்று சொல்ல முடியாது, என்பதை உணர்த்தும் விதமாக நபி (ஸல்) இன்னமல் அஃமாலு பின்னிய்யாத் - செயல்களெல்லாம் (அவற்றுக்கு நன்மைகள் வழங்கப்படுவது) நிய்யத்தை - செய்யும் நோக்கத்தின் அடிப்படையிலேயே அமையும். உலகைப் பெற்றுக் கொள்ளும் நோக்கிலோ அல்லது ஒரு பெண்ணைத் திருமணம் செய்யும் நோக்கிலோ ஹிஜ்ரத் அமைந்திருக்குமேயானால் அவன் எதற்காக ஹிஜ்ரத் செய்தானோ அதையே பெற்றுக்கொள்வான், என்று கூறினார்கள்.

காதலுக்காக கலீஃபாவின் தலை!
நான்காம் கலீஃபா அலீ (ரலி) அவர்களை திட்டமிட்டு கொலை செய்தவன் இப்னு முல்ஜம் என்பவன் ஆவான். அவன் ஒரு பெண்ணைச் சந்திந்தான். அவளுடைய அழகில் மயங்கி விட்டான். அவளைத் திருமணம் செய்ய ஆசை கொண்டான். அப்பொழுது அந்தப் பெண்மணி இப்னு முல்ஜம் தன்னைத் திருமணம் செய்ய வேண்டுமென்றால் அலி (ரலி) அவர்களைக் கொலை செய்தாக வேண்டும், என்ற நிபந்தனையும் கட்டாயமாக்ககினாள்.

ஏற்கனவே கொலைத் திட்டத்தில் இருந்த இப்னு முல்ஜமுக்கு இது பெரிய காரியமாகத் தெரியவில்லை. அவள் விரும்பியதையே அவளுக்கு மஹராகவும் வழங்கி கொலை செய்வதற்கான நடவடிக்கைகளில் இறங்கினான். இறுதியாக அவன் மூலம் அலி (ரலி) அவர்கள் ஷஹிதாக்கப் பட்டுவிட்டார்கள்.

லைலா மஜ்னூன்
லைலா மஜ்னூனுடைய கதை சரித்திரத்தில் பிரபல்யமானது. மஜ்னூன் மூலம் அவருடைய தந்தைக்கு ஏற்பட்ட அவப்பெயரை நீக்குவதற்காக மகனை கஃபதுல்லாஹ்வுக்கு அழைத்துச் சென்று மகாமெ இபுறாகீம் இருக்கும் இடத்தில் மஜ்னூனை நிறுத்தி லைலாவின் மீதுள்ள மோகத்திலிருந்து தௌபா செய்யுமாறு உத்தரவிட்டார். இதைக் கேட்ட  மஜ்னூன் எல்லா பாவங்களிலிருந்தும் மன்னிப்பு தேடுகிறேன். ஆனால், லைலவுடைய பிரியத்திலிருந்து தௌபா செய்ய மாட்டேன், என்று சொன்னது மட்டுமல்ல, இறைவா அவளின் மீதுள்ள மோகத்தை ஒரு போதும் என்னுடைய உள்ளத்தை விட்டும் அகற்றிவிடாதே! யாரெல்லாம் இந்த துஆவுக்கு ஆமீன் சொல்கிறாரோ அவர்களுக்கு அல்லாஹ் ரஹ்மத் செய்வானாக!,  என்றும் கூறினார்.

கருணைக் கொலை

கடந்த மார்ச் மாதம் ஒன்பதாம் தேதி உச்சநீதி மன்றம் கருணைக்கொலை தொடர்பான ஒரு தீர்ப்பை வழங்கியுள்ளது. அதில், தீராத நோயால் படுக்கையில் செயலற்று கிடக்கிற நோயாளிகள் வாழ விரும்பாத போது கண்ணியமாக உயிர் துறக்க ஏற்ற வகையில் மருத்துவ உபகரணங்களை நீக்கி கருணைக்கொலை செய்வதற்கு அனுமதி வழங்கி நீதிபதிகள் தீர்ப்பு அளித்தனர். இது தொடர்பாக வழிகாட்டு நெறிமுறைகளையும் அவர்கள் வகுத்து அளித்தனர். வாழ்க்கையின் இறுதி நாள்களோடு போராடிக் கொண்டிருப்பவர்கள் இன்னல் படாமல் தங்களது உயிரைத் துறப்பதற்கான வாய்ப்பை அளிக்க வேண்டும் என்றும் உச்சநீதிமன்றம்,  தனது தீர்ப்பில் தெரிவித்துள்ளது.


கருணைக்கொலையின் வகைகள்
கருணைக்கொலை (ஆக்டிவ்யுதான்சியா) என்பது, ஒருவரை, விஷ ஊசி போட்டோ அல்லது வேறு முறைகளிலோ,  டாக்டர்கள் முன்னிலையில் உடனடியாக சாக அனுமதிப்பதாகும்.

அதே நேரத்தில் , கருணைக்கொலையின் அடுத்த கட்டமான, பாசிவ்யுதான்சியா என்பது, மருத்துவ உபகரணங்கள் உதவியுடன் ஒருவரை உயிர்வாழச் செய்வதை தவிர்த்து,  அவரது உயிரை,  சிறிது நேரத்தில் அகற்றுவதாகும். அதாவது,  நோயாளி மரணமடைய வேண்டும் என்பதற்காகவே,  அவருக்கு அளிக்கப்படும் மருத்துவ சிகிச்சையை வாபஸ் பெறுவது. உதாரணமாக, ஒருவர் உயிர்வாழ சிறுநீரக டயாலிசிஸ் அவசியம் எனில், அதை செய்யாமல், டயாலிசிஸ் இயந்திரத்துடனான இணைப்பை துண்டித்து,  நோயாளியை சாக விடுவதாகும்.

அதேபோல செயற்கை சுவாசக்கருவி இணைப்பைத் துண்டிப்பதும் மற்றொரு வகை. இதை, பேசிவ்யுதான்சியா எனலாம்.


விஷஊசி போட்டோ அல்லது மற்ற முறைகளிலோ , டாக்டர்கள் முன்னிலையில் ஒருவரை சாக அனுமதிப்பது (ஆக்டிவ்யுதான்சியா) சட்டவிரோதம் என, சுப்ரீம்கோர்ட் தெரிவித்துள்ளது. அதே நேரத்தில் , உயிர் காக்கும் மருத்துவ உபகரணங்களின் இணைப்பை துண்டித்து, ஒருவரின் உயிர் போக அனுமதிப்பதை , அசாதாரணமான சூழ்நிலைகளில் மட்டுமே அமல் படுத்தலாம் என,  நீதிபதிகள் கூறியுள்ளனர். மேலும், இந்த இரண்டு விதமான கருணைக்கொலைகள் தொடர்பாக, பார்லிமென்டில் சட்டம் நிறைவேற்றப்படும் வரை, இந்தத் தீர்ப்பு அமலில் இருக்கும் என்றும் தெளிவாகத் தெரிவித்துள்ளனர்.


கொலைக்குற்றம்
இஸ்லாத்தின் பார்வையில் கொலை என்பது முற்றிலுமாக தடை செய்யப்பட்டதாகும். கருணைக்கொலை என்கிற பெயரால் விஷ ஊசி போட்டு கொடூரக்கொலை செய்வதை மார்க்கம் ஒருபோதும் அனுமதிக்காது. வாழும் ஒருவரை ஆக்டிவ்யுதான்சியா முறையில் விஷஊசியின் மூலம் மரணிக்கச் செய்வதும் கொலை செய்வதும் சமமாகவே பார்க்கப்படும்.

கொலை செய்தல் தொடர்பாக குர்ஆனில் அதிகமான வசனங்களில் பலவிதங்களில் எச்சரிக்கை செய்யப்பட்டிருக்கிறது. சொல்லப்போனால், உலகில் வெளிப்படையாக முதன்முதலில் நடைபெற்ற பெருங்குற்றம் கொலைக்குற்றம் தான். ஆதம் (அலை) அவர்களுடைய இரண்டு மகன்களில் ஒருவர் மற்றொருவரைக் கொலை செய்து உலகிற்கு கொலைக்குற்றத்தை அறிமுகப்படுத்தி வைத்தனர். எனவே, உலகில் நடக்கும் ஒவ்வொரு கொலையின் பாவத்திலும் ஒரு பங்கு முதல் கொலைக் குற்றவாளிக்கு போய்ச்சேரும், என்று கூறப்படுகிறது.

ஓர் உயிரைக் கொன்றால் அவன் மனித சமூகத்தையே கொன்று விட்டது போன்றும் ஓர் உயிரை வாழவிட்டால் மனித சமூகத்தையே வாழ வைத்தது போன்றும் ஆகும், என்று குர்ஆன் தீர்ப்பளித்தது. நபி (ஸல்) அவர்கள் பெரும்பாவங்களின் வரிசைப் பட்டியலில் கொலைக்குற்றத்தையும் இடம்பெறச் செய்தார்கள்.  தேடித்தேடி அநியாயமாக இரத்தம் ஓட்டுபவன் அல்லாஹ்விடத்தில் மிகவும் கோபத்திற்குள்ளானவன், என்று நபி (ஸல்) அவர்கள் கூறினார்கள். (புகாரி)

பாசிவ்யுதான்சியா முறையில் கருணைக்கொலை செய்யப்படுவதிலும் கூட பலருடைய  சுயநலத்தின் காரணமாக தவறாகப் பயன்படுத்தப் பட்டு விடலாம். எனவே, அப்படியொரு நடவடிக்கையில் இறங்குவதை இஸ்லாம் அனுமதிக்காது. சில சமயங்களில் சொத்துக்காகவோ அல்லது சொந்த ஆதாயத்திற்காகவோ சிலர் இதை அடுத்தவரை கொலை செய்ய உபயோகப் படுத்திக்  கொள்ளக்கூடும். சாதாரணமாக கருணைக்கொலை அனுமதிக்கப்பட்டால் , பல குடும்பங்களில் பெற்றோரையே கருணைக்கொலை செய்யும் வாரிசுகள் பலர் உருவாகும் வாய்ப்பும் உண்டு.


