கலாச்சார மோதல் - களமிறங்கிய காவலர்கள்

உங்களுடைய மார்க்கத்தை உங்களுக்காக பரிபூரணமாக்கிவிட்டேன்.... (5:3) என்ற இறைவசனம் 1400 ஆண்டுகளுக்கு முன்பே இறங்கிவிட்டது. அதே சமயம் வாழ்வியல் ரீதியான எல்லா துறைகளிலும் பெருவளர்ச்சியும் மாற்றமும் அடைந்து கொண்டு வருகிறது. ஒரு பக்கம் மாற்றம் என்றால் மறுபக்கம் தொடரும் சோதனைகள். சொல்லாலும் செயலாலும் இஸ்லாம் தாக்கப்பட்டது போல் வேறெந்த மதமும் தாக்கப் பட்டிருக்காது.

எந்தப் பெருவெள்ளத்திலும் அடித்துச் செல்லப்பட்டு விடக்கூடாது, என்பதற்காக இஸ்லாத்தை கறைபடியாமல் பாதுகாக்கும் செயல் வீரர்களை ஒவ்வொரு காலத்திலும் அல்லாஹ் ஏற்படுத்திக் கொண்டே இருக்கிறான். எனவே தான் இஸ்லாம் இன்றும் (என்றும்) தனித்தன்மையுடன் வாழ்ந்து கொண்டிருக்கிறது.

இமாம் அபூஹனீஃபா(ரஹ்)

இமாம் அபூஹனீஃபா (ரஹ்) அவர்களை ஆட்சியாளர்கள் நீதிபதியாக்குவதற்கு முயற்சித்தனர். எனினும் நீதிபதியாகிவிட்டால் அநியாயக்கார ஆட்சியாளர்களுக்கு உதவி செய்வதாகிவிடும், என்பதால் இமாமவர்கள் அதை மறுத்துவிட்டார்கள். இராக்குடைய ஆட்சியர் இப்னு ஹுபைராவின் மூலம் இமாமுக்கு 100 கசையடி கொடுக்கப்பட்டது. அத்துடன் விஷம் கொடுக்கப்பட்டதாகவும் சரித்திரத்தில் கூறப்பட்டுள்ளது. எனினும் இமாம் (ரஹ்) கொள்கையில் உறுதியாக இருந்தார்கள்.

இமாம் மாலிக்(ரஹ்):

ஹிஜ்ரி 130 களில் உமையாக்களுடைய கிலாஃபத் வீழ்ந்து அப்பாஸிய்யாக்களுடைய ஆட்சி ஆரம்பமானது. அப்பாஸிய்யாக்கள் தங்களுடைய கிலாஃபத்தை ஏற்றுக்கொண்டே தீர வேண்டும், என்று மக்களை நிர்பந்தப்படுத்தினர். தங்களுடன் செய்து கொண்ட கிலாஃபத் உடன்படிக்கைக்கு மாறுசெய்தால் அவருடைய மனைவி தலாக்காகிவிடும், என்றும் சத்தியம் வாங்கினார்கள். மக்களுக்கு அது ஒரு பெரும் பிரச்சினையாக உருவெடுத்தது.

இந்நிலையில் இமாம் மாலிக் (ரஹ்) அவர்கள் நிர்பந்த நிலையில் கொடுக்கப்பட்ட தலாக் செல்லாது, என்று ஃபத்வா கொடுத்தார்கள். அரசுக்கு எதிராக கிளர்ச்சி செய்யுமாறு இமாம் மக்களை ஏவவில்லை. மார்க்கத்தீர்வு தான் கொடுத்தார்கள். எனினும், ஆட்சியாளர்களுக்கு இதை ஏற்றுக்கொள்ளவில்லை. ஹிஜ்ரி 146 ஆண்டு மதீனாவின் ஆட்சியராக இருந்த ஜஃபர் பின் சுலைமான் அப்பாஸீ இமாமுக்கு சாட்டையடி கொடுத்தார். அடி தாங்கமுடியாமல் மயக்கமுற்றார்கள். உணர்வு வந்தவுடன் அடிப்பவர்களை நான் மன்னித்துவிட்டேன், மக்களே இதற்கு நீங்களே சாட்சியாக இருங்கள்!, என்று கூறினார்கள். அந்த தண்டனையின் தாக்கத்தினால் அதற்குப்பிறகு கையை முழுமையாக உயர்த்த முடியாமல் போய்விட்டது. (ஹஜ்ரத் இமாம் அபூஹனீபா கீ ஸியாஸீ ஜின்தகீ பக்:338-384)