மருத்துவர்கள்,  உளவியல் ரீதியாகப் பார்த்தால் கருணைக்கொலைக்கான தேவை இருக்கிறது, என்று கூறுகின்றனர். வலி மற்றும்  உடல் அவர்களது கட்டுப்பாட்டில் இல்லை, என்கிற உண்மையை ஏற்றுக் கொள்ள முடியாதவர்கள் தான் கருணைக்கொலை செய்யச் சொல்லிக் கேட்கிறார்கள்.



மரண ஆசை கூடாது
இஸ்லாத்தைப் பொறுத்தவரை தனக்கு ஏற்பட்டிருக்கும் வியாதி, துக்கம், கஷ்டம், வேதனை போன்ற வற்றின் காரணமாகவும் மரணத்தை ஆசைப்படக்கூடாது. தனக்கு வழங்கப்படும் சிகிச்சையையும் நிறுத்துமாறு கோரிக்கை வைக்கக் கூடாது. தன்னுடைய மரணத்தைத் தானே தேடிக்கொள்வதை எந்த வகையிலும் இஸ்லாம் அனுமிதிப்பதில்லை.

உச்சகட்ட வேதனையில் இருந்தால் தாங்கிக் கொள்ள முடியாத வேதனையில் இருந்தால் யாஅல்லாஹ்! நான் வாழ்வதில் எனக்கு நலவு இருந்தால் என்னை வாழவை! நான் இறப்பதில் தான் எனக்கு நன்மை இருந்தால் என்னை மரணிக்கச் செய்!, என்று துஆ செய்யலாம்.

வியாதியிலும் நன்மை உண்டு
மருத்துவர்கள் கூறும் உளவியல் ரீதியான காரணத்தை, மறுமையின் இன்பங்களைச் சொல்லி நோயாளியின் மனோநிலையை மாற்றிவிட முடியும், என்பது தான் இஸ்லாம் எடுத்து வைக்கும் மாற்று யோசனையாகும். ஒரு முஸ்லிம் அனுபவிக்கும் துக்கம், கஷ்டம், மனவேதனை, துன்பம் என எதுவாக இருந்தாலும் ஏன் காலில் குத்திவிடும் முள்ளாக இருந்தாலும் கூட அவற்றுக்கெல்லாம் பகரமாக அவனுடைய பாவங்கள் மன்னிக்கப்படும், என்று நபி (ஸல்) அவர்கள் கூறினார்கள். (புகாரி)

ஒரு முஸ்லிம் அனுபவிக்கும் எந்தக் கஷ்டமும் பலனின்றி வீண்போய்விடாது. அவன் படும் துன்பங்களால் அவனுடைய பாவங்கள் மன்னிக்கப்பட்டு விடும். பாவக்கடலில் மூழ்கிக் கிடப்பவர்களுக்கு பாவங்கள் மன்னிக்கப்படுவதை விட உயர்ந்த அந்தஸ்து வேறென்னவாக இருக்க முடியும். அல்லது அவர் அனுபவிக்கும் கஷ்டங்களின் மூலம் மறுமையில் அவருடைய அந்தஸ்து உயர்த்தப் படும்.

மரணத்திற்குப் பின் சுவனத்தில் தன்னுடைய நல்லமல்களின் மூலம் உயர்நிலையை அடைய முடியாதவர்களுக்கு உலகின் உடல் மற்றும் உள்ள ரீதியான துயரங்களின் போது பொறுமை செய்வதன் மூலம் அடைந்துவிட முடியுமென்று இஸ்லாம் போதிக்கிறது.

பெற்றோர் பாசம்
பிள்ளைகளின் தாயும் தந்தையும் வேலைக்குச் சென்று விட பணிப்பெண்ணை வைத்து பிள்ளைகளை வளர்க்கும் கலாச்சாரம் கொண்ட சமூகத்தில் அத்துடன் பெற்றோர் வயதாகி விட்டால் தாய், தந்தையர்களை முதியோர் இல்லத்தில் சேர்த்துவிடும் கலாச்சாரம் கொண்ட சமூகத்தில் பெற்றோர்கள் நோயாளியாகி விட்டால் எப்படி கனிவுடன் கவனிப்பார்கள். ஆனால், இஸ்லாம் இது போன்ற கலாச்சாரத்திற்கு முற்றிலும் எதிரானது.

பெற்றெடுக்கும் குழந்தையை தாயே தன்னுடைய அரவணைப்பில் வளர்த்து தாய்ப் பாசத்தையும் தந்தைப் பாசத்தையும் கற்றுக்கொடுத்து பிள்ளைகளை வளர்க்க வேண்டுமென்று போதிக்கும் மார்க்கம் இஸ்லாம். அத்துடன், தாய், தந்தையர்கள் எவ்வளவு தான் வயதானாலும் அவர்களிடம் மனம் நோகும்படியான வார்த்தையைக் கூட பேசக்கூடாது. பெற்றறோர்களுக்கு பணிவிடை செய்து அவர்களின் துஆவைப் பெற்றுக் கொள்ளாதவன் மறுமையில் நரக வேதனையை அனுபவிக்க வேண்டியிருக்கும், என்று எச்சரிக்கும் மார்க்கம் இஸ்லாம்.

பெற்றோர்களிடம் மட்டுமல்ல, மற்ற எல்லா உறவினர்களிடமும் நல்ல முறையில் நடந்து கொள்ள வேண்டுமென்று போதிக்கிறது. இந்த சிந்தனையில் - கலாச்சாரத்தில் வளரக்கூடிய மக்களுக்கு கருணைக்கொலையின் தேவை ஏற்படாது. எவ்வளவு சிரமமாக இருந்தாலும் பிள்ளைகள் தங்களுடைய பெற்றோரை உயிருக்கு உயிராய் பார்த்துக் கொள்வார்கள். தாங்க முடியாத வேதனையின் காரணமாக யாரையும் விஷ ஊசி போட்டு இறக்க வைக்கக் கூடாது. அப்படிச் செய்தால் மார்க்கத்தின் பார்வையில் அது கொலைக் குற்றமாகக் கருதப்படும். நல்ல வசதி வாய்ப்பு இருந்தும் சீக்கிரம் மரணித்து விட வேண்டும், என்ற நோக்கில் சிகிச்சையை நிறுத்திவிடுதையும் மார்க்கம் அனுமதிக்காது.

செயற்கை சுவாசக் கருவியை அகற்றலாமா?
அதேசமயம் ஒருவருக்கு வெண்டிலேட்டர் மூலம் சுவாசதத்திற்கான ஏற்பாடு செய்யப்பட்டிருக்கிறது. போகப்போக சுயமாக மூச்சுவிடும் நிலையை நோயாளி பெற்றுவிடுவார், என்று மருத்துவர்கள் கூறினால் சிகிச்சையைத் தொடர வேண்டும். எனினும், நோயாளி சிகிச்சைக்கான பொருளாதார வசதியைப் பெற்றிருக்கவில்லை. வாரிசுகளும் பொருளாதாரச் சுமையை சுமக்க முடியாமல் இருக்கின்றனர். அவருடைய சிகிச்சைக்கான வேறு எந்த வழியும் இல்லையானால் இப்படிப்பட்ட இக்கட்டான சூழலில் செயற்கை சுவாசக் கருவியை அகற்றிவிடலாம். நோயாளி செயற்கை சுவாசக் கருவியின் மூலம் சுவாசித்துக் கொண்டிருக்கிறார். எனினும். எவ்வளவு நாட்கள் ஆனாலும் இதே நிலையில் தான் சுவாசிக்க முடியும்., இயல்பாக சுவாசிக்கும் நிலையை நோயாளி அடையவே முடியாது, என்று மருத்துவர்கள் உறுதியாகச் சொல்லிவிட்டால் செயற்கை சுவாசக் கருவியை அகற்றிவிடலாம் (அதனால் அவர்கள் அல்லாஹ்விடம் குற்றவாளியாக ஆக மாட்டார்கள்.)                                                பார்க்க: நயே மஸாயில் - இந்திய இஸ்லாமிக் ஃபிக்ஹ் அகாடமீ


பயங்கரமான காயங்கள் ஒருவருக்கு இருக்க மருத்துவர்களின் மூலம் அவருக்கு சிகிச்சை செய்வதன் மூலம் சுகம் பெறுவார், என்றோ அல்லது சுகமும் கிடைக்கலாம், மரணிக்கவும் செய்யலாம் என்றோ சொன்னால் அவருக்கு சிகிச்சை செய்யப்பட வேண்டும். அவர் சுகமடையவே மாட்டார், இந்த வியாதியிலே அவர் இறந்து விடுவார், என்று கூறப்பட்டால் சிகிச்சை செய்யாமல் அப்படியே விட்டுவிடலாம். (அல்ஃபதாவல் ஹிந்திய்யா)

உலகுக்கே வழிகாட்டும் உமர் (ரலி) யின் உன்னத ஆட்சி

இன்று ஜனநாயகத்திற்கு ஆபத்து என்று நீதித் துறையிலிருந்து அபாய ஒலிகள் எழுப்படும் நிலையில் நிர்வகத்துறை முற்றிலுமாக தோற்றுப் போய்விட்டதையே மக்கள் உணர்கிறார்கள். ஜனநாயகம் என்ற பெயரில் சாவாதிகாரம் தான் நடக்கிறதோ என்கிற அச்சம் நாளுக்கு நாள் அதிகரித்துக் கொண்டே செல்கிறது.

இஸ்லாத்தின் இணையற்ற இரண்டாம் ஜனாதிபதி உமர் (ரலி) அவர்களின் ஆட்சி திறந்த புத்தகமாக இருந்தது. இறையாட்சியின் மூலம் மட்டுமே ஒளிவு மறைவற்ற ஆட்சி தரமுடியும். என்பதை அவர்கள் நிரூபித்துக் காட்டினார்கள்.

உமர் (ரலி) அவர்கள் சர்வாதிகார ஆட்சி நடத்தவில்லை. நாட்டு நிர்வாகத்தில் நல்லோர்களிடம் ஆலோசனை செய்வார்கள். ஆலோசனையின்றி அரசாங்கமில்லை, என்பது அவர்களின் பொன்மொழி. ஆனால், சட்டமியற்றும் சர்வ அதிகாரமும் ஏக இறைவனுக்க மட்டுமே, என்பது இஸ்லாமிய அரசியில் சாசனத்தின் அடிப்படை விதி.

நிர்வாகத்தின் முக்கிய முடிவை எடுப்பதற்காக உமர் (ரலி) அவர்கள் ஒரு ஆலோசனைக் குழுவை நியமித்திருந்தார்கள். உஸ்மான் (ரலி) அலீ (ரலி) அப்துர் ரஹமானிப்னு அவ்ஃப் (ரலி) மஆது பின் ஜபல் (ரலி) உபய் பின் கஃப் (ரலி) ஜைதுபின் ஸாபித் (ரலி) போன்றோர். அக்குழுவின் குறிப்பிடத்தக்க உறுப்பினார்கள். இது தவிர மற்றொரு உயர் மட்டக்குழுவையும் அமைத்திருந்தார்கள்.

குர்ஆன், நபிமொழியிலிருந்து ஆய்வு செய்து இறுதி முடிவு எடுக்க வேண்டிய முழுக்க முழுக்க மார்க்க பிரச்சினையாக இருந்தால் மார்க்கவியலில் தனித்துவம் பெற்ற எல்லா நபித் தோழர்களையும் அழைத்து ஆலோசனை செய்து முடிவெடுப்பார்கள்.

உமர் (ரலி) ஆட்சி காலத்தில் இராக் உட்பட பல நாடுகள் வெற்றி கொள்ளப்பட்டன. பொதுவாக போரில் வெற்றி கிடைக்கும் போது கைதிகள் இராணுவ வீரர்களுக்கு அடிமையாக ஆக்கப்பட்டு அவர்களுடைய வாழ்வாதாரத்திற்கான ஏற்பாடு செய்யப்படும். மற்ற கனீமத் பொருட்கள் விதிகளுக்குட்பட்டு போர் வீரர்களுக்கு பங்கிட்டுக் கொடுக்கப்படும். பாரசீக நாடுகள் வெற்றிகொள்ளப்படும் போது ஏராளமான விவசாய நிலங்கள் அரசாங்கத்தின் முன் வந்தன. அத்துடன் நாட்டு மக்களை கணக்கெடுத்துப் பார்க்கும் போது ஒவ்வெரு முஸ்லிமுக்கும மூன்று நபர்கள் என்ற விகிதத்தில் இருந்தனர். 

எனவே, உமர் (ரலி) அவர்களுக்கு இந்த நிலங்களை குடிமக்களிடமே கொடுத்து அவர்களையே விவசாயம் செய்ய அனுமதித்து அதற்கான வரியை மட்டும் அரசு வசூலித்துக் கொண்டால் என்ன? என்ற சிந்தனை ஏற்பட்டது.  அந்த வரிப்பணம் பைத்துல் மாலில் சேர்க்கப்படும் போது படை வீரர்களுக்கு மட்டுமல்லாது, எல்லா மக்களுக்கும் பயன் கிடைக்குமே! என்று உமர் (ரலி) அவர்கள் யோசித்தார்கள். 

எனினும், இது மார்க்கவியல் தொடர்பான ஒரு பிரச்சினை. எனவே, தன்னுடைய கருத்தை மக்களிடம் திணிக்க விரும்பவில்லை. நபித்தோழர்களை வரவழைத்து ஆலோசனை செய்ய முடிவு செய்தார்கள். அதற்காக நபித்தோழர்களின் ஓர் ஆய்வரங்கத்திற்கு ஏற்பாடு செய்யப்பட்டது. 

அவ்வரங்கத்தில் விவாதத்தைத் தொடங்கி வைத்த உமர் (ரலி) அவர்கள் என்னுடைய மனவிருப்பத்தை நீங்கள் பின்பற்றியே ஆக வேண்டும், என்று நான் நினைக்கவில்லை. நானும் உங்களில் ஒருவன் தான். அமானிதமாக நான் சுமந்துள்ள உங்களுடைய இந்த ஆட்சிப் பொறுப்பில் நீங்களும் கூட்டாக வேண்டுமென்றே விரும்புகிறேன், என்று கூறி உமர் (ரலி) அவர்கள் தங்களுடைய துவக்க உரையின் மூலம் விவாதத்தை ஆரம்பித்து வைத்தார்கள். 

பல நாட்களாக விவாதம் நடந்தது. அப்துர் ரஹ்மான் பின் அவ்ஃப் (ரலி) பிலால் (ரலி) அவர்கள் போன்ற நபித்தோழர்கள் அந்நிலங்களை படைவீரர்களிடமே  ஒப்படைக்க வேண்டுமென்ற கருத்தில் உறுதியாக இருந்தனர். பிலால் (ரலி) அவர்களுடைய விவாதத்தைப் பார்த்துவிட்டு ஒரு நேரத்தில் கலீஃபா உமர் (ரலி) அவர்கள் யாஅல்லாஹ் பிலாலிடமிருந்து எனக்கு நீயே வெற்றியைக் கொடு, என்று துஆ செய்தார்கள். 

நான் இந்த நிலங்களை படைவீரர்களிடம் ஒப்படைத்து விட்டால் பிற்காலத்தில் எதிரிகளை எதிர் கொள்வதற்கு இராணுவத்தை நான் எவ்வாறு தயார் செய்ய முடியும்? அதற்கான நிதிக்கு என்ன ஏற்பாடு செய்ய முடியும்? வெளித்தாக்குதலை விட்டும் நாட்டைப் பாதுகாப்புச்  செலவுகளுக்கான நிதியை எப்படி திரட்ட முடியும்? என்று கேள்வி எழுப்பினார்கள். அலி (ரலி) தல்ஹா (ரலி) உஸ்மான் (ரலி) போன்ற நபித்தோழர்கள் உமர் (ரலி) அவர்களுடைய கருத்தை உறுதிப்படுத்தினார்கள். பல நாட்கள் விவாதம் நடந்தது. 

இறுதியாக முஹாஜிர்கள் அன்சாரிகள் கலந்து கொண்ட பொதுக்குழுவில் உமர் (ரலி) அவர்கள் இறுதி உரை ஆற்றினார்கள். அதில் போர் நடவடிக்கையில் கிடைத்த கனீமத் பொருட்களில் நம்முடைய காலத்திற்குப் பின்னர் வரும் முஸ்லிம்களுக்கும் பங்கு இருக்கிறது, என்று தெளிவாக உணர்த்தும் அல்ஹஷ்ர் அத்தியாத்தின் வசனத்தை ஓதிக் காட்டினார்கள். இந்த வசனத்தைக் கேட்டவுடன் அனைவரும் நீங்கள் சொல்வது தான் சரி, என்று வரவேற்று அவர்களின் முடிவை ஏகோபித்த முடிவாக ஏற்றுக் கொண்டனர். 

உமர் (ரலி) அவர்கள் தங்களுடைய கையில் முழுமையான அதிகாரம் இருந்தும் கூட தங்களுடைய கருத்தை மக்களிடம் வலுக்கட்டாயமாக திணிக்க விரும்பவில்லை. அதற்காக வெளிப்படை விவாதம் நடத்தினார்கள். 

உமர் (ரலி) அவர்களைப் பார்க்கும் போது மரியாதை கலந்த பயம் இருந்தாலும் விவாத அரங்கு என்று வந்து விட்டால் குடிமக்கள் தங்களுடைய கருத்தை எடுத்து வைப்பதில் முழு தைரியம் இருக்கும் நிலையில் தான் உமர் (ரலி) அவர்கள் ஆட்சி செய்தார்கள். எனவே தான் பிலால் (ரலி) அவர்கள் தங்களுடைய கருத்தியில் உறுதியாக இருந்தார்கள். அதே நேரம் அவர்களின் கருத்தை மோதல் போக்குடனோ அல்லது சர்வாதிகாரத் தன்மையுடனோ எதிர்க்காமல் அல்லாஹ்விடம் துஆ செய்தார்கள்.

நாட்டின் கடைக் குடிமகனுக்கும் ஜனாதிபதியைக் கேள்வி கேட்பதற்கு உரிமை இருந்தது. ஒரு சாதாரண மனிதனும் அவர்களிடம் நேருக்கு நேராக எதிர்த்துக் கேட்ட நிகழ்ச்சிகள் அவர்களின் சரித்திரும் முழுவதும் விரவிக் கிடக்கின்றன. ஆனால், அவ்வாறு கேட்பவர்களை உண்டு இல்லை என்று பண்ணி விடுவது தான் இன்றைய அரசியலின் எதார்த்த நிகழ்வாக உள்ளது. 

இதுபோன்ற அற்புதமான சரித்திர நிகழ்வுகளை தற்கால அரசாங்கத்தின் நிலைபாட்டுடன இணைத்துப் பார்க்கும் போது எந்த வகையிலும் இணைப்பைப் பெற்றுக் கொள்ள முடியவில்லை. மலைக்கும் மடுவுக்கும் மத்தியில் உள்ள வித்தியாசத்தை விட மிகப் பெரிய வேறுபாட்டையே உணரமுடிகிறது. 

ஃபிரான்ஸைந் சேர்ந்த ஒரு வரலாற்றாசிரியர் இஸ்லாமிய ஆட்சியில் நேர்மையான வரிவிதிப்பு பற்றி இப்படிக் கூறுகிறார்: இஸ்லாமிய வெற்றிகளில் அவர்களின் வரிவிதிப்பு முறைக்கும் நெருங்கிய தொடர்பு இருந்தது. ரோமப் பேரரசுக்கு மக்கள் செலுத்த வேண்டியிருந்த கடுமைய வரித்தொகைள் முஸ்லிம்களின் வெற்றிக்கு பெரிதும் உதவியது. இஸ்லாமியர்களின் தாக்குதலை அரசு தான் எதிர்த்ததே தவிர குடிமக்கள் எதிர்க்கவில்லை. எகிப்திய விவசாயிகள் (யுத்தத்தில்) முஸ்லிம்களுக்கு உதவி செய்தனர். இரக்கமற்ற ரோமர்களை விட உங்களுடைய ஆட்சியை நாங்கள் வரவேற்கிறோம், என்று கூறினர்.  