இமாம் ஷாபியீ (ரஹ்):

அப்பாஸிய்யாக்களின் ஆட்சி காலத்தில் கிரேக்க தத்துவ நூற்கள் அரபியில் மொழிபெயர்க்கப்பட்டன. அவை விஞ்ஞான ரீதியாக முஸ்லிம்களுக்கு பெரிதும் உதவின, என்பதில் சந்தேமுமில்லை. எனினும் சில கிரேக்க தத்துவங்கள் இஸ்லாமிய கொள்கைகளை காயப்படுத்தின. கிரேக்க தத்துவ நூற்களை முஸ்லிம்களுக்கு அனுப்பி வைப்பதற்கு கிருத்துவ மன்னர் தயங்கிய போது பாதிரிமார்கள், இந்த நூற்களை படிப்பவர்களுக்கு கண்டிப்பாக தங்களுடைய மார்க்கக் கொள்கையில் தடுமாற்றத்தை ஏற்படுத்தும், என்று கூறி அவற்றை அனுப்பி வைக்கும்படி கூறினார். பாதிரிமார்கள் நினைத்தது நிதர்சனமாக நடக்கவும் செய்தது. மார்க்கத்தின் எந்தக் கொள்கையாக இருந்தாலும் அது வஹியின் மூலம் நமக்கு வந்திருக்கிறது, என்பதை மறந்து ஃபல்ஸஃபா எனும் கிரேக்க தத்துவம் என்ற கல்லில் உரசிப்பார்க்க ஆரம்பித்தனர். அறிவியல் சரி என்று சொன்னால் தான் ஏற்றுக்கொள்ள வேண்டுமென்ற சிந்தனை மக்களிடம் ஏற்பட்டது.

எனவே இமாம் ஷாஃபியீ (ரஹ்) அவர்கள் யார் இதைப் படிப்பார்களோ அவருக்கு சாட்டையடியும் செருப்படியும் கொடுத்து தெருத்தெருவாக சுற்ற வைத்து குர்ஆன் சுன்னாவுடைய போதனைகளை விட்டவருக்குரிய தண்டனை இது தான் என்று பகிரங்கப்படுத்த வேண்டுமென்று கூறினார்கள். (முஸல்மானோங்கா உரூஜோ ஜவால்)

இமாம் அஹ்மது (ரஹ்)

முஸ்லிம்களில் முஃதஜிலாக்கள் என்றொரு பிரிவினர் இருந்தனர். அவர்கள் சுன்னத் ஜமாஅத்திற்கு முரணாக குர்ஆன் படைக்கப்பட்ட பொருள் என்று வாதிட்டனர். ஹிஜ்ரி 3 ஆம் நூற்றாண்டில் அப்பாஸிய கலீஃபாக்கள் முஃதஜிலாக்களுக்கு ஆதரவாக செயல்பட்டனர். இந்த குர்ஆன் தொடர்பான கொள்கையில் அரசு சுன்னத் ஜமாஅத்தினருடன் கடுமையாக நடந்து கொண்டது. அதில், பெரிதும் பாதிக்கப்பட்டவர்கள் இமாம் அஹ்மது (ரஹ்) முஃதஜிலாக்களுடைய கொள்கையை ஏற்றுக்கொள்ள வேண்டுமென்பதற்காக இமாமவர்கள் 28 மாதங்கள் சிறையில் அடைக்கப்ட்டார்கள்.

சத்தியத்தை விடடுவிட வேண்டுமென்பதற்காக 33 அல்லது 34 தடவை சாட்டையால் அடிக்கப்பட்டார்கள். அவற்றில் ஒரு அடி யானையின் மீது விழுந்திருந்தாலும் யானை கூட வெருண்டேடியிருக்கும். இமாமவர்கள் ஹிஜ்ரி 241 ஆம் ஆண்டு ரபீவுல் அவ்வல் 12 ஆம் நாள் வஃபாத்தானார்கள். ஒரு கணிப்பின் படி 8 லட்சம் ஆண்களும் 60 ஆயிரம் பெண்களும் ஜனாஸா தொழுகையில கலந்து கொண்டனர். அஹ்மது (ரஹ்) அவர்கள் சத்தியக் கொள்கையில் நிலைத்து நின்றதின் காரணமாக முஃதஜிலாக்களுடைய கொள்கை தடம் தெரியாமல் குழிதோண்டி புதைக்கப்பட்டு விட்டது.