அரசின் பொதுநிதியத்தில் நிதிப் பற்றாக்குறை ஏற்படும் போது மட்டுமே டேக்ஸ் பற்றி பேசமுடியும். தார்த்தரியினர் தாக்குதல் தொடுத்த போது மன்னர் ஸாஹிர் பைப்ரஸ் வரிவிதிப்பு பற்றி மார்க்க அறிஞர்களிடம் ஆலோசனை நடத்தினார். இமாம் நவவீ (ரஹ்) அவர்கள் வரிவிதிப்பை அங்கீகரிப்பதற்கான தீர்ப்பில் கையெழுத்திட மறுத்துவிட்டார்கள். மன்னர்  காரணம் கேட்ட போது உங்களிடம் 1000 அடிமைகள் இருக்கின்றனர். அவர்கள் தங்கத்தினால் பின்னப்பட்ட ஆடைகளை அணிகின்றனர். தவிர, 200 அடிமைப் பெண்கள் முழு நகை அலங்காரத்தோடு வலம்  வருகின்றனர். அவற்றை பைத்துல்மாலில் சேர்த்த பிறகு நான் மக்களிடம் டேக்ஸ் விதிப்பதற்கு ஃபத்வா கொடுக்கிறேன், என்று கூறிவிட்டார்கள். மன்னர் கோபமுற்று இமாமவர்களை ஊரை விட்டும் வெளியேற்றினார். எனினும், இமாம் நவவீ (ரஹ்) அவர்கள் தங்களின் நிலைபாட்டை மாற்றிக் கொள்ளவில்லை.

                                                                                                                                                             மனாருல் ஹுதா - மார்ச் 2018

அபாயச் சங்கு!

தேசிய அளவிலும் சர்வதேச அளவிலும் முஸ்லிம் சமூத்தின் சிறிய ஒற்றுமையையும் குலைத்துக் கொண்டிருக்கும் சூழ்ச்சிகளைத் தான் அபாயச் சங்கு என்று சொல்கிறேன்.

சமூக ஒற்றுமை எவ்வளவு முக்கியம் என்பதை மார்க்கம் பல விதங்களில் வலியுறுத்துவதை யாரும் அறியாமல் இருக்க முடியாது. ஒற்றுமை குறித்து பேசப்பட்டவையும் எழுதப்பட்டவையும் எழுநூறு தலைமுறைகளுக்கும் போதுமானதாகி விடும். ஆனால், பேச்சிலும் எழுத்திலும் இருக்கும் ஒற்றுமை நடப்பில் மட்டும் காணல் நீராகிப் போய்விட்டது தான் நிதர்சனம்.

சமீப காலத்தில் இருந்த ஒற்றுமையைக் கூட தற்காலத்தில் பார்க்க முடியவில்லை. ஒவ்வொரு நாளும் ஒற்றுமை சிதைந்து வருவதையே சமூகம் பார்த்துக் கொண்டிருக்கிறது. ஒற்றுமையின் ஒப்பில்லா உவமை சொல்லப்பட்டவர்களுக்கு மத்தியிலும் கூட ஆழமான அழுத்தமான பிளவுகள் உண்டாகியிருப்பவை ஜீரணிக்கப்பட முடியாதவை.

மார்க்கத்தின் பொறுப்பாளர்களுக்கிடையே ஏற்படும் கருத்து மோதல்கள் முஸ்லிம் சமூகத்தின் எதிர்காலத்தை கேள்விக்குறியாக்கி விடுவதை நினைக்கும் போது நெஞ்சமே வெடித்து விடும் போலிருக்கிறது. ஒரு வலுவான ஒற்றுமை வலுவிழந்து வேற்றுமையின் சின்னங்களை உருவாக்கிக் கொண்டிருப்பதைக் கண்டு இஸ்லாத்திற்கு வெளியே உள்ள நம்முடைய எதிரிகள் சந்தோஷப்படுவதை ஆச்சரியக் கண்கொண்டு பார்க்க முடியாது.

ஆனால், முஸ்லிம்களே கூட பல பிளவுகளையும் வேற்றுமைகளையும் கண்டு இதுவும் வேண்டும் இன்னமும் வேண்டும், என்று மனதிற்குள் சந்தோஷப்படுவதும் எள்ளி நகையாடுவதும் இந்த சமூகத்தின் வீழ்ச்சிக்கான படிகளாகவே அமையும்.

தேவை சிந்தனை தியாகம்

நமக்கு மத்தியில் எவ்வளவு பெரிய கருத்து வேறுபாடுகள் இருந்தாலும் கருத்தொற்றுமை வாய்ந்த பிரச்சினைகளின் அடிப்டையில் ஓரணியில் தைரியமாக அணி திரள வேண்டிய நேரமிது. நல்ல திறமையும் அறிவும் அகண்ட சிந்தனையாற்றலும் கொண்ட அறிஞர்களுக்கிடையே கண்டிப்பாக கருத்து வேற்றுமைகள் ஏற்படவே செய்யும். அது தான் இயல்பானதும் கூட.

அதே சமயம் இந்த தேசத்தில் நம்முடைய உரிமைகளை அனுபவிப்பதற்காக நாம் சாதிக்க வேண்டிய நிறைய கடமைகளுள் மிக மிக முக்கியமானது சிந்தனை தியாகம் தான். நன்கு கற்றுத் தேர்ந்த சீரிய சிந்தனையாளருக்கு தனிப்பட்ட முறையில் ஒரு கருத்து சரியாகப் படுமேயானால் அதை வலியுறுத்தாமல் சமூக ஒற்றுமையை கருத்தில் கொண்டு அதை வெளிப்படுத்தாமலும் வலியுறுத்தாமலும் விட்டுவிடுவதே சமகாலத்தின் மிகப்பெரிய தியாகம்.

தன்னுடைய கருத்தை தனக்குள்ளே அடக்கிக் கொண்டு சமூக ஒற்றுமையின் கிளைகளை வானளாவ பரவ விடுவது எவ்வளவு உயர்ந்த அர்ப்பணிப்பின் அடையாளமாகிவிடும்?!

எதிரிகள் நம்முடைய ஒற்றுமையைக் குளைப்பதில் இரவு பகலாக திட்டமிடுகிறார்கள். சில பல சமயம் அதில் வெற்றியும் கண்டுவிடுகிறார்கள். இது இந்தியாவில் மட்டுமல்ல. சர்வ தேச அளவிலும் நடக்கும் சதியாகும்.

மேற்கத்திய நாடுகள் இஸ்லாமிய நாடுகளை ஒன்றுபடாமல் பார்த்துக் கொள்வதில் எவ்வளவு சாதுரியத்துடன் செயல்படுகின்றன? என்பது நமக்குத் தெரியாதா என்ன?!

பெர்சனல்லா போர்ட்

தேசிய அளவில் முஸ்லிம்களின் பிரச்சினைகளை முன்னெடுத்துக் கொண்டு சென்று அதில் உறுதியான தீர்வுகளைப் பெற்று சமூகத்திற்கு மாபெரும் பணியாற்றிக் கொண்டிருப்பது முஸ்லிம் பெர்சனல் லா போர்டு, என்பதை யாரும் அறியாமல் இருக்க முடியாது.

1972 ஆம் ஆண்டு ஆரம்பிக்கப் பட்ட தனியார் சட்ட வாரியம் கடந்த 45 வருடங்களாக பல பிரச்சினைகளை எதிர் கொண்டு சாதித்துக் காட்டி மாபெரும் சமூகப் பணியாற்றிக் கொண்டிருக்கிறது. ஷாஹ்பானு வழக்கு முதல் முத்தலாக் பிரச்சினைகள் வரை சந்தித்த பிரச்சினைகள் ஏராளம். இந்திய முஸ்லிம்கள் போர்டுக்குப் பின் அணி வகுத்து நிற்பது இந்த மதவாத சிந்தனை கொண்டவர்களுக்கு மிகப் பெரும் சவாலாகவே இருக்கிறது.

முஸ்லிம் தனியார் சட்ட வாரியத்தில் தீவிரவாதம் இருக்கிறது, என்று மதவாதிகளில் சிலர் உளறியிருப்பதே வாரியத்தின் பலத்தையும் தலைமைத் தன்மையையும் காட்டவில்லையா? எனவே, முஸ்லிம் தனியார் சட்ட வாரியத்திற்குள் கருத்து வேற்றுமையை உருவாக்க வேண்டும், என்பதிலும் பெர்ஸனல் லா போர்ட் இந்திய முஸ்லிம்களின் ஒட்டு மொத்த பிரதிநிதி இல்லை, என்ற நிலையை உருவாக்க வேணடும், என்பதிலும் முனைப்பு காட்டி போர்டுக்குள்ளேயும் குழப்பத்தை உண்டாக்கி நாட்டு முஸ்லிம்களின் ஒன்றுபட்ட தலைமையை ஒழித்து விட்டால் தங்களுடைய பாசிச திட்டத்தை அமுல்படுத்துவதற்கு எளிதாக இருக்கும், என்பதால் அப்படிப்பட்ட சூழ்ச்சியில் எதிரிகள் இறங்கியிருக்கிறார்கள்.

இதை நம்மவர்கள் - மார்க்கத்தின் பொறுப்பாளர்கள் கண்டிப்பாக புரிந்து கொண்டாக வேண்டும். நாட்டின் எதிர்கால சந்ததியினர்களின் ஈமானுக்கு ஆபத்து என்கிற நிலையை நோக்கி எதிரிகள் காய் நகர்த்திக் கொண்டிருக்கும் போது நமக்குள்ளே இருக்கும் சின்னச் சின்ன பிரச்சினைகளுக்காக பிரிவினையை வலுவாக்கும் விதத்தில் குரலெழுப்புவதும் பேனாவின் மையை வீணாக்குவதும் மிகவும் அபாயகரமானது, என்பதை ஏன் உணரமுடிய வில்லை, என்பது தான் தெரிய வில்லை.

சரித்திரமே சான்று

ஒற்றுமையின்மையால் வீழ்ந்த சரித்திரத்தை நம்முடைய வரலாற்றுப் பக்கங்களில் பரவலாகப் பார்க்க முடியும். பாபரி மஸ்ஜிதை விட்டுக் கொடுத்து விட்டு மஸ்ஜிதை இடித்தவர்களிடம் ஒப்பந்தம் செய்து கொள்ள வேண்டுமென்று சொல்வது எவ்வளவு விபரீதமானது? அவர்களுடைய பட்டியலில் அடுத்தடுத்து எத்தனை பள்ளிகள் இருக்கின்றன, என்பது நமக்குத் தெரியாதா? அவர்களிடம் செய்யும் ஒப்பந்தத்தின் படி அவர்கள் அப்படியே நடந்து கொள்வார்கள், எனபதற்கு என்ன உத்தரவாதம் இருக்கிறது?

ஸ்பெயினுடைய வரலாறு நம் கண்முன்னே இருக்கிறதே! எவ்வளவு அழகான ஒப்பந்தம் போட்டார்கள். ஆனால் முஸ்லிம்கள் அங்கு பரிதாப நிலைக்கு ஆளாக வில்லையா? தேன் வடியும் அந்த ஒப்பந்தத்தின் சில வரிகளை நீங்களும் படித்துப் பாருங்கள்.

1. முஸ்லிம்களுடைய உயிர் உடமைக்கு எவ்வகையிலும் குந்தகம் விளைவிக்கப் படமாட்டாது.

2. இஸ்லாமிய மத விவகாரங்களில் கிருத்தவர்களின் எந்தத் தலையீடும் இருக்காது.

3. கிருத்தவர்கள் யாரும் மஸ்ஜிதுக்குள் நுழைய மாட்டார்கள்.

4. மஸ்ஜிதுகளும் வக்பு சொத்துக்களும் இதற்கு முன்னர் இருந்த நிலையிலேயே தொடரும்.

5. முஸ்லிம்களுடைய பிரச்சினைகளை ஷரீஅத் சட்டத்திற்குத் தோதுவாக இஸ்லாமிய நீதிபதிகளே தீர்த்து வைப்பார்கள்.

6, இஸ்லாத்தை ஏற்றுக்கொண்ட முஸ்லிம்கள் இஸ்லாத்தை விடும்படி நிர்பந்திக்கப்பட மாட்டார்கள்.

இந்த ஒப்பந்தங்கள் எல்லாம் சிறிது காலத்திலேயே காற்றோடு கலந்து விட்டது. அதற்குப் பிறகு சொல்லொனாத் துயரத்திற்குத் தான் முஸ்லிம்கள் ஆளானார்கள். மஸ்ஜித்கள் சர்ச்சுகளாக மாற்றப்பட்டன. எனினும், முஸ்லிம்கள் தங்களுடைய இஸ்லாத்தையும் ஈமானையும் இழப்பதற்குத் தயாராகவில்லை.

ஹிஜ்ரி 904 ம் ஆண்டு (கி பி 1499) முஸ்லிம்கள் அனைவரும் கிருத்தவ மதத்தை ஏற்க வேண்டும். இல்லையானால் அவர்கள் கண்ட இடத்திலேயே கொல்லப்படுவாகள், என்று ஒரு பொது அறிவிப்பு விடுக்கப்பட்டது. இதை எதிர்பார்க்காத முஸ்லிம்கள் ஊரை விட்டும் வெளியேறி மலைப்பிரதேசங்களுக்கு போய்த் தங்க ஆரம்பித்தனர். முஸ்லிம்கள்

எந்த சிரமத்ததையும் தாங்கத் தயாராக இருந்தனர். ஆனால் ஈமானை இழக்கத் தயாராக இல்லை. சில முஸ்லிம்களையும் குழந்தைகளையும் நிர்பந்தமாக கிருத்தவர்களாக ஆக்கினர். இவர்களுடைய மூதாதையர்கள் கிருத்தவர்களாக இருந்தனர். ஸ்பெயினில் இஸ்லாம் வந்த பிறகு அவர்களாக விரும்பியே இஸ்லாத்தை ஏற்றுக்கொண்டனர். இப்படி புதிதாக இஸ்லாத்தை ஏற்றுக்கொண்டவர்கள் கூட இஸ்லாத்தை விட்டுவிட்டு பழைய மதத்தை ஏற்றுக் கொள்ளத் தயாரில்லை. நிர்பந்தமாக கிருத்தவர்களாக ஆக்கப்பட்டாலும் மறைமுகமாக யாருக்கும் தெரியாமல் வீட்டிலேயே தொழுது கொண்டிருந்தார்கள்.

கிலாஃபத்தை இழந்தோம்

சர்வதேச அளவில் முஸ்லிம்களை பிளவு படுத்த வேண்டுமென்ற யூத நஸ்ரானிகளின் சூழ்ச்சிகள் நீண்ட காலமாக அரங்கேற்றப் பட்டுக் கொண்டிருக்கின்றன. துருக்கியின் தலைமையில் கிலாஃபதெ உஸ்மானிய்யா ஆட்சி நடைபெற்றுக் கொண்டிருந்தது.

நிறமும் மொழியும் வேறுபட்டிருந்தாலும் இஸ்லாத்தின் போதனைகளை ஏற்றுக் கொண்ட சமுதாயம் ஒற்றுமையுடன் வீர நடை போட்டுக் கொண்டிருந்தது. இதைப் பொறுத்துக்கொள்ளாத ஜரோப்பிய நாடுகள் தேசிய வாதத்தையும்  பிரிவினை வாதத்தையும் உருவாக்கி அரபு மக்களிடம், அரபிகள் தான் ஆட்சி செய்ய வேண்டுமென்றும் துருக்கியர்களிடம் துருக்கி தேசியம் பாதுக்காக்கப்பட வேண்டுமென்றும் சிந்தனையை உருவாக்குவதற்காக திட்டமிட்டு பல மையங்களை - இயக்கங்கங்களை ஆரம்பித்தன.

ஐரோப்பியர்களின் மறைமுக சூழ்ச்சியால் இளந்துருக்கியர் இயக்கம்என்றொரு இயக்கம் ஆரம்பிக்கப்பட்டது. ஃபிரான்சின் சிந்தனைகளாலும் பிரெஞ்சு புரட்சி தொடர்பான கருத்துக்களாலும் சிந்தனைகளால் மூளைச்சலவை செய்யப்பட்ட முஸ்லிம் இளைஞர்கள் இணைந்து முதன்முதலில் பாரிஸ் நகரில் இந்த இயக்கத்தை நிறுவினார்கள். புரட்சிக்குழு என்ற அந்தஸ்தில் இந்த இயக்கம் இரகசியமாக உருவாக்கப்பட்டது.

இந்த இளந்துருக்கியர் இயக்கத்தை மேற்குலகம் ரிமோட் மூலம் இயக்கி கிலாபத்த அரசின் மீது தாக்குதல் தொடுப்பதற்கும் அதனை முழுமையாக வீழ்த்தி விடுவதற்கும் திட்டமிட்டு செயல்பட்டது. அரசின் அதிகார மையத்தை எட்டிப் பிடித்திருந்த இளந்துருக்கியர் இயக்க உறுப்பினர்களும் அதன் ஆதரவாளர்களும் நவீன காலத்திற்கு இஸ்லாம் பொருத்தமற்றது. துருக்கிய தேசிய வாதத்தை நிலைநாட்டி அதனைப் பாதுகாப்பது தான் தங்களுடைய பிரதான பணி என்று கருதுமளவுக்கு அவர்கள் மேற்குலகின் மூலம் மூளைச்சலவை செய்யப் பட்டிருந்தார்கள்.

இறுதியாக, 1924 ஆம் ஆண்டு மார்ச் மூன்றாம் தேதி முழு இஸ்லாமிய உலகின் தலைமையாக இருந்த கிலாபதெ உஸ்மானிய்யா தகர்க்கப் பட்டுவிட்டது. இன்று 2024 ஆம் ஆண்டு வரப்போகிறது. நூற்றாண்டை நெருங்கியும் இன்று வரை நம்முடைய ஒன்றுபட்ட தலைமையை மீட்டெடுக்க முடியவில்லை.

நவீன இஸ்லாம் எனும் அபாயச் சங்கு

இன்றும் கூட மேற்குலகின் சூழ்ச்சியால் இஸ்லாமிய உலகம் பிரிந்தே கிடக்கிறது. புனிதத் தலங்களை தாங்கி நிற்கும் சவூதியும் கூட மேற்குலகின் மோசமான கலாச்சாரத்திதற்கு அடிமைப் பட்டுக் கிடப்பதை நவீன இஸ்லாம் என்று எக்காளமிடுவதை விட அபாயச் சங்கு வேறென்ன இருக்கிறது?!

சமீபத்தில் இந்தியா வந்திருந்த ஈரானுடைய அதிபர் ஹஸன் ரூஹானீ அவர்கள் (அவர் ஷியாக் கொள்கையுடையவராக இருந்தாலும்) ஹைதாராபாத்தில் உரையாற்றும் போது மேற்குலகின் சூழ்சிக்கு இரையாகி கருத்து வேறுபாடுகளிலும் சண்டை சச்சரவுகளிலும்  சிக்கி அழிந்து போவதை விட்டுவிட்டு ஓரிறைச் கொள்கையின் அடிப்படையில் நாம் அனைவரும் ஒன்றிணைய வேண்டுமென்று அழைப்பு விடுத்துள்ளார்.

வேண்டாமே சோக வரலாறு

சர்வதேச அளவிலும் தேசிய அளவிலும் முஸ்லிம்களை அரசியல் ரீதியாக பலகீனப்படுத்துவதில் படுமோசமான திட்டங்கள் தீட்டப்பட்டுக் கொண்டிருக்கின்றன. இரண்டு பேர் கூட ஒற்றுமையாக இருந்துவிடக் கூடாது, என்ற நோக்கில் சதிகள் செய்யப்படுகின்றன. பிரிவினையைத் தூண்டி அதிகாரத்தை தக்க வைத்துக் கொண்டிருக்க நினைப்பவர்கள் ஊதும் அபாயச் சங்கை நாம் கண்டு கொள்ளமால் நம்மைச் சுற்றி என்னென்ன சதிவலைகள் பின்னப் பட்டுக் கொண்டிருக்கினறன, என்பது பற்றி நாம் சிறிதும் கவனமில்லாமல் சாதாரண பிரச்சினையும் மலை போலாக்கி விவாதித்து மக்களின் மனதுக்குள்ளே மீண்டும் மீண்டும் தேவையில்லாத வெறுப்புணர்வுகளை தண்ணீர் ஊற்றி வேரூண்றச் செய்து கொண்டிருந்தால் நம்முடைய சந்ததிகளுக்கு கண்ணீர் வடிக்கும்படியான சோக வரலாற்றையே விட்டுச் செல்ல வேண்டியிருக்கும். அல்லாஹ் பாதுகாப்பானக!  