நபி (ஸல்) அவர்கள் வஃபாத்தான சமயம் பலகீனமான முஸ்லிம்கள் இஸ்லாத்தை விட்டும் வெளியேறிய போது அதைத் திறமையாக எதிர்கொண்டு சாதித்த முதல் நபர் அபூபக்ர் (ரலி) அவர்கள் என்றால் சத்தியத்தை தலை நிமிரச்செய்த இரண்டாம் நபர் அஹ்மது பின் ஹம்பல் (ரஹ்) அவர்கள் தான் என்று வரலாறு பதிவு செய்து வைத்துள்ளது.

இமாம் கஜ்ஜாலி (ரஹ்)

இமாம் கஜ்ஜாலி (ரஹ்) அவர்கள் தங்களுடைய காலத்தில் ஆட்சியாளர்களிடம் இருந்த கவனக்குறைவை சுட்டிக்காட்டத் தவறவில்லை. மக்கள் பசி, பட்டினியாலும் அநீதியாலும் பாதிக்கப் பட்டிருக்கிறார்கள். மக்களுடைய நிலை நன்றாக இருக்கிறது, என்று யாராவது கூறினால் அவர் உன்னுடைய மார்க்க விரோதி என்பதை கவனத்தில்கொள்! பாதிக்கப்பட்ட மக்களின் துஆவை பயந்துகொள்! என்று ஆட்சியாளருக்கு இமாம் கடிதம் எழுதினார்கள். அத்துடன் மக்களுடைய நடைமுறை பற்றியும் முழுமையாக அறிந்திருந்தார்கள். இதற்கு அவர்களுடைய இஹ்யாவு உலூமித்தீன் என்ற பிரசித்தி பெற்ற நூலே போதுமான சான்று. அந்நூலின் மக்களிடம் இருந்த மார்க்கத்திற்கு முரணான எல்லா அம்சங்களைப் பற்றியும் எழுதியுள்ளார்கள்.

மஸ்ஜித், கடைவீதி, தெருக்கள், பொது குளியலைறை, விருந்து உபசரிப்பு என ஒவ்வொன்றிலும் மக்கள் ஏற்படுத்தி வைத்திருக்கிற மார்க்கத்திற்கு முரணான நூதன அனுஷ்டானங்களை கடுமையாக விமர்சனம் செய்து எழூதியிருக்கிறார்கள். அவர்கள் அண்டை வீட்டார்களை பசி, பட்டினியில் விட்டுவிட்டு மீண்டும் மீண்டும் ஹஜ் செய்யக்கூடிய செல்வந்தர்களைப் பற்றியும் தொழுகை, நோன்பு போன்ற வணக்க வழிபாடுகளில் மட்டும் கவனம் செலுத்தி விட்டு கஞ்சத்தனம் செய்யும் செல்வந்தர்களைப் பற்றியும் இமாம் கஜ்ஜாலி (ரஹ்) அந்நூலில் கடுமையாக கண்டித்து எழுதுகிறார்கள்.

ஷைக் முஹ்யுத்தீன் அப்துல் காதிர் ஜீலானீ (ரஹ்)

ஷைக் அவர்களின் சீர்த்திருத்தப் பணியும் சரித்திரப் புகழ்பெற்றது. அவர்கள் சிலை வணக்கத்தை மட்டும் தடுக்கவில்லை. முஸ்லிம் என்ற பெயரில் இருந்து கொண்டு அல்லாஹ் அல்லாதவற்றுக்கும் சக்தி இருக்கிறது, என்று நம்புவதையும் கடுமையாக சாடியிருக்கிறார்கள்.