                                                                                                  யூசுபிய்யா ராஷித் - மார்ச் - 2018

ஒழுக்கப் புரட்சியே புனிதப் புரட்சி

நபி (ஸல்) அவர்களுடைய காலத்தில் தற்காலத்தைப் போன்று எந்த நவீன வளர்ச்சியும் கிடையாது. தகவல் தொழில்நுட்பத்திலும் விஞ்ஞான அறிவிலும் அடைந்திருக்கிற இந்த முன்னேற்றம் 1400 ஆண்டுகளுக்கு முன்பாக நினைத்துக் கூட பார்க்க முடியாததாக இருந்தது.

நபி (ஸல்) அவர்களுக்கு முன்பாக பல்லாயிரம் ஆண்டுகள் கடந்திருந்தாலும் நபி (ஸல்) அவர்களுக்குப் பிறகும் பல்லாயிரம் ஆண்டுகள் கடக்கவிருந்தும் ஈருலகத் தூதர் (ஸல்) அவர்கள் காலங்களில் சிறந்தது, என்னுடைய காலமே! என்று அழுத்தமாகக் கூறியதன் மூலம் சத்தியத்தை ஏற்று ஒழுக்கப் புரட்சி ஏற்படுத்துவதில் தான் பொற்காலம் பொதிந்திருக்கிறது, என்பதை உணர்த்தியிருக்கிறார்கள்.

நபி (ஸல்) அவர்களுடைய காலத்தில் விஞ்ஞான வளர்ச்சியோ மருத்துவ வளர்ச்சியோ இல்லை என்பது போன்று நபித்தோழர்கள் அனைவருக்கும் ஒரு ஜோடி ஆடை கூட இல்லாத நிலையில் பொருளாதார வசதியும் இருந்தது. அருளாதாரமோ நிரம்பி வழிந்தது. ஆனால், இன்று பொருளாதாரத்திலும் அறிவியல் துறையிலும் முன்னேறி விட்டதாலேயே பொற்காலம் என்று வாதிடுவது தான் வேடிக்கை.

அப்படிச் சொன்னால் மனிதர்களை விட மிருக இனத்தைத் தான் உயர்வாகக் கருத வேண்டும். பெரும்பாலான விஞ்ஞான உண்மைகள் மிருகங்களிடமிருந்தே காப்பியடிக்கப் படுகின்றன, என்பதை விட எத்தனை விஷயங்களில் மிருகம் மனிதனை விஞ்சி விடுகிறது. என்னதான் குளிர்ப்பிரதேசத்தில் வாழ்ந்து பழகியிருந்தாலும் குளிர்காலத்தில் மனிதன் அதற்கேற்ற ஆடைகளை அணிந்தே தீர வேண்டும்.

ஆனால், மிருகங்களுக்கு இந்நிலை கிடையாது. பொதுவாக உடலில் உள்ள வெப்பம் வெளியேற வேண்டுமென்றால் காது, கை, கால்கள் மூலம் தான் வெளியேற வேண்டும். துருவப் பிரதேச உயிரினங்களுக்கு அந்த உறுப்புகள் மிகவும் சின்னதாக அமைந்திருக்கும். வெப்பப் பகுதியில் வாழும் அதே உயிரினத்திற்கு அவ்வுறுப்புகள் பெரிதாக இருக்கும். உதாரணத்திற்கு துருவப் பகுதியில் வாழும் நரிகளின் காதுகள் சின்னதாகவும் பாலைவனப் பகுதிகளில் வாழும் நரிகளின் காதுகள் பெரிதாகவும் இருக்கும்.

பென்குயின்களின் தோலுக்கடியில் இருக்கும் அதிகப்படியான கொழுப்பே குளிரிலிருந்து அவற்றைக் காப்பாற்றுகிறது. உடல்  வெப்பம் குறையாமல் இருக்கும் விதத்திலும் வெளியில் உள்ள குளிர்ச்சி உள்ளே செல்லாமல் இருக்கும் விதத்திலும் இரத்த ஓட்டமே வித்தியாசமாக இருப்பது தான் இறைப்படைப்பின் விந்தை. சீரான பொருளாதாரத்தின் தாரக மந்திரமான இறை நம்பிக்கைக்கு நபி (ஸல்) அவர்கள் பறவைகளை உதாரணம் காட்டியிருப்பது சிந்திக்கத் தூண்டுகிறது.

அல்லாஹ்வின் மீது முறைப்படி நம்பிக்கை வைத்தால் பறவைகளுக்கு உணவளிப்பது போல் உங்களுக்கு உணவளிப்பான். அவை காலையில் காலி வயிற்றுடன் செல்கின்றன. மாலையில் வயிறு நிரம்பிய நிலையில் திரும்பி வருகின்றன, என்று நபி (ஸல்) அவர்கள் கூறினார்கள். பறவைகள் சேமித்து வைப்பதுமில்லை. அதனால் பட்டினியால் சாவதுமில்லை. சேமித்து வைக்கும் எறும்பு கூட வெப்பமோ பனியோ தாக்காத விதத்தில் சேமிக்கத் தெரிந்திருக்கிறது. குளிர் சாதனப் பெட்டியெல்லாம் மனிதனுக்குத் தான் தேவைப்படுகிறது.

தென் அமெரிக்காவில் வாழும் பிரான்யா என்ற மீன் தண்ணீரின் அதிர்வுகளை வைத்து இரை இருக்கும் திசையை அறிந்து கொள்ளும். ஐந்து கி.மீ பரப்பளவில் இரத்தமோ மாமிசமோ இருந்தால் அதை உணர்ந்து கொள்ளும் திறன் சூறா மீனுக்கு உண்டு. இக்னியுமான் என்ற ஒரு வகைக் குளவி தன் குஞ்சுக்கு, பிறப்பதற்கு முன்பே இரை தேடி வைக்கிறது. வண்டு, சிலந்தி போன்றவற்றை எடுத்து, கொட்டி அவற்றை மயக்க நிலைக்குக் கொண்ட வருகிறது. சாகடிப்பதில்லை. மனிதனுக்குத் தான் ஆப்ரேஷன் செய்ய வேண்டுமென்றால் மயக்க மருந்து தேவைப்படுகிறது. பிறகு ஒரு குழி தோண்டி அவ்றறைப் போட்டு அதிலேயே முட்டையிட்டு விட்டு சென்றுவிடும். மயக்கம் தெளிவதற்கு முன் குஞ்சு வெளிவந்து விடும்.

எந்த எஞ்சினும் இல்லாமல் மணிக்கு 70 கி. மீ. வேகத்தில் சுறாமீன் பாய்ந்த செல்ல முடியும். நெடுஞ்சாலையோ காலண்டரோ இல்லாமல் குறிப்பிட்ட காலத்தில் பறவைகள் நாடுவிட்டு நாடு வலசை போகிறது. காலமும் தவறுவதில்லை. பாதையும் மாறுவதில்லை. கலங்கரை விளக்கமோ நெட்வொர் இணைப்புகளோ தேவைப்படுவதில்லை. பறவைகளைப் பார்த்து விமானம் செய்தான், தற்கால மனிதன்.

தானே கொன்று விட்ட சகோதரனின் உடலைக் கூட (ஹாபில், காபில) என்ன செய்வதென்று தெரியாமல் காகத்தைப் பார்த்து புதைக்கக் கற்றுக் கொண்டான் கற்கால மனிதன்.

இரண்டாம் உலகப் போரின் போது ஒரு ராணுவப் படை இந்திய எல்லையில் தங்கியிருந்தது. படைத் தளபதியின் முடி நரைத்துப் போயிருந்ததால் மருதாணி போட்டுக் கொள்வார். இதைப் பார்த்த ஒரு குரங்கி சில இலைகளை அவர் முன்னால் போட்டது. தளபதியும் அவற்றை தலையில் பூசிக் கொண்டார். அதன் மூலம் எல்லா நரை முடிகளும் உதிர்ந்து போய் வலுக்கைத் தலையாகி விட்டது. ஆனால், ஒரே வாரத்தில் கருகருவென் முடி வளர ஆரம்பித்தது. அந்தக் குரங்கு எந்த மருததுவக் கல்லூரியிலும் படிக்கவில்லை. இனிமாக கொடுக்கும் முறையை மருத்துவ நிபுணர் ஜாலீனூஸ் ஆரம்பத்தில் இரண்டு பறவைகளிடமிருந்து தான் கற்றுக் கொண்டார்.  (நூல்: அஜாயிபுல் ஹயவானாத் ஃபித்தஃவதி இலல்லாஹ்)

மனிதர்களின் வானிலை அறிவிப்பு ஒரு யூகம் தான். பல தடவை மழை பொழியும் என்று அறிவித்தும் பெய்யாமல் பொய்த்திருக்கிறது. அவ்வாறே பல  சமயம் புயலின் சரியான தாக்கத்தைக் கூட வானிலை மையத்தால் கணிக்க முடியாமல் போய்விடுகுறது. சமீபத்தில் கன்னியாகுமரியைத் தாக்கிய ஓகி புயலின் கொடூரம் பற்றி சரியான முன்னறிவிப்பு செய்யவில்லை, என்ற புகாரும் வானிலை மையத்தின் மீது எழுந்தது, நினைவிருக்கலாம்.

ஆனால், தலையைத் தூக்கி வானத்தைப் பார்க்காத, பூமியோடு பூமியாக வாழும் எறும்புகளும் புழு பூச்சிகளும் வானிலை மாற்றத்தை முன்னரே அறிந்து முட்டைகளையும் உணவையும் இடம் மாற்றி விடும். அவற்றுக்கு எந்த வானிலை ஆய்வு மையமும் தேவைப்படுவதில்லை. பூகம்பம் ஏற்படும் நேரத்தை மனிதனால் கண்டுபிடிக்க முடியவில்லை. எனினும், மிருகங்கள் அதை முன்னரே அறிந்து விடுகின்றன. மண்ணறையில் நடக்கும் வேதனையை மிருகங்கள் கேட்பதாக நபி (ஸல்) அவர்கள் கூறியிருப்பதை இங்கு நினைவுகூரத் தக்கது.

சுனாமி ஏற்படுவதற்கு முன்பே அதைக் கண்டுபிடித்து சரியான முறையில் மனிதன் அறிவிக்க முடியவில்லை. பல தடவை சுனாமி எச்சரிக்கை கொடுத்தும் சுனாமி ஏற்படவில்லை. ஆனால், முன்னெச்சரிக்கை எதுவும் கொடுக்காத சமயத்தில் சுனாமி பயங்கர அழிவை ஏற்படுத்தியதை யாரும் அவ்வளவு சீக்கிரத்தில் மறந்து விட முடியாது. ஆனால், கடற்கரையோரங்களில் வாழும் உயிரினங்கள் முன்னரே அறிந்து அந்த ஆபத்துகளை அறிந்து கொள்கின்றன. மனிதன் தன்னுடைய விஞ்ஞான முன்னேற்த்தைப் பற்றி பெருமையடித்துக் கொண்டாலும் மிருகங்கள் தங்களைத் தற்காத்துக் கொள்ளும் அளவுக்குக் கூட மனிதன் தன்னைத் தற்காத்துக் கொள்ள முடிவதில்லை.

மனித குலத்தையே அழித்துவிடும் அபாயகரமான ஆயுதங்களை கண்டுபிடித்து வைத்திருப்பதைத் தான் தன்னுடைய முன்னேற்றமாக கருதிக் கொண்டிருக்கிறான், மனிதன். அறிவிலும் பொருளிலும மட்டும் முன்னேறிவிட்டதை புரட்சி என்றால் மனிதப் புரட்சியை விட மிருகப் புரட்சிக்குத் தான் முதலிடம்.

மனிதன் தன் உள்ளத்தைச் சீர்ப்படுத்தாத வரை சிகரத்தை எட்ட முடியாது. ஒழுக்கப் புரட்சியே புனிதமான புரட்சி. நபி (ஸல்) அவர்கள் மிக மோசமாக சீர்கெட்டிருந்த ஒரு சமுதாயத்தை மிகச்சிறந்த சமுதாயமாக மாற்றிவிட்டுத் தான் என்னுடைய காலம் பொற்காலம், என்று கூறினார்கள். இல்லையானால் மனிதனை நாம் அழகிய தோற்றத்தில் படைத்தோம். பின்னர், அவனை அதலபாதாளத்தில் தள்ளிவிட்டோம், என்று குர்ஆன் சொல்லும் இழிநிலைக்குத் தான் ஆளாக வேண்டும். பொற்காலம் என்று வாதிட்டுக் கொண்டே கற்காலத்தை நோக்கி நடைபோட நேரிடும்.

இஸ்லாமியக் குடும்பவியல் சட்டங்களை நாம் பின்பற்றுகிறோமா?

முத்தலாக் தடைச் சட்டம் இந்திய இஸ்லாமிய அரசியலில் பெரும் அதிர்வலையை ஏற்படுத்தியிருப்பதை யாரும் அறியாமல் இருக்க முடியாது. சுதந்திய இந்தியாவில் மதசார்பற்ற இந்தியாவில் இஸ்லாமிய சட்டங்களை கறை படியாமல் பாதுகாப்பது ஒவ்வொரு இந்,திய முஸ்லிமின் மீதும் கட்டாயக் கடமையாகும். அதற்கான விழிப்புணர்வுகள் நாடெங்கும் பரவலாக ஏற்படுத்தப் பட்டுக் கொண்டிருக்கிறது.

அதே சமயம் இப்படிப்பட்ட சட்டங்கள் வருவதற்கான அடிப்படைக் காரணங்களில் முஸ்லிம் சமூகமும் அதன் செயல்பாடும் ஒரு முக்கிய காரணமாகும். தலாக் தொடர்பான மார்க்கத்தின் அருமையான வழிகாட்டல்களை சமூகம் நேரம் கொடுத்து கற்றுக் கொள்வதும் குறைவு. அதைச் செயல்படுத்துவதிலும் தேவையான அக்கரை இல்லை, என்றே சொல்ல வேண்டும்.

குடும்ப வாழ்க்கையின் ஆணும் பெண்ணும் எப்படி நடந்து கொண்டால் தங்களுடைய இல்வாழ்க்கையைத் தொடர்ந்து பயனிக்க முடியும்? என்பதைப் பற்றி திருமணத்திற்கு முன்பான கவுன்சிலிங் தொடர்பான விழிப்புணர்வு தமிழகத்தில்  இருந்தாலும் அது எல்.கே. ஜி. அளவில் தான் இருக்கிறதே தவிர பரவலாக இல்லை.

இஸ்லாமியத் திருமணம் எப்படி இருக்க வேண்டும்? அதில் கணவனுடைய பொறுப்பும் கடமையும் என்ன? என்பதை விட பெண்வீட்டார் செய்ய வேண்டிய சீர்வரிசைகளைப் பற்றியும் வரதட்சணை மற்றும் விருந்து வகைகள் பற்றியும் தான் அதிகமாகப் பேசப்படுகின்றன. மார்க்கம் காட்டித் தந்த நடைமுறைகளை விட்டுவிட்டு நாமாக சில நடைமுறைகளை மாற்றார்களிடமிருந்து காப்பியடித்து அதையை நம்மீது கட்டாயமாக்கிக் கொண்டிருக்கிறோம், என்பது கேவலமில்லையா?

விருந்தோம்பல் இஸ்லாத்தில் மிகவும் நன்மைக்குரிய காரியம். நபி (ஸல்) அவர்கள் நபியாக அனுப்பப் படுவதற்கு முன்பே மௌட்டீக காலத்திலும் அரபு மக்களிடம் விருந்து உபசரிக்கும் நல்ல பண்பாடு இருந்தது, என்று வரலாற்றாசிரியாகள் கூறுவர்.

அப்துல்லாஹிப்னு ஸலாம் (ரலி) அவர்கள் முதலில் யூதராக இருந்து பின்னர் இஸ்லாத்தைத் தழுவினார்கள். நபி (ஸல்) அவர்கள் மதீனாவுக்கு வந்த போது அப்துல்லாஹிப்னு ஸலாம் (ரலி) அவர்கள் நபியவர்களை காண்பதற்காக வந்தார்கள். நான் நபி (ஸல்) அவர்களின் முகத்தைப் பார்த்தவுடன் இது பொய்யருடைய முகமல்ல, என்று விளங்கிக் கொண்டேன், என்று கூறுகிறார்கள். நபி (ஸல்) அவர்கள் பேசியதில் முதல் பேச்சு, ஸலாமைப் பரப்புங்கள். உண்ண உணவளியுங்கள். மக்கள் நித்திரையில் இருக்கும்  போது தொழுங்கள். (அப்படியானால்) நீங்கள் நிம்மதியாக சுவனத்தில் நுழைவீர்கள், என்கிற உத்தரவுகள் தான், என்று அப்துல்லாஹிப்னு ஸலாம் (ரலி) அவர்கள் கூறுகிறார்கள். (நூல்: திர்மிதீ)

விருந்தோம்பல் மிக நல்ல காரியம், என்பது தவறாக விளங்கப்பட்டு விடக்கூடாது. திருமணத்தில் விருந்துகளில் பல லட்சங்கள் செலவாகுவதும் அவற்றில் பெரும்பாலானவை பெண்வீட்டார் மட்டுமே செய்ய வேண்டும் என்பதும் மார்க்க ரீதியாக நல்ல காரியம் அல்ல, என்பது மட்டுமல்ல. தடை செய்யப்பட்டதும் கூட.

சாப்பாட்டுக்காக செலவு செய்யப்படும் பணம் ஹலாலாக சம்பாதிக்கப் பட்டிருந்தாலும் கூட விரக்தியிலும் கடன் பட்டும் வேறு வழியின்றி பல சிரமங்களுக்கு மத்தியில் வெறுப்புடன் நடத்தப்படும் விருந்துகளில் கலந்து கொண்டு சாப்பிடுவதால் அந்த உணவு ஹலாலா? ஹராமா? என்கிற சிந்தனை ஏற்பட்டுவிடும். எந்த மனிதருடைய செல்வமும் அவருடைய முழு மனதிருப்தியின்றி மற்றவர்களுக்கு ஹலால் ஆகாது, என்ற நபிமொழி எப்பொழுதும் நினைவில் இருக்க வேண்டும். ஹலால், ஹராம் பற்றி எந்த சிந்தனையும் இல்லையானால் அது போன்று மாபெரும் நஷ்டம் வேறெதுவும் இருக்க முடியாது.

நம்முடைய நடைமுறையில் உள்ள விருந்து வகைகளை கட்டாயம் சீர்த்திருத்தம் செய்யப் பட்டாக  வேண்டும். இன்று தண்ணீருக்குப் பஞ்சம். பொருளாதார நஷ்டம். அரசின் ஏகப்பட்ட வரிவிதிப்புகள் இவையனைத்தும் சேர்ந்து மக்களை ஒரு பெரும் பொருளாதார நெருக்கடியில் சிக்க வைத்துள்ளது. இப்பொழுது ஏற்பட்டுள்ள பொருளாதார நெருக்கடியிலிருந்து வெளியேறுவதற்கு சிக்கனத்தை மாபெரும் ஆயுதமாக எடுத்துக் கொண்டாக வேண்டிய கட்டாயத்தில் மக்கள் இருக்கின்றனர்.

வலீமா என்பது....

திருமண விருந்தில் வலீமா விருந்து தான் சுன்னத்தான விருந்தாகும். அந்த விருந்தைக்கூட நபி (ஸல்) அவர்கள் மிகவும் எளிமையாகவே நடத்தியிருக்கிறார்கள். சில சமயம் பயணத்தில் இருக்கும் போது தோழர்களிடம் இருக்கும் உணவுப் பொருட்களை ஒன்று சேர்த்து அதை எல்லாரும் சேர்ந்து சாப்பிடுவார்கள். அதுவே கூட வலீமாக விருந்தாகி விடும்.