ஒரு தடவை இப்படி கூறினார்கள்: நீ உன் மீதே முழு நம்பிக்கை வைத்திருக்கிறாய். படைப்புகளின் மீதும் தீனார், திர்ஹத்தின் (காசு, பணத்தின்) மீதும் கொடுக்கல், வாங்கல் மீதும் உன்னுடைய ஆட்சி அதிகாரத்தின் மீதும் நம்பிக்கை வைத்திருக்கிறாய். நீ எதன் மீதெல்லாம் நம்பிக்கை வைத்திருக்கிறாயோ அவையனைத்தும் உன் கடவுளே! நீ எதையெல்லாம் பயப்படுகிறாயோ ஆறுதல் கொள்கிறோயோ அதுவும் உன்னுடைய கடவுள்! அல்லாஹ்வின் வல்லமையின்றி எந்த ஒரு பொருளும் நேரடியாக பலனையோ தீங்கையோ விளைவிக்கிறது என்று நம்பினால் அதுவும் உன்னுடைய கடவுள்! (என்று நீ நம்புகிறாய்).

ஒரு தடவை கலீஃபா அநியாயக்கார நீதிபதியை நியமனம் செய்த போது ஷைக் அவர்கள் மிம்பரில் நின்று கொண்டு கலீஃபாவைப் பார்த்து மாபெரும் அநியாயக் காரரை முஸ்லிம்களுக்கு நீதிபதியாக நியமித்திருக்கிறீரே! நாளை கருணையாளனுக்கெல்லாம் கருணையாளனாகிய ரப்புல் ஆலமீனிடத்தில் என்ன பதில் சொல்லப் போகிறீர்? என்று வினவினார்கள். இதைக் கேட்டு நடுங்கிய கலீஃபா உடனடியாக நீதிபதியை பதவிநீக்கம் செய்தார். (ரிஜாலுல் ஃபிக்ர் வத்தஃவா ஃபில் இஸ்லாம்)

முஜத்தித் அல்ஃப தானீ (ரஹ்)

இந்தியாவில் மொகலாயர்களுடைய ஆட்சி நடந்ததை யாரும் அறியாமல் இருக்க முடியாது. ஹிஜ்ரி 11 ஆம் நூற்றாண்டின் துவக்கத்தில் அக்பர் சிம்மாசனத்தில் அமர்ந்தார். மார்க்க போதனைகள் பற்றிய போதிய அறிவு இல்லாததால் இஸ்லாத்தின் பெயரால் இஸ்லாத்திற்கு முரணான கொள்கைகளை சொல்லிக் கொண்டிருந்தார்.

ஹோலி, தசரா பண்டிகையில் முஸ்லிம்களும் பங்கெடுக்க வேண்டும். பசு அறுக்கக் கூடாது. மதுவும் பன்றி இறைச்சியும் சாப்பிடலாம். இது போன்று ஏராளமான கொள்கைக் குழப்பங்களை மக்களிடம் ஏற்படுத்தினார். இஸ்லாமிய மன்னர்களின் ஆட்சியிலேயே இப்படி நடப்பதைக் கண்ட இமாம் அஹ்மத் முஜத்தித் அவர்கள் மனவேதனை அடைந்தார்கள். இந்நிலையில் அக்பர் மரணித்தார். ஜஹாங்கீர் ஆட்சிக்கட்டிலில் அமர்ந்தார். முஜத்தித் (ரஹ்) அவர்கள் மன்னரை சந்திக்க சென்ற போது மன்னருக்கு பணிந்து ஸஜ்தா செய்யவில்லை. ஸலாம் சொல்லி உள்ளே நுழைந்தார். அரசவை நடைமுறைக்கு மாற்றமாக இமாமவர்கள் நடந்து கொண்டதால் குவாலியர் சிறையில் சில வருடம் அடைக்கப் பட்டார்கள். ஷைக் அவர்கள் அங்கே இறைவழிபாட்டில் ஈடுபட்டதுடன் சிறைவாசிகளை இஸ்லாத்தின் பக்கம் அழைப்பு கொடுத்தார்கள். நூற்றுக்கணக்கான சிறைக்கைதிகள் இஸ்லாத்தைத் தழுவினர்.