ஆயிஷா (ரலி) அவர்களை நபி (ஸல்) அவர்கள் நிகாஹ் செய்த போது பால் தான் வலீமாவுடைய இடத்தில் இருந்தது. என்பதும் சரித்திரத்தில் காணக்கிடைக்கிறது. ஜைனப் (ரலி) அவர்களை நபி (ஸல்) அவாகள் நிகாஹ் செய்யும் போது ரொட்டியும் இறைச்சியுமாக வலீமா விருந்து வைத்தார்கள். நபியவர்கள் வலீமாவிலேயே இது தான் கூடுதலான விருந்து என்ற செய்தியும் சரித்திரத்தில் காணக்கிடைக்கிறது.

அப்துர்ரஹ்மான் பின் அவ்ஃப் (ரலி) அவர்கள் திருமணம் செய்யும் போது ஒரு ஆட்டை அறுத்தாவது வலீமா விருந்து வையுங்கள், என்று நபி (ஸல்) அவர்கள் கூறினார்கள். எனவே வலீமா விருந்து என்பது நாம் நினைப்பது போன்று ஆயிரக்கணக்கான நபர்களை அழைத்து விருந்து கொடுக்க வேண்டுமென்று கிடையாது. நல்ல வசதியுள்ளவர்கள். பெருமை, பகட்டு ஆடம்பரம் இல்லாமல் நல்ல எண்ணத்தில் ஏழைகள், வறியவர்கள் உட்பட அதிகமானோருக்கு விருந்து கொடுத்தால் தவறு இல்லை தான். ஆனால், இன்று நடக்கும் எல்லா விருந்துகளும் அப்படித்தான் நடக்கிறது, என்று சொல்லிவிட முடியாது.

பெண் வீட்டார் விருந்து?

நாம் மேலே குறிப்பிட்ட வலீமா விருந்து என்பது மாப்பிள்ளை வீட்டார் வைக்க வேண்டிய விருந்தாகும். பெண்வீட்டார் விருந்து வைப்பது சுன்னத்தோ வாஜிபோ கிடையாது. ஆனால், இன்றைய நிலையைப் பார்த்தால் பெண்வீட்டார் தான் அதிகமான விருந்து வைககம்  நிலைக்கு ஆளாகிறார்கள். திருமணத்திற்கு முன்பும் திருமணத்தின் போதும் மட்டுமல்ல. திருமணத்திற்குப் பிறகும் குழந்தை பெறும் காலத்திலும் வகை வகையான பெயர்களில் விருந்து வகைகளை ஏற்பாடு செய்யும் நிர்பந்தம் பெண்வீட்டாருக்கு உண்டு.

திருமணத்திற்குப் பின் அவளுக்குத் தேவையான உணவு, உடை, இருப்பிடம் கொடுக்க வேண்டும். கணவன் மனைவிக்குத் தேவையான வசதி வாய்ப்புகளைச் செய்து கொடுப்பது அவனுடைய கடமை, என்பதற்கு எவ்வித ஆதாரமும் சொல்லத் தேவையில்லை. காலம் காலமாக இதுவே முழு உலகின் நடைமுறை.

அதே சமயம் குர்ஆன் மற்றும் நபிமொழிகளில் பல இடங்களில் மனைவிக்கு வாழ்வாதாரம் வழங்குவது பற்றி அல்லாஹ்வும் அவனுடைய இறைத்தூதரும் கூறியுள்ளனர். மனைவிக்கு செலவு செய்வது அவசியம், என்ற கருத்து நபிமொழிகளில் தெள்ளத் தெளிவாக உணர்த்தப்பட்டுள்ளது.

ஹஜ்ஜத்துல் விதாவின் இறுதி உரையில் பின்வருமாறு கூறினார்கள்: மனைவிமார்களுக்கு நல்ல விதத்தில் உணவளிப்பதும் உடை கொடுப்பதும் (ஆண்களாகிய) உங்களுடைய கடமையாகும். (அபூதாவூத்- 1907) முஆவியதுல் குஷைரீ (ரலி) அவர்கள் நபியவர்களிடம் மனைவியின் உரிமைகள் பற்றி கேட்டார்கள் அப்பொழுது நபி (ஸல்) அவர்கள் நீங்கள் சாப்பிடும் போது அவளுக்கும் சாப்பாடு கொடுக்க வேண்டும். நீங்கள் உடை உடுத்தும் போது அவளுக்கும் உடை கொடுக்க வேண்டும். (அபூதாவூத் - 2144)

மனைவிக்குரிய செலவினங்களில் அவளுடைய உணவு, இருபிடம் தவிர பல தேவைகளை மார்ககம் சொல்லித் தந்திருக்கிறது. சமையல் பாத்திரங்கள், திருகை, சாப்பிடும் தட்டு, டம்ளர் போன்ற வீட்டுச்சாமன்களைக் கொடுப்பதும் கணவனுடைய கடமை. அந்தப் பெண் மண் பாத்திரங்களைப் பயன்படுத்தாத வசதி வாய்ந்த இடத்துப் பெண்ணாக இருந்தால் பித்தளை, செம்புப் பாத்திரங்கள் வழங்கப் படவேண்டும். உயர் குடும்பத்துப் பெண்களுக்கு நடைமுறைக்குத் தோதுவாக செம்புப் பாத்திரங்களை வழங்குவது கட்டாயம் என்று இமாம் நவவீ (ரஹ்) அவர்கள் கூறியுள்ளார். (ரவ்ளா)

அப்படியானால் தற்காலத்தில் கேஸ் அடுப்பு, கரண்ட் அடுப்பு, மிக்ஸி, கிரைண்டர், வாஸிங் மெஷின், பிரீஸர், கட்டில், மெத்தை போன்ற பொருட்களை கணவன் மனைவிக்கு வாங்கிக் கொடுக்க வேண்டும். உணவும் உடையும் இருப்பிடமும் கணவன் தான் கொடுக்க வேண்டும். இவனுடைய செலவில் ஆடை வாங்கிக் கொண்டு போய் அதை அவளுக்கு உடுத்தித் தான் அழைத்து வர வேண்டும், என்பது மட்டுமல்ல, ஒரு ஆண் திருமணம் முடிக்கும் முன் மனைவிக்குத் தேவையான இந்த எல்லா சாமான்களையும் (வீட்டையும்) வாங்கி முடித்த பின் தான் திருமணத்திற்குத் தயாராக வேண்டும்.

கட்டில் மெத்தையை ஆண் வாங்க வேண்டும். மிக்ஸி, கிரைண்டர் போன்ற வீட்டுச்சாமான்களை ஆண் வாங்க வேண்டும். இந்த இடத்தில் தற்காலத்து நிலையை கொஞ்சம் சிந்திப்போம். கணவன் வாங்க வேண்டிய எல்லா பொருட்களையும் மனைவி தன்னுடைய வீட்டிலிருந்து கொண்டு வரவேண்டுமென்ற கட்டாய நிலையில் இருக்கிறாள். அதுவும் அவளுடைய சொந்த உபயோகத்திற்காக அல்ல; கணவனுடைய வீட்டு உபயோகத்திற்காக. வீட்டுச் சாமான்களை மட்டுமல்ல, கணவனுக்குத் தேவையான வாகனம் உள்ளிட்ட பொருட்களையும் பெண்வீட்டாரிடமே வாங்கிக் கொள்வதுஎவ்வளவு பெரிய வெட்கக்கேடு. இது போன்ற சீர்வரிசைப் பொருட்களை கட்டாயப் படுத்தி மாப்பிள்ளை வீட்டார் பெண்வீட்டாரிடம்  வாங்கிப் பெறுவது எவ்விதத்தில் ஹலாலாகப் போகிறது? என்று தெரிய வில்லை. ஹலால், ஹராம் பற்றிய சிந்தனை இல்லாதவர்களுக்கு எப்படி விளங்க வைப்பது?

பெண்வீட்டார் அவர்களாக விரும்பி முழு மனவிருப்பத்துடன் இவற்றை வாங்கிக் கொடுத்தால் அது ஹலாலாகி விடுமே! என்று சமாதானம் சொல்லிக் கொண்டாலும் அப்படியொரு விருப்பம் இருப்பதை எப்படி யார் முடிவு செய்வது? உண்மையிலேயே முழு மனவிருப்பத்துடன் வாங்கிக் கொடுத்திருந்தால் பரவாயில்லை.

அபூபக்ர் (ரலி) அவர்கள் தங்களுடைய மகள் அஸ்மா (ரலி) அவர்களுக்கு ஓர் அடிமையை அனுப்பி வைத்தார்கள். எனினும் இன்று சீர்வரிசைகள் முழு மனவிருப்பத்துடன் தான் செய்கிறார்கள் என்று சொல்லமுடியாது. வேறு வழியின்றி ஊர்ப் பழக்கத்தின் காரணமாக கடன் கொண்டாவது கட்டாயம் செய்தாக வேண்டிய நிர்பந்தம் ஏற்பட்டுவிடுகிறது. மாக்கம் கட்டாயமாக்காத ஒரு நடைமுறையை நாமாக ஏன் உருவாக்க வேணடும்? இஸ்லாம் பெண்ணுரிமையை நிறைவாக வழங்கியிருக்கிறது. நாம் தான் மாற்று மதக் கலாச்சாரத்தை நாட்டுப் பழக்கம், ஊர்ப்பழக்கம் போன்ற பெயர்களை வைத்து அதைக் கெடுத்து விட்டோம்.

இஸ்லாம் எல்லாத் துறையிலும் நமக்கு நிறைவான வழிகாட்டலைத் தந்திருக்கும் போது அதை விடுத்து மற்றவர்களிடமிருந்து காப்பியடித்த சடங்குகளையும் சம்பிரதாயங்களையும் பிரதானமாக ஆக்கிக் கொண்டால் நம்முடைய எதிரியிடமிருந்து ஆபத்து வருவதற்கு முன்பாக நாமே ஆபத்தை விலை கொடுத்து வாங்கியதாகாகதா? அரசாங்கத்திற்கு நாம் சொல்ல வேண்டியது நிறைய இருப்பது போல் இல்லை அதை விட அதிகமாகவே நமக்கு நாமே சொல்ல வேண்டியதும் இருக்கிறது.