நிரபராதி என்று நிரூபிக்கப்பட்ட பின் ஷைகின் மீது அரசரின் கவனம் திரும்பியது. அரசவையினருக்கும் ஷைகின் நம்பிக்கை ஏற்பட்டது. முஜத்தித் (ரஹ்) அவர்களுக்கு மார்க்க விஷயங்களை கடிதம் மூலம் எழுதி அனுப்புவார்கள். அந்தக் கடிதத்தில் தங்களுடைய மனவேதனையை முழுமையாக வெளிப்படுத்துவார்கள். கைசேதமே! இந்த நாட்டுக்கு ஏற்பட்ட சோதனையை என்னவென்று சொல்வது?! முஹம்மது (ஸல்) அவர்களை பின்பற்றக்கூடியவர்கள் அவர்களுடைய சொந்த நாட்டிலேயே கேவலப்படுத்தப் படுகிறார்களே! விரோதிகளோ கௌரவிக்கப்படுகிறார்கள். மார்க்கத்தின் வழிகாட்டல் படி ஒரு முஸ்லிம் வாழ்ந்தார், என்ற காரணத்திற்காகவே சிறைவைக்கப்பட்ட தண்டிக்கப்பட வேண்டிய ஒரு அவலமும் இந்நாட்டில் நடக்க வேண்டியதாகி விட்டதே! என்று எழுதுவார்கள்.

தங்களுடைய மனவேதனையை இராணுவத் தளபதி வரையும் கடிதம் மூலம் வெளிப்படுத்தினார்கள். இதன் மூலம் மாபெரும் திருப்பம் ஏற்பட்டது. ஔரங்கசீப் (ரஹ்) அவர்களை சிறு வயதிலிருந்தே நல்ல மார்க்கப் பற்றோடு வளர்ப்பதற்கு ஷைக் முஜத்தித் (ரஹ்) அவர்களுடைய தனிப்பெரும் முயற்சி தான் காரணமாயிருந்தது. தீனெ இலாஹி என்ற பெயரில் இஸ்லாத்தின் தனித்தன்மையை தகர்க்க நினைத்தவர்கள் ஆண்ட நாட்டில் ஔரங்கசேப் போன்ற இறைநேசர்கள் இந்நாட்டில் ஆளும் நிலை உருவானது, என்றால் அதற்கான விதை விதைத்தவர்கள் ஷைக் முஜத்தித் அல்ஃபெ தானீ (ரஹ்) அவர்கள் தான் என்று சரித்திரம் சொல்லும். (அத்தஃவதுல் இஸ்லாமிய்யா ஃபில்ஹிந்த்)   

தாருல் உலூம் தேவ்பந்த்:

1857 ஆம் ஆண்டு நடந்த முதல் சுதந்திரப் போரில் (சிப்பாய் கலகம்) மௌலானா காஸிம் நானூத்தவி (ரஹ்) ரஷீத் அஹ்மத் கங்கோஹி (ரஹ்) போன்றோர்கள் நேரடியாக பங்கெடுத்தார்கள். முஸ்லிம்களிடம் இருந்த ஆழமான தேசப்பற்றை உணர்ந்த ஆங்கிலேயன், அதற்கு அடிப்படைக் காரணமாக இருந்த இஸ்லாமிய உணர்வை அடியோடு அகற்றிட திட்டமிட்டான். குர்ஆனும் ஆலிம்களும் இருக்கும் வரை நாம் வெற்றி பெறமுடியாது, என்ற விசேஷ அறிக்கையின் படி 1861 - ல் மூன்று லட்சத்துக்கும் அதிகமான குர்ஆன் பிரதிகளை பொசுக்கினர். 14000 உலமாக்கள் தூக்கிலிடப்பட்டனர். டெல்லியில் இருந்த ஆயிரத்துக்கும் அதிகமான மத்ரஸாக்கள் இழுத்து மூடி சீல் வைக்கப்பட்டன. மௌலானா ஷாஹ் வலியுல்லாஹ் (ரஹ்) அவர்களுடைய மத்ரஸாவை புல்டோஷர் மூலம் இடித்துத் தரைமட்டாக்கினர்.

இதுவெல்லாம் எதற்காக இஸ்லாமிய போதனையை ஐரோப்பிய போதனையாக மாற்ற வேண்டும். பிறப்பால், நிறத்தால் இந்தியனாக இருந்தாலும் சிந்தனையால் ஆங்கிலேயனாக இருக்க வேண்டுமென்ற லார்ட் மெக்காலே உடைய திட்டத்திற்கு செயல்வடிவம் கொடுப்பதற்காக!  இதைக்கண்டு வேதனையடைந்த மௌலானா காஸிம் நானூத்தவி (ரஹ்) இஸ்லாமிய கலாச்சாரத்தை பாதுகாக்கும் மத்ரஸாக்கள் இல்லாததால் இந்திய முஸ்லிம்களின் இஸ்லாமிய உணர்வும் கலாச்சாரமும் காலாவதியாகிவிடக்கூடாது என்பதற்காகவும்; மககாவுக்கு ஹிஜ்ரத் செய்து சென்ற ஹாஜி இம்தாதுல்லாஹ் (ரஹ்) அவர்கள் டெல்லிக்குப் பக்கத்தில் ஓர் இடத்தில் ஷாஹ் அப்துல் அஸீஸ் (ரஹ்) அவர்களுடைய (இடிக்கப்பட்ட) மத்ரஸாவைப் போல் ஒரு மத்ரஸாவைத் திறந்து தியாகம் செய்யும் உலமாக்களை உண்டாக்கும் படி யோசனை தெரிவித்ததின் அடிப்படையிலும் மொளலானா காஸிம் நானூத்தவி (ரஹ்)

1867, மே - 30 ஆம் தேதி தேவ்பந்தின் ஒரு மரத்தடியில் தற்போதைய தாருல் உலூம் கலாசாலையை நிறுவினார்கள். ஆங்கிலேயனை இந்தியாவிலிருந்து வெளியாக்குவதற்கு சமுதாயத்தை தாயாராக்குவதே தேவ்பந்த் மத்ரஸாவின் முக்கிய நோக்கம், என்று என்ஸைக்ளோபேடியா ஆஃப் இஸ்லாம் கூறுகிறது. (முதாலஆ பரேலவிய்யத்)  1912 -ம் ஆண்டு எகிப்தைச் சார்ந்த அல்லாமா ரஷீத் ரிளா அவர்கள தேவ்பந்த் வந்த போது, பிரமிக்க வைக்கும் உங்களுடைய மார்க்கப் பணிக்கு உலக முஸ்லிம்கள் நன்றி சொல்ல கடமைப்பட்டிருக்கிறார்கள். இந்த மத்ரஸாவை நான் பார்க்க வில்லையானால் இந்தியாவிலிருந்து பெரும் கவலையோடு திரும்பியிருப்பேன், என்று புகழாரம் சூட்டினார்.

ரஹ்மதுல்லாஹ் கீரானவீ (ரஹ்)

இந்தியாவை ஆண்ட ஆங்கிலேயர்கள் முஸ்லிம்களை கிருத்தவர்களாக்க திட்டம் தீட்டினர். காவல் துறை உதவியுடன் இஸ்லாமிய கொள்கைகள் மீது பாதிரியார்கள் சேற் வாரி வீசினர். இதையும் இந்திய உலமாக்கள் எதிர்கொண்டு சமாளித்தனர். 1854 ஆம் ஆண்டு கிருத்தவர்களின் இஸ்லாமிய எதிர்ப்புப் பிரச்சாரத்த முடிவுக்கு கொண்டு வருவதற்காக ரஹ்மதுல்லாஹ் கீரானவீ (ரஹ்) பாதிரி ஃபண்டரிடம் விவாதம் நடத்தி மாபெரும் வெற்றி கண்டார்கள். அதாரப்பூர்வமான பதில் கொடுக்க முடியாத நிலையில் ஆங்கிலேயர்கள் அதிகாரத்தைப் பயன்படுத்தி கீரானவீ (ரஹ்) அவர்களை கைது செய்ய முயற்சித்தனர். எனினும் அவர்கள் மக்காவுக்கு தப்பிச் சென்றுவிட்டார்கள்.

அங்கு ஸௌலதிய்யா என்ற மத்ரஸாவை நிறுவினார்கள். இன்றும் ஹரமுக்குப் பக்கத்தில் சிறந்த சேவை செய்கிறது ஸௌலதிய்யா. கீரானவீ (ரஹ்) மக்காவில் இருக்கும் தகவல் அறிந்த கலீஃபா அவர்கள் துருக்கி வரும்படி வேண்டிக்கொண்டார்கள. அவர்களிடம் விவாதத்திலல் நடந்த எல்லா கேள்வி பதில்களையும் தொகுத்துத் தரும்படி கேட்டுக் கொண்டதையடுத்து இள்ஹாருல் ஹக் என்றொரு நூலை எழுதினார்கள். அந்நூல் 1863 ல் இஸ்தாம்புல் நகரில் வெளியிடப்பட்டது. இந்நூலைப் படித்த பல கிருத்தவர்கள் முஸ்லிமானார்கள். அந்நூல் ஆங்கிலத்தில் வெளிவந்த போது, மக்கள் இந்நூலைத் தொடர்ந்து படித்துக் கொண்டிருந்தால் உலகில் கிருத்தவம் முன்னேற முடியாது, என்று டைம்ஸ் ஆப் லண்டன் கருத்து வெளியிட்டது.

இல்யாஸ் (ரஹ்):

ஹிஜ்ரி 14 ஆம் நூற்றாண்டின் ஆரம்பத்தில் பிறந்த இல்யாஸ் (ரஹ்) இன்று உலக அளவில் நடைபெற்று வரும் தஃவத் தப்லீகுடைய பணியை துவக்கி வைத்தார்கள். மேவாத் மக்கள் திருட்டிலும் கொள்ளையடிப்பதிலும் கைதேர்ந்தவர்களாக இருந்தார்கள். இந்தத் திருடர்களைப் பயந்து சூரியன் மறைவுக்குப் பின் பெருநகரத்தின் கோட்டைச்சுவர்கள் மூடப்பட்டன. அப்படிப்பட்ட மக்களிடம் நல்லதொரு மாற்றத்தைக் கொண்டுவந்தவர்கள் இல்யாஸ் (ரஹ்) அவர்கள்.

இந்த மாற்றத்திற்கு ஒரு மனிதரைத் தவிர வேறெந்த இயக்கமோ கலாசாலையோ பத்திரிக்கையோ காரணமில்லை, இந்தியா பாகிஸ்தான் போன்ற நாடுகளில் இஸ்லாத்தின் ஆரம்ப காலத்தில் எப்படி தஃவத் நடந்ததோ அது போன்றதொரு முறையில் நடந்தது. அதற்காக பெரிய செலவுகளோ பொருளாதார உதவியோ தேவைப்படவில்லை. அந்த மனிதரின் மூலம் நபித்தோழர்களின் மனஉறுதியை (இறைநம்பிக்கையை) எனக்கு விளங்க முடிந்தது, என்று இல்யாஸ் (ரஹ்) அவர்கள் பற்றி அல்லாமா அலீமியான் (ரஹ்) அவர்கள் கூறுகிறார்கள். (அத்தஃவதுல் இஸ்லாமிய்யா)  

அஹ்மத் பின் இர்ஃபான் (ரஹ்)

ஹிஜ்ரி 13 ம் நூற்றாண்டில் இமாம் அஹ்மத் பின் இர்ஃபான் (ரஹ்) அவர்கள் இந்தியாவில் மிகச்சிறந்த மார்க்க சேவை ஆற்றியிருக்கிறார்கள். அதிகமான பேர் இஸ்லாத்தைத் தழுவினார்கள். அவர்களுடைய சீரிய உபதேசத்தினால் கோல்கத்தா போன்ற பெருநகரத்தின் மது விற்பனையே ஆட்டம் கண்டுவிட்டது. மது விற்பனை மந்தமானதால் அரசுக்கு வரி கட்டமுடியாது, என்று மதுவியாபாரிகள் முறையிட்டனர்.

அலீமியான் (ரஹ்) அபுல்ஹஸன் அலீ நத்வீ அவர்களுடைய மார்க்கப்பணியும் சாதாரணமானதல்ல. சர்வதேச அளவில் அவர்களுடைய பணி பல மாற்றங்களை ஏற்படுத்தியது. கடந்த காலத்தில் இஸ்லாத்திற்காக தங்களை அர்ப்பணித்த நல்லோர்களில் சரித்திரத்தை தமக்கே உரிய பாணியில் தெளிவாக சமுதாயத்தின் முன் வைத்தவர்கள் அலீமியான் (ரஹ்) அவர்கள் தான். இக்கட்டுரை கூட பெரும்பாலும் அவர்களுடைய ஆக்கங்களைத் தழுவியே எழுதப்பட்டிருக்கிறது.

துனீஸியா:

ஆங்கிலேயர்களின் ஆதிக்கத்திலிருந்து  துனீஸியா 1957 ஆம் ஆண்டில் சுதந்திரம் பெற்றது. சுதந்திர நாட்டின் முதல் அதிபர் அல்ஹபீப் போர்கீபா. இவர் மேற்கத்தியர்களின் கைப்பாவையாக செயல்பட்டார்.

பலதார மணத்தை தண்டனைக்குரிய குற்றமாக அறிவித்தார். நீதிமன்றத்தின் மூலமே தலாக் - விவாகரத்து செய்ய வேண்டும் என்று சட்டமாக்கினார். பெண்களுடைய பார்தா முறை காற்றில் பறந்தது. அரசவைகளில் அந்நிய ஆண்களையும் பெண்களையும் அருகருகே அமரச் செய்தார். குர்ஆனில் முரண்பாடு இருக்கிறது என்று வாதிட்டார்.முஹம்மது (ஸல்) அவர்கள் அதிகமாக அரேபிய பாலவனங்களில் பயணம் செய்வதால் பயணத்திற்கிடையில் தான் கேட்டு வந்த பொய்யான செய்திகளையே குர்ஆன் என்று கூறினார். முஸ்லிம்கள் முஹம்மது (ஸல்) அவர்களை கடவுளாக ஆக்கிவிட்டனர் (நவூது பில்லாஹ்) 

இவருடைய இந்த கொள்கைகளைப் பற்றி விவாதிப்பதற்காக மதீனா முனவ்வராவிலல் ஓர் ஆலோசனைக் கூட்டம் நடைபெற்றது. அதில் ஏராளமான மூத்த உலமாக்கள் கலந்துகொண்டனர். இந்தியாவிலிருந்து அலீமியான் (ரஹ்) கலந்து கொண்டது குறிப்பிடத்தக்கது. உலமாக்களின் சார்பாக கடும் கண்டனம் தெரிவிக்கப்பட்டது. இப்படிப்பட்ட சிந்தனையாளர் முஸ்லிமாக இருக்க முடியாது, என்றும் அந்த அறிக்கையில் கூறப்பட்டிருந்தது. (நூல்: அஸ்ஸிராஃ)

லிபியா:

1969 ஆம் ஆண்டு லிபியாவில் ராணுவப் புரட்சி ஏற்பட்ட போது முஅம்மர் கதாஃபீ அதிபரானார். இவரும் டுனீஸிய அதிபர் போர்கீபாவைப் போல குர்ஆனும் ஹதீஸும் தற்காலத்தின் முன்னேற்றத்திற்கு ஈடுகொடுக்க முடியாது, என்று கூறி மார்க்கத்தை வணக்க வழிபாடுகளோடு மட்டும் கட்டுப்படுத்த முயன்றார்.  நபிமொழிகளின் நம்பகத் தன்மையிலேயே சந்தேகம் கொண்டார். பல தரப்பட்ட இஸ்லாமிய நாடுகளின் மார்க்க அறிஞர்கள் அடங்கிய ஒரு குழு ராபிததுல் ஆலமில் இஸ்லாமிய்யா சார்பாக கதாஃபியை சந்தித்து நபி மொழிகள் விஷயத்தில் தங்களுடைய கொள்கையை மாற்றிக் கொண்டு பகிரங்கமாக தௌபா (பாவமன்னிப்பு) செய்யுமாறு கூறிய போதும் அதை அவர் ஏற்கவில்லை. (அஸ்ஸிராஃ) டுனீசியாவிலும் லிபியாவிலும் இவர்களின் நிலை என்னவானது? என்பது பற்றி வாசகர்களுக்கு விளக்கத் தேவையில்லை.

தமிழகத்திலும் பாக்கியத்தின் நிறுவனர் அஃலா ஹள்ரத் (ரஹ்) முதற்கொண்டு அல்லாமா கீரனூரி ஹள்ரத், புரசைவாக்கம் நிஜாமுத்தீன் ஹள்ரத் (ரஹ்) அவர்கள் வரை தங்களின் இறுதி மூச்சு வரை மார்க்கத்திற்காக அயராது பாடுபட்டுவிட்டு நிரந்தர ஓய்வு பெற்றிருக்கிறார்கள். இன்றும் இந்தியாவிலும் சர்வதேச அளவிலும் தீனுல் இஸ்லாத்திற்காக ஏராளமானோர் தங்களை அர்ப்பணித்துக் கொண்டிருக்கிறார்கள். மக்களுக்கு பலன் கொடுக்கக் கூடியவை பூமியில் நிலைத்து நிற்கும் (13:17) என்ற இறைவசனத்தின் படி இது யுக முடிவு நாள் வரை தொடரும். (இன்ஷாஅல்லாஹ்